落香港饮早茶，享受香港精神

（本文纯为旅游散记，绝无广告利益授受） 香港游七日，例牌朝早去饮茶。于是第一朝搭车去新蒲岗明星酒楼，以前都来过十次八次，所以无乜新鲜感。坐落倾偈，两壶茶“殊”声饮晒，顺手榔起个壶盖，等咗15分钟，未见有人冲水，唯有开声叫句“吾该阿姐冲水”，啲姐仔都系卅岁打下，皮光肉滑，满嘴吾咸吾淡嘅广州话，听讲呢啲系劳务输出嘅工人。如是这般壶盖几次榔干，茶瘾全无，四个人食咗10碟嘢，两百卅几落楼。 第二日搭地铁出太子站，行远几步去番朋友以前嘅“饭堂”----始创中心四楼，旧日叫“联邦酒楼”，自从韩森嘅故事告一段落后，呢间酒楼已易名为海港城。坐落见装修环境与前无太大分别，左望右望想揾张椅放低啲相机、手袋，见一中年男企堂，随口叫声“吾该比张椅我放啲嘢吖”，只听得一声清脆响亮嘅回答“应该嘅！”随即见其急步而去，待椅子拿来后，一声“放好啲嘢、慢慢叹”，已觉宾至如归之感。 (红间条嗰栋） 四个人吹水，杯起杯落，壶盖揭起未榔稳，已有冲水阿婶抢步而至，真可谓水滚茶靓心情好。点咗14碟点心，皆精美可口；薄脆嘅锦卤云吞、造型特别，香滑嘅红枣糕、更是回味余甘。坐到12点几，埋单时以为听错“167蚊”，我惊呼“平过广州、靓过广州、好味过广州！！！”原来在朝早11点前落单系半价。 第二朝继续在呢间旧楼饮茶，专门点咗4碟红枣糕， 打包返去放在雪柜作冷食，咬落爽滑香甜。第三朝更点咗6碟返去。食得好味、倾得开心，临走同呢位企堂哥哥影番张相，多谢距嘅服务。 香港系礼义之地（非仪，而以义冠之，则为港人语“受得人薪水就要打好嗰份工”），我赞其为“香港精神”，一个城市，就系由呢啲细微之处彰显其文明，无超脱嘅口号，一切都系甘自然........... 事因苏虾兄提起去香港游，今恰逢秋高气爽，若就脚、是为荐............end