|
【人之初】口多多 (童言無忌，口不擇言) · 【笑騎騎】放毒蛇 (笑裡藏刀) · 【馬照跑】舞照跳 (九七年之後，香港保留資本主義制度，五十年不變) · 【知少少】扮代表 (貪功認叻) · 【冇幾耐】扮大袋(大袋是香港的粗俗、語，意謂大人物也) · 【牙斬斬】死得慘 (禍從口出) · 【眼眨眨】扮花旦 (雖無過犯，面目可憎之輩) · 【聲大大】冇貨賣 (言過其實) · 【眼大大】易學壞 (青春少艾，容易誤入歧途) · 【周身郁】扮忙碌 (郁者，動也；講多過做) · 【眼濕濕】扮憂鬱 (貓哭老鼠) · 【嘴藐藐】打得少 (口花花，撩是鬥非) · 【靜雞雞】認低威 (衰衰地慣鋪，向對方認錯) · 【有早知】冇乞兒 (世事難料) · 【晨早知】中三T (三T，香港最多獎金的賽馬彩池, 此句意思與上句相同) · 【擔櫈仔】霸頭位 (驚死執輸) · 【一張票】睇到笑 (香港三級色情電影戲院買一張票可以整天任看) · 【好好好】睇唔到 (敷衍了事) · 【撓埋手】晨早走 (練精學懶) · 【有得震】冇得訓 (大禍臨頭。震，顫抖的意思) · 【搞搞震】冇幫襯 (搞事破壞份子) · 【側側膊】唔多覺(得過且過，求求其其) · 【搏大霧】唔使做(使讀作洗；混水摸魚) · 【有姿勢】冇實際 (虛有其表) · 【有交易】靠實力 (不靠傍門左道) · 【七八九】飲到嘔 (「七八九」是卡拉OK夜店的猜枚遊戲) · 【硬骨頭】食地球 (「地球」指六、七十年代國產的地球牌香煙) · 【手頭緊】搵真銀 (勤力搵錢) · 【烏啄啄】任人將 (做人糊塗，容易被人騙) · 【淡淡定】有錢剩 (凡事處變不驚；剩，音「靜」) · 【失失慌】害街坊 (小不忍則亂大謀) · 【拿拿林】上瓊林 (瓊林是香港一間著名夜總會) · 【口旱旱】食咳糖 (口水都無滴) · 【有得賭】精神好 (爛賭之輩) · 【三缺一】慘過乞 (麻雀術語) · 【時運高】搏番鋪 (把握時機) · 【煙KJ 】噤住呤 (話事啤術語，贏面甚高) · 【二仔底】冇得睇 (「沙蟹」術語，輸多贏少) · 【隨口嗡】當祕笈 (語不驚人誓不休) · 【招乜積】中圍骰 (高傲而好運) · 【贏粒糖】輸間廠 (十賭九輸) · 【贏把遮】輸架車 (前句另一個版本) · 【面懵懵】當老馮 (老馮，意謂奉旨) · 【女人心】海底針 (女人善變) · 【十八樓】自己友 (街坊街里，守望相助) · 【有竇口】早啲抖 (安得廣廈千萬間) · 【讀書少】俾人藐 (學識低者，會被人看不起) · 【頭岳岳】四圍度 (無聊發悶) · 【爛撻撻】唔負責 (無恥之徒) · 【冇晒計】發狠戾 (狼戾，近音Long禮；意思不按常理做事 【咖喱啡】扮阿姐 (泥「鯭」充石斑). 姿姿整 － 有環境 (露出馬腳) · 【咁人齊】等發圍 (同心協力) · 【趁佢病】囉佢命 (趕盡殺絕) · 【出嚟威】識搶咪 (要懂得爭取機會) · 【唔想衰】埋大堆 (圍結就是力量) · 【有異性】無人性 (見色忘義) · 【有殺錯】冇放過 (寧枉莫縱) · 【有胸毛】出嚟蒲 (惡人形象) · 【聽唔明】扮純情 (裝模作樣) · 【懶癡纏】博可憐 (做戲咁做) · 【大笪地】食自己 (大笪地，香港平民夜總會，擺檔者都是自食其力之人) · 【眼光光】等天光 (失眠，滿懷心事) · 【印印腳】等人約 (無所事事) · 【有斷估】冇痛苦 (難得糊塗) · 【撚雀籠】遲早窮 (敗家仔的形象) · 【人工高】冇祕撈 (祕撈，祕密地去做兼職) · 【唔夠班】執二攤(未夠斤兩) · 【跟老頂】有得醒(老頂，大哥大之輩；醒，有好處和著數) · 【著草鞋】有排捱(著草，是黑語，即走路的意思) · 【走得快】好世界 (童年時順口溜) · 【走得摩】冇鼻哥(鼻哥即鼻樑也；意謂走得慢者，沒好下場) · 【你老竇】大水牛(童年時罵人的順口溜) · 【你老母】大風爐(也是童年時的罵人順口溜) · 【大肚Dum】冇良心 (童年時順口溜) · 【大欺細】俾屎餵(欺，讀「蝦」音) · 【有Background】冇困難(Background，人事背景的意思) · 【有Quali】大餐史(Quality指資歷聲望；餐史，英文字Chance，機會的意思) · 【密響Call】冇甩拖 (將勤補拙) · 【手指指】扮FAN屎 (扮熟絡狀，FAN屎，超級歌迷影迷) · 【起大屋】靠表叔 (表叔，中國大陸幹部之稱，此句意思是想在大陸發達，買田買地，非依靠高幹不可為也) · 【十十吓】拉頭馬 (「十」即「霎」，香港人極為抵死的用語。一個人「霎」吓「霎」吓，表示一個人渾渾噩噩，此句的意思是傻人有傻福，胡里胡塗，無端端發達) · 【中間界】騎喱怪(中間界指中間分界的髮型，騎喱怪，正字是「騎籬蟈」，意為形象標奇立異古怪出位之人。騎籬，是伏在籬笆上的意思；蟈，是一種墨綠色的蛙類動物) · 【唔夠皮】無面俾 (皮，即「皮費」，經營開支洗費。唔夠錢用時，甚麼人也不賣帳) · 【二三線】好難變(二三線指不是主角的次級貨色。此句語是不好的東西很難會變好的) · 【係咁易】戴撈屎(表示囂張，撈屎，勞力士金錶也) · 【冇啦啦】整笪疤(「疤」讀「啦」音, 意謂畫蛇添足) · 【白白淨】冇性病(稱讚女孩子的美言, 但帶有邪念) · 【人嚇人】好易暈(廣東俗語云：人嚇人無藥醫. 意思謂俾人嚇慘過俾鬼嚇) · 【穩穩陣】做半份 (安全第一，辦事不要博得太盡) · 【手頭緊】賣白粉 (狗急跳牆，不擇手段，不理後果) · 【吹吹水】唔抹嘴 (吹水，口沫橫飛，愛吹牛皮) · 【趁你病】撻你訂 (撻定，是地產買賣術語，放棄交易之意，全句解乘人之危落井下石) · 【唔用腦】等運到(批評那些靠好彩不靠辛勤努力之輩) · 【癲癲地】唔識死 (不知天高地厚) · 【賺快錢】炒孖展 (孖展，高風險的投資方法，如同賭博，可以發大達，又可傾家蕩產) · 【過大海】博好彩(大海，指澳門，香港人假期喜歡到澳門賭場搏殺) · 【口水多】無尿屙(指喜歡發表偉論的人，香港俗語有云：口水多過茶，口水多到連尿也沒有，其吹水程度之厲害可想而知) · 【當我流】拋浪頭(流，即假嘢，非真材實料，拋浪頭即靠吹牛皮，靠嚇) · 【出嚟混】無責任 (指吊兒郎噹，不負責任之人) · 【日本船】遲早完 (「丸」日文解「號」，故此日本輪船多寫上「××丸」，「完」是「丸」的諧音, 全句的意思是事情很快便會失敗) |
|
|
