|
客家山歌特出名，
条条山歌有妹名。
条条山歌有妹份，
一条无妹唱唔成。
河唇洗衫刘三妹，
借问先生哪里来？
自古山歌从口出，
哪有山歌船载来？
山歌又好声又靓，
画眉难比妹歌声。
上岗过坳唱一首，
百斤担子也变轻。
一朵红花路边生，
花又红来叶又青。
甘好红花哥唔识，
手攀花树问花名。
你爱交情尽管交，
切莫交到半中腰。
大风吹断麻竹笋，
有头无尾得人恼。
郎有心来妹有心，
铁尺磨成绣花针。
郎系针来妹系线，
针行三步线来寻。
食尽生果唔当梨，
看尽妹子唔当你。
赤孽打花千百朵，
唔当蔷薇开一枝。
新打茶壶七寸高，
人人都话系难挑。
人人都话系好锡，
到底唔知有铅么？
岭岗顶上种布惊，
唔使淋水也会生。
总爱两人心甘愿，
唔使媒人也会成。
竹篙晒衫拉拉横，
两人相好尽心行。
谁人系敢来干涉，
官司打到北京城。
新打剪刀唔使磨，
有情阿妹唔使多。
有情阿妹连一只，
当得月光照大河。
变个后生眼甘歪，
翻去翻转来看崖。
放个大方畀你看，
日后相思莫怨崖。
正月过了二月来，
处处花园有花开。
别树有花崖唔采，
此树无花等到开。
茶树叶子尖棱棱，
茶树头下好谈情。
遇到路边有人过，
两人假作拈茶仁。
郎系有心妹有心，
唔怕山高水又深．
山高自有人开路，
水深自有探桥人。
|
深山肚里一株梅，
经霜捱雪红花开。
明知深山有老虎，
因为寻梅舍命来。
榄树打花花揽花，
郎就榄上妹榄下。
掀起衫尾等郎榄，
等郎一榄就归家。
新打茶壶锡溜铅，
妹话锡来哥话铅。
妹话铅来哥话锡，
总爱有锡正有铅。
新绣荷包两面红，
一面狮子一面龙。
狮子上山龙下海，
唔知几时正相逢。
入山看见藤缠树，
出山看见树缠藤。
树死藤生缠到死，
树生藤死死也缠。 |
客家山歌远传扬，
条条唱出情意长，
条条唱出郎心事，
声声唱出妹衷肠。
哥系绿叶妹系花，
哥系绫罗妹系纱，
哥系高山石崖水，
妹系山中嫩细茶。
|
