客家山歌（五）
2012-3-19 17:02| 发布者: 杭网二号| 查看: 837| 评论: 0|来自: 上杭光中轩
摘要: (61)心唔休 山歌唔唱唔风流， 猪肉唔煎唔出油， 梧桐落叶心唔死， 连妹唔到心唔休。 橹箕割了心还在， 五更落露生回来， 鹞婆入村叼鸡子， 今番唔到下番来。 唔过重阳唔落霜， 唔过霜降禾唔黄， 唔到黄河心唔死 ...
|
(61)心唔休
山歌唔唱唔风流，
猪肉唔煎唔出油，
梧桐落叶心唔死，
连妹唔到心唔休。
橹箕割了心还在，
五更落露生回来，
鹞婆入村叼鸡子，
今番唔到下番来。
唔过重阳唔落霜，
唔过霜降禾唔黄，
唔到黄河心唔死，
唔同哥爱心唔凉！
连尔唔到心唔灰，
今生唔到下生来，
阿哥好比梁山伯，
阿妹好比祝英台。
(62)吾使郎多言
桐树开花朵朵连，
高车吊水荫旱田，
好田唔使高车水，
好妹唔使郎多言。
好香唔使几多枝，
好酒唔使几多杯，
神灵唔使多香纸，
好妹唔使多语言。
猪肉煮酒唔使汤，
饭汤洗衫唔使浆，
分明妹子唔使讲，
有心栽花花自香。
连妹一事爱分详，
唔好打卵就见黄，
脱桌食饭莫斗紧，
老鼠游桁慢上梁（商量）。
(63)难测尔心肠
榄核贴头唔端方，
湖洋莳田唔对行，
船头汤鸡失内脏，
水深难摸尔心肠。
浑水过河唔知深，
唔知阿哥乜样心，
万丈深潭难打底，
锡打茶壶假镀金。
先日当涯花柬香，
今日当涯烂箩筐，
神仙难测尔心事，
曲尺难量尔心肠。
新做民船尾刁刁，
一心同妹出外漂，
未曾测到妹心事，
水急唔敢乱开篙（交）。
上塘菱角下塘莲，
一心都想嫩娇莲，
半夜烫猪冇火看，
问妹心肠在哪边？
(64)爱嫁老实伯
食饱夜饭嬲月光，
看等鲤鱼透水上，
鲤鱼专寻涌水角，
妹子专寻老实伯。
割草爱割老草头，
做屋爱砌石檐头，
嫁郎爱嫁老实伯，
唔会贪花到处游。
种树爱种松树秧，
连郎爱连老实郎，
松树正系常青树，
老实阿哥情过长。
(65)冇钱诈耳聋
有钱买酒酒壶重，
冇钱买酒酒壶空，
有钱问妹声声应，
冇钱问妹诈耳聋。
有钱有食笑嘻嘻，
一次冇钱诈唔知，
先日有钱心肝肉，
今日冇钱死秃尾。
荒坟种菜草先生，
冇钱恋妹系过争，
手拈花边六钱八，
里摆就被妹看轻。
冇情妹子唔好交，
风吹禾草里面刀，
今日有钱今日交，
一番冇钱面就敖。
(66)假情假意
落雨出星假天晴，
假情假意同涯行，
面前放有猪肉碗，
假意来夹萝卜生。
假情假意来交情，
番番来到唔应承，
口里讲出莲花样，
水打棺材溜死人。
假情妹子唔好交，
唔当自家打单鸟，
东园改竹西园种，
茎系唔死叶也燥。
十月来着汤坑机，
假意热情涯也知，
黄酒来充夹酒卖，
好歹吞在涯肚里。
纸做猪头哄鬼神，
看尔唔系真情人，
咀里就话同涯好，
心肝还是挂别人。
玻璃眼镜假水晶，
十三两秤假正斤（经），
口含灯草唔落肚，
看尔唔系食（实）心人。
(67)冇情吾好交
松树打子尾上天，
冇情妹子枉费连，
高山来望凉井水，
肚渴样得近身边。
冇情妹子唔好交，
蒸酒冇娘枉涯劳，
麦须磨粉冇面见，
蔗叶盖屋唔到茅（冇）。
晒谷落雨加早收，
冇情妹子就爱丢，
下田去拈田螺食，
冇端捡到气来抽。
样般阿妹柬冇情，
过月鸡蛋来送人，
打落锅头黄就散，
未曾落肚头就晕。
二月莳田秧唔长，
五月割禾半青黄，
连妹连了冇情义，
急到阿哥半癫狂。
冇情妹子唔好交，
恰似山中雪打蕉，
恰似山中雪打树，
条条断到半中腰。
松毛点火一时光，
冇情妹子情唔长，
六月买到烂扇把，
紧拨心头也唔凉。
冇油煮菜唔杀青，
冇情阿哥唔好行，
石膏豆腐落锅煮，
面上就热心里冷。
行等行等冇来往，
猫公上圩会冇行，
早知阿哥冇情义，
早做横屋唔爱廊（郎）。
三月莳田满段青，
六月割禾冇对成，
早知阿哥情义短，
花边贴脚涯唔行。
(68)洗碗有相磕
问妹唔声真真奇，
哪句言语得罪尔，
句把言语妹爱受，
洗碗也有相磕时。
尔也唔使恨啾啾，
半讲半笑人人有，
口水吐落长江内，
言语唔着水照流。
妹子唔使气冲冲，
心中有事放从容，
尔有情理慢慢讲，
丝线牵得石牛动。
妹也唔使恨啾啾，
洗碗相磕时时有，
生柴拿来做火种，
涯今唔着妹莫丢。
亲亲热热两公婆，
床头打交床尾和，
公薮鸡子有相打，
心里想开事就冇。
(69)劝解
有愁有急爱想开，
莫来愁急做一堆，
藤断自有篾来驳，
船到滩头水路开。
尔莫郁来尔莫愁，
自有云开见日头，
自有水清见到底，
自有春光在后头。
贫穷唔使苦蹉磋，
地阔还有天来遮，
抬起头来天柬阔，
穷苦唔单涯两侪。
落得雨多总会晴，
米谷贵了总会平，
水打石桥会转侧，
阿哥总有好运行。
阿妹唔使苦啾啾，
竹笋逢春有出头，
月缺也有团圆日，
安乐日子总会有。
涯劝妹子莫多疑，
莫嫌阿哥得运迟，
腊蔗想长多一节，
花开有日运有时。
阿哥落运妹莫愁，
柬好棉纱有结头，
柬好月光有缺角，
柬好草岗有瘦牛。
劝妹心头爱想开，
莫来愁急做一堆，
阿哥好比退冬树，
一到交春叶又开。
(70)伤离
买梨莫买蜂咬梨，
心中有病冇人知，
因为分离故亲切，
谁知亲切转伤梨。
催人出门鸡乱啼，
送人离别水东西，
挽水西流想冇法，
从今不养五更鸡。
当梨花开满山香，
当梨花下送情郎，
莫话当梨花好看，
想到当梨割断肠。
竹篙晒衫拉拉横，
保佑阿哥走唔成，
保佑月历冇日子，
保佑水浅冇船行。
二丈八布做耍衣，
嘱郎年节爱早归，
燕子含泥归本薮，
莫学蝴蝶满天飞。
阿哥出门妹莫愁，
人千人万坐船头，
丝线拿来做衫着，
钩线密缝望回头。
(71)送郎
郎爱出门妹难留，
一边送来一边愁，
丝线打结吞落肚，
冇人能解涯结头。
送郎送到门段下，
包袱遮子妹来拿，
十日半月爱来信，
三年两载爱回家。
送郎送到大路头，
嘱郎回时买枕头，
买枕爱买鸳鸯枕，
莫买单枕各一头。
送郎送到五里亭，
再送五里难舍情，
再送五里情难舍，
十分难舍有情人。
送郎送到大桥头，
两头河水急秋秋，
两头丝线打死结，
人情难舍哥难丢。
送郎送到石子岗，
石子触脚苦难当，
触就触在郎脚上，
痛就痛在妹心肠。
送郎送到牛斗岗，
郎跌脚趾受了伤，
扯幅罗裙包脚趾，
亲哥痛肉妹痛肠。
送郎送到冷水窝，
嘱郎冷水莫食多，
冷水食多肚会疾，
行到半路哪人摩。
送郎送到上排畲，
山里禾苗叶些些，
禾苗冇水难打谷，
妹子冇郎难当家。
送郎送到大码头，
满江河水向东流，
一对鸳鸯少一只，
一只孤单水上浮。
送郎送到渡船头，
脚踏渡船浮对浮，
哪有利刀能割水？
哪有利刀能割愁？
行绣荷包两面红，
一面狮子一面龙，
狮子上山龙下海，
唔知哪日正相逢。
(72)送郎过番
一下种竹望上天，
谁知紧大尾紧弯，
一心同妹望偕老，
唔奈家贫去过番。
阿哥出门去过番，
洋船等到粤海关，
妹子有话当面讲，
下番搭信较艰难。
妹送亲哥上火船，
汽笛一响割心肝，
下番系有水客转，
搭银搭信报平安。
汕头出海七洲洋，
七日七夜水茫茫，
行船三日唔食饭，
记妹言语准干粮。
(73)阿哥走后
汶水长流有日清，
阿哥走后难相亲，
路远迢迢冇处问，
朝见日头夜见星。
阿哥走撇妹痛肠，
三餐茶饭唔想尝，
紧食烧茶肚紧渴，
紧缅亲哥夜紧长。
阿哥走撇妹寒酸，
秤砣跌撇剩秤杆，
秤杆拿来挽内脏，
郎就挂心妹挂肝。
有哥在家妹温暖，
冇哥在家妹寒酸，
三年五载冇面见，
床下目汁好行船。
河水浑浑河岸崩，
亲哥走后隔重天，
三岁孩子脱乳咀，
一觉醒来一觉跟。
阿哥走后妹心愁，
三朝七日唔梳头，
听到阿哥写信转，
髻尾梳到黏肩头。
(74)送妹归
妹子爱归只管归，
深山大树已伸尾，
砍条大树开船板，
做条新船送妹归。
鸟子吵林日落西，
三魂七魄送妹归，
转去家中唔使苦，
系生系死哥陪尔。
送妹送到茶亭下，
放下担子来食茶，
嘱妹食茶爱洗碗，
切莫食人口涎渣。
妹子爱转慢慢行，
风吹芒草尔莫惊，
深山鸟叫尔莫怕，
阿哥魂魄伴尔行。
妹子爱归慢慢归，
来有日子转有期，
脚步送尔唔到屋，
心肝送尔一千里。
竹篙打水两边开，
问妹转去几时来？
有人来往搭封信，
冇人来往托梦来。
(75)挂念
柬久唔曾见心肝，
人冇见面心冇安，
墨水拿来吞落肚，
时时挂念（染）涯心肝。
睡目唔得到鸡啼，
手拿剪刀捡布裁，
裁到半夜打呃嚏，
莫非心肝想念涯？
日日落雨搅大风，
唔得天晴见天公，
好久唔曾见妹面，
心肝愁碎眼愁蒙。
行唔安来坐唔安，
时时挂念嫩心肝，
念爷念[女哀]有时日，
挂念心肝冇时断。
脚踏高山十二重，
高山顶上有好风，
好风吹在郎身上，
好妹挂在郎心中。
娥眉月子弯钩钩，
两个星子挂两头，
郎心挂在妹心上，
妹心挂在郎心头。
姜公钓鱼石上坐，
一心挂念那条河，
阿哥有心挂念妹，
妹子冇心挂念哥。
|
|
