笑林：沐足千企冇搞嘢

 沐足冇搞嘢

日期:[ 2014-07-11 ]  版次:[ A33版 ]  版名:[ 云山论见]

◎阿六 律师

  新闻讲：近日，省府法制发布有关管理规定（征求意见稿），明确将加强对桑拿、沐足等按摩服务的经营场所管理，防止涉黄事件发生。

  阿六讲：小弟近日听到一个同沐足有关嘅故事。

  土生土长嘅广州人某生去沐足，喺房间坐落就将对脚浸入沐足盆，之后就——

  沐足女技师笑骑骑用生硬嘅粤语问：“阿生，搞唔搞嘢？”

  某生心谂，唔系咁沙胆啊，但佢依然够定力：“唔搞嘢”。

  先暂停。解释下粤语中嘅“搞嘢”：可以系搞笑、鬼马、有趣，但喺特定场合下就系指发生男女性关系。

  继续——

  听到某生话“唔搞嘢”，沐足女技师即刻拎起壶滚水倒落个沐足盆，问：“搞唔搞嘢？”

  某生俾渌到呱呱叫，心谂，呢个女人都够狼胎，谋唔到财就想害命，于是宁死不屈：“唔搞嘢！”

  点知沐足女又拎起个暖水壶，一见咁，某生即刻冇鞋拉只屐，走夹唔唞。

  事后经理解释，沐足女技师讲嘅“搞唔搞嘢”系“够唔够热”嘅意思，只系粤语讲得唔准。

  故事讲完喇，虽然系一个误会，但从中讲明两个问题：第一，外地人嚟广州做嘢要学好粤语，如果唔系，轻则易得罪人，重则易惹官非；第二，按摩场所属“特定场合”，各位阿生沐足就沐足，水够热就讲“够热”，但千祈冇“搞嘢”。