近日睇娱乐新闻，知道某香港女明星终于有喜。“ＸＸ最初嫁俾Julian，其实冇谂过生仔……”又系香港多数报纸杂志成日出现嘅问题：究竟系用“畀”定系“俾”至啱呢？
畀，喺粤语入面，系遗留落嚟嘅若干上古词语中最常用嘅一个口语词。唔少人写作“俾”，“俾”者，使也，唔可以通假。所以，准确啲嚟讲，呢个系同音误写，属于别字。
《说文》：“畀，相付与之约在阁上也。”佢系个象形字，象的系一束纺织物(约)，放喺一个托盘(阁)上面；系古代君主赐与臣仆物品采取嘅方式。因此得出语义为“与也”、“予也”。读音必至切，如此。另外，据清代著名嘅语言学家、经学家段玉裁讲，“畀”重有“夫勿切”一读，但呢种讲法重未揾到例子支撑。其实“畀”最早见《书·洪范》：.“鲧堙洪水，汩陈其五行，帝乃震怒，不畀洪鸿九畴。”又《多士》：“惟天不畀，允冈固乱。弼我，我其敢求位；惟帝不畀，惟我下民秉为，惟天明畏。”又如《诗·小雅·巷伯》：“彼谮人者，谁适与谋？取彼谮人，投畀豺虎！豺虎不食，投畀有北！有北不受，投畀有昊！”
秦汉以后，至到明清嘅古籍入面，“畀”仍有使用，不过佢系以古文语词面貌出现，再唔系口语嘅反映嘞。不过从上引例，就可以知道粤语口语入面“畀”嘅来源系几咁古老。
上文讲到香港多数报纸杂志发现有呢个别字问题，其实广州本地嘅娱乐杂志出现嘅情况更多(可以话暂未见过正确使用过嘅)，希望大家多啲留意并正字正用嘞。
