可能根本未听过... 小岛位于丫髻沙大桥桥底,珠江中央,无任何陆路可以前往岛上,所以只能够搭船上岛。 今次攀山涉水(坐车坐船)嚟到 目的地只有一个 可以讲係最近市区嘅岛上独立农庄 新业路码头就有停车位超方便 钓鱼麻雀烧烤一应俱全 又係一个可以玩足一日嘅地方 嚟到码头打电话比老板,就会有人开船嚟接你嘎喇~一部有旧时代感嘅机帆船,坐上去好神奇嘅感觉!记得睇清楚唔好上错船啊~ 路程唔远,五分钟左右就到。远处就能望到刚记嘅招牌~农庄临江而建,好有江南水上人家嘅感觉。 小岛虽然唔係世外桃源,但係同对面江嘅闹市却有天渊之别。少咗车水马龙嘅嘈杂燥动,更多嘅係清新宁静。 农庄最讲究係食材新鲜 就连最基本嘅用油都要选用土榨花生油 即点即劏即食就最滋味 咁游水靓鱼、肥美清远鹅、走地鸡等靓食材 当然唔会局限于一种烹调方法 所以一种食材多种做法 就係农庄食饭最大嘅特色 ◆ ◆ ◆ ◆ 大头鱼:一鱼四食 煎焗骨腩、凉拌鱼皮、无骨鱼片、清蒸/剁椒鱼头 生猛游水大头鱼,头大肥美,肉质雪白细嫩!简直全身都係宝! 煎焗骨腩 煎焗鱼骨腩係顺德菜嘅杀手锏!将骨腩裹上炸粉煎至金黄,再加上秘制调味粉、辣椒圈等调味,香喷喷好诱人!鱼肉唔多,但係骨腩嘅魅力正正係吮充满鱼脂鱼香嘅骨头,外层香口酥脆,内里鱼肉鲜嫩多汁,劲惹味,终于知道连骨都唔放过係咩感觉喇~ 葱油淋无骨鱼片 越清淡嘅做法就越考验鱼嘅新鲜度。师傅将大骨起走、细骨切碎,将鱼肉切成薄片灼熟,最后淋上热辣辣嘅姜葱酱油就可以食喇~。简单做法最大限度保留咗鱼肉嘅鲜甜,入口肉质细腻柔软,完全无鱼刺吉口嘅感觉,而且一啲都唔会腥!鲜味超出唔少贵价海鲜! 剁椒鱼头 鲜艳夺目嘅剁椒铺满晒喺鱼头表面,卖相简直令人流晒口水!鱼头浸喺剁椒汁入面,味道恰到好处咁渗入到鱼肉当中~。鱼头胶质丰富肉质细腻,辣度岩岩好,更多嘅係咸香~当然一啲都唔食得辣嘅朋友,都可以选择清蒸鱼头噢~ 凉拌鱼皮 ◆ ◆ ◆ ◆ 正宗清远鹅 碌鹅、焖鹅、酸梅鹅、清汤鹅、盐水鹅、烧鹅 温馨提示话你知 农庄黑鬃鹅现杀现做 避免各位吃货等候太长时间 建议提前一小时预约 从清远选取优质黑鬃鹅翻嚟圈养,鹅味浓、肉结实,係做烧鹅嘅顶级食材! 大盘鹅 未摞到出嚟已经闻到香味!有秘制酱汁嘅加持,色泽油亮,就係睇个样就知道好味嗰种!鹅味浓郁,肉质结实有嚼劲,正!白贝同干蚝令鹅肉鲜味提升成个档次!芋头饱吸酱汁好入味软糯,同时又降低咗鹅肉嘅肥腻感。连汁都唔可以放过,捞饭必备! ◆ ◆ ◆ ◆ 农家走地鸡 铜盘蒸鸡、白切鸡、葱油淋鸡、豉油鸡 选用被圈被放养嘅正宗农家鸡,鸡嘅品种多不胜数!胡须鸡、芦花鸡 、贵妃鸡有齐! 经常会打开鸡笼放养,围住池塘边活动,啄食跌落嘅果实,所以鸡质特别好! 砂锅焗豉油鸡 如果要讲小编最中意嘅做法,必选豉油鸡!因为嗰阵甜甜嘅豉油味~细个唔肯食饭只要有豉油鸡就一定食晒!唔好睇影相好精致,其实超大一盘!带有酱油般明亮嘅色泽,味道咸香适中,略略带啲甜味,绝对色香味俱全! 因为经常将鸡放养,肉质爽口弹牙,鸡皮更係滑嫩无比! 加入白贝,更能够带出鸡嘅鲜味!白贝只只开口 肉厚鲜嫩多汁! 炭吊烧鸡 无错啦 ,又係烧鸡,但係睇分量就知道比出面嘅大只N多!前凸后翘,散发住迷人嘅芳香,色泽金黄嘅外层泛住油光!绝对系原只炭烧,非表皮淋油处理。想象下脆皮下面隐藏嘅嫩滑鸡肉, 烧鸡嘅正确食法当然係直接用手啦,两三下功夫将烧鸡撕开,肉汁即刻从脆皮喷出来! 摞起鸡肶,大啖咬落去!皮脆肉嫩,原汁原味锁喺鸡肉入面,连鸡胸肉都嫩滑到令人再三回味,齿颊留香!优惠价只要¥17.99/只,抵到烂啊! 脆皮烧肉 绝对嘅皮脆肉嫩!而且上台嘅时候仲要係热嘎!肥肉比例较多,但係识食嘅先知道烧肉当然肥嘅好!食落淡淡回甘,皮脆肉嫩,口感好丰富~。烧肉皮烤到松化膨胀,咬落去仲会发出卜卜声,好耐无食过咁脆口嘅烧肉喇~再点啲酱料白砂糖,简直人间美味啊! 盐焗掌亦 全部都係精选鹅掌鹅亦,绝对唔会搵鸭掌浑水摸鱼!用精盐焗制,加入沙姜、葱花、芝麻等配料,表皮更加酥脆!出面食饭一般卤水鹅掌居多,其实盐焗仲惹味!皮韧肉质结实有嚼劲,又酥又香特别入味!啃完一只又一只,根本停唔到! 脆皮豆腐 第一次食咁整嘅豆腐,有啲似炸牛奶嘅口感!用山水豆腐制作,好考究师傅对火候嘅掌控,一唔小心豆腐就会散开!豆味浓郁,外酥内嫩!外层脆皮撒上用七八种调味料混合筛选出嘅调味粉,更能够带出豆腐嘅鲜味!配埋甜酸酱一起食,一啖一个好满足! 韭菜浸鹅血杂 韭菜、鹅血都具有清肺嘅功效,吸得多城市嘅废气就要食多碗喇~。鹅杂爽口、鹅血质地结实鲜味十足!韭菜嘅加入去除咗内脏嘅腥味之余,更提升咗成煲鹅血杂汤嘅鲜甜味,饮落舒服唔会觉得口渴~~ 木桌木椅,竹棚吊扇,透露住朴实嘅农家气息。右边珠江左边鱼塘,唔知係咪身临其境,喺刚记食饭觉得特别香,特别有原始嘅味道。 包房入面用自动麻雀机,饭后饱饱滞滞最适合搓翻两圈~ (向左边滑动即可见到更多图片) 出面就係大型鱼塘,100蚊全天任钓~老板仲开玩笑讲:“咩都唔多就鱼多,鱼塘多!”鲩鱼、大头鱼、非洲鲫、鲮鱼,甚至水鱼都有人钓过上嚟! 趁周末一个人嚟钓下鱼,未尝唔係一个远离烦嚣释放压力嘅方法~ |
|