|
【学上海话】向明中学个古诗词吟诵 作者、朗读：王胜中（1956－1962年在向明中学读书） 从1956年进入向明中学初一，直到1962年高三毕业。辣向明中学整整度过了六个年头。迭个六年，尤其是初中阶段，人还小，刚刚有点懂，值得回忆个事体就特别多。譬如我个汉语老师石爱鹤，勿但教阿拉汉语知识，还对阿拉做作业，写字做规矩。进了中学，就写想写潦草字了，但是又勿懂，就瞎写。石老师就纠正我，教我成功个“成”字，行书应该哪能写，勿好自家瞎发明个。迭个我一辈子也勿会忘记脱个。向明轶事蛮多。但最让我开眼界，最希望能发扬传承个，是向明中学个古诗词吟诵。今朝主要分享自家经历个古诗词吟诵教育。 古诗词个诵唱，现在也是一个热门话题。电视里也有古诗词个朗诵，吟诵。但是总觉着脱我辣向明中学听到学到个勿一样。 56年，我刚进初一，我小阿哥也搿年考进向明高中。伊拉搿个辰光教室辣向明中学七间头，现在已经拆脱了。由于当时是两部制上课。阿拉初中课少。我呒没课个辰光，就到小阿哥个教室外头听伊拉上课。所以伊拉个先生、同学蛮多侪认得我。后来有个先生，等我高中辰光，又来教我了，就特别亲切。搿个辰光，语文课是分成文学脱仔汉语两门课个。我最喜欢听小阿哥个文学课了。伊拉先生姓陆，好像叫陆兴国。陆先生教古文，有“孔雀东南飞”、“秦罗敷”等。最精彩个是陆先生对古诗词侪是“唱”个。而我立辣外头听壁脚，听了也记辣脑子里了。我觉着陆先生唱了真好，真叫朗朗上口，好学好记。从56年到现在，六十多年了。我还能记得几首。其中，古乐府《十五从军征》，我基本浪侪能会得诵唱。诗经《关鸠》，也能唱。杜甫个《兵车行》我觉着最激昂好听，可惜忒长了，我只能记得几句。下面我就学了吟唱介绍迭个几首古诗。 古乐府民歌《十五从军征》。迭首民歌，通过对一个老兵遭遇个具体描写，揭示了汉代兵役制度个黑暗，脱仔统治阶级个穷兵黩武。 搿首民歌共十六句，分四个部分，第一部分六句，是讲：一个人，十五岁就去当兵打仗了，到八十岁再回来。路浪碰到自己乡下头个人，问老乡，我屋里还有啥人？同乡人回头伊：侬往远处看，伊面长满松柏，坟墓成堆个地方，就是侬个屋里。搿段就是“十五从军征，八十始得归。道逢乡里人，家中有阿谁？遥望是君家，松柏冢累累。” 第二部分四句，是讲老人回到自己老屋。看到个是兔子从狗洞里进出，野鸡辣屋樑浪飞。庭院里侪长了野谷子，井浪向也长了野葵菜。一片荒凉个景像。即“兔从狗窦入，雉从樑上飞。中庭生旅谷，井上生旅葵。” 第三部分四句是讲：老人伊拿野谷子舂成米煮饭，采了野葵菜烧羹汤。但是等到饭、汤侪烧好，一看，勿晓得还有啥人吃。已经呒没人陪伊来吃了。去打仗个人回来了，呒没去打仗个人倒侪呒没了。迭个四句是“舂谷持作饭，采葵持作羹。羹饭一时熟，不知贻阿谁。” 第四部分最后两句，是高潮。讲迭个辰光，老人悲从中来。跑到门外头，眼瞪瞪个往东看，眼淚溚溚渧。即“出门东向望，泪落沾我衣。” 现在我模仿陆先生读一遍全诗。古乐府《十五从军征》“十五从军征，八十始得归。道逢乡里人，家中有阿谁？遥望是君家，松柏冢累累。兔从狗窦入，雉从樑上飞。中庭生旅谷，井上生旅葵。舂谷持作饭，采葵持作羹。羹饭一时熟，不知贻阿谁。出门东向望，泪落沾我衣。” 还有一首诗经《关鸠》。我能记得一部分。据讲，对《诗经》个理解，因人因时因环境个勿同而勿同。读《诗经》重在读，贵在读，趣在读。因此，我下面直接学着唱读了。 《诗经》国风周南“关鸠”。“关关雎鸠，在河之洲，窈窕淑女，君子好逑。参差荇菜，左右流之，窈窕淑女，寤寐求之。求之不得，寤寐思服，悠哉悠哉，辗转反侧。参差荇菜，左右采之，窈窕淑女，琴瑟友之。参差荇菜，左右芼之，窈窕淑女，钟鼓乐之。” “关鸠”诵唱好了。据说讲，搿首“关鸠”是描写妙龄少女怀春，翩翩少年钟情，真挚动人情歌。是古代人婚礼上唱个诗歌。我就想，现在个婚礼进行曲侪是外国个。假使有人拿搿能优美个“千古绝唱”谱成中国个婚礼歌曲，有几化好啊！ 还有一首，我比较喜欢个《兵车行》。是杜甫乐府新题。可惜我只会几句。因为觉得好听，就唱迭个几句。《兵车行》“车辚辚，马萧萧。行人弓箭各在腰。耶娘妻子走相送，尘埃不见咸阳桥。牵衣顿足拦道哭，哭声直上干云霄。”。下面还有交关，我勿会唱了。真想能按迭个曲调，拿整篇《兵车行》谱完。希望更专业个先生能来做搿个工作。 古诗词个吟唱，其实以前一直有个。我拿迭个点古诗唱拨我大姐夫听个辰光，伊老先生比我大一折，八十六岁了，就吟唱了两首，伊求学辰光学个古诗。我也放出来听一听。唐代张继个《枫桥夜泊》：“月落乌啼霜满天，江枫渔火对愁眠。姑苏城外寒山寺，夜半钟声到客船。”。另外一首是李白个《下江陵》：“朝辞白帝彩云间，千里江陵一日还。两岸猿声啼不住，轻舟已过万重山。” 《枫桥夜泊》：“月落乌啼霜满天，江枫渔火对愁眠。姑苏城外寒山寺，夜半钟声到客船。”。一首是李白个《下江陵》：“朝辞白帝彩云间，千里江陵一日还。两岸猿声啼不住，轻舟已过万重山。” 苏韻味道邪气足。蛮好听个。 可见古诗吟唱，易学易记，是一个优良个传统，是文化遗产。现在学校里能教唱个少之又少。听过陆先生个课个学长，会诵唱个老先生也越来越少。真心希望迭个传统能传承下去，我真心希望向明中学能个迭方面还能继承陆先生个传承，发扬下去。 对于古诗词个诵唱，我是听隔壁戏听来个。现在看来，除了自己应上个课外，再能有机会自主“选修”一点感兴趣个课，哪怕是听隔壁戏，也是好个，学着个物事反而勿会忘记，说勿定比坐辣课堂里个学生记得还要牢。迭个是勿是可以拨学校有点启发。 古诗词诵唱 王胜中 谢乃传  扫描二维码 |
|
|
