|
上海人个“吃头势”邪气结棍 上海人个“吃头势”邪气结棍，上海言话当中个“吃”，按上海言话个发音读成“喫”（ qie如“切”音）。上海人个“吃头势”真是个老结棍个，好吃个要去吃，勿好吃个伊拉也要去吃。 我伲先来讲讲好吃个物事。 上海是移民城市，汇集了全国各地个民俗文化，特别是苏、浙、徽个江南民俗。单讲饮食小吃文化，上海就熔江南风味于一炉。老底仔，本地人卖擂沙圆、糖粥、熏肠肚子；苏州人卖甘草梅子、盐金花菜、小虾米豆腐干；宁波人卖鸭膀鸭舌头、醉蟹黄泥螺；广东人卖鱼生粥、云吞面……勿仅如此，上海人一年四季侪辣辣吃：新春佳节吃年糕，清明吃青团，端午吃粽子，中秋八月半吃月饼，九月吃重阳糕，十二月初八吃腊八粥，冬至夜吃红烧桂圆烧蹄髈，大年三十吃年夜饭......除了搿些“吃饭”、“吃菜”，上海人还会“吃香烟”、“吃老酒”。 上海人越吃越开心，越吃越有味道，乃末发散式个思维，开始“吃”一眼“看勿见、摸勿着”个物事了：吃价，吃香，吃瘪，吃酸，吃药，吃得开，吃勿消，吃功夫，吃体力，吃生活，吃头塔，吃耳光，吃牌头，吃搁头，吃一拳，吃批评，吃轧档，吃螺蛳，吃豆腐，吃大饼，吃小灶，吃下脚，吃灰尘，吃皮榔头，吃生米饭，吃老米饭，吃木行饭，吃银行饭，吃萝卜干饭，吃辣货酱，吃空心汤团，吃地段，吃房型，吃红灯，吃伊漂亮，吃伊唱得好，吃硬档，吃食堂，吃排档，吃黑暗料理，吃老本，吃墨，吃红笔——听了上头介许多个词语，侬觉着，上海人“吃头势”阿是老老结棍啊？ 辣上海言话里向，吃个物事勿一定侪是好物事，上海言话里拿“挨打”叫作“吃生活”，迭个“生活”个滋味就勿大好受了。小囡最怕做错脱事体让伊个阿爸晓得，因为阿爸常庄会威胁伊拉讲，“小鬼头，要是勿听言话，当心拨侬吃生活”。 “生活”还分“档次”，轻一眼个罚罚立，重一眼个“跪搓板”、“吃耳光”，要是大人讲，“请侬吃竹笋烤肉”，搿种啊算得上是“十大酷刑”之一了！千万勿要以为搿是一道菜，所谓“竹笋烤肉”，就是用竹尺或者别个啥工具打屁股，“烤肉”个肉，自然是人肉，是脱脱裤子，直接打辣辣屁股个肉浪——用一道道风味勿错个菜，来替代打屁股，上海人还是蛮噱头个伐？当然咾，要是侬爹爹火气上来了，直接请侬“吃火腿”（上海言话：踢一脚）也是有可能个；假使“吃价”一眼，侬姆妈寻了外国人结婚，葛末，搿是档次高眼，可以吃个是“外国火腿”（ 上海言话：拨外国人踢一脚），阿拉只好“吃辣货酱”了。 还有一种“吃”，一定勿是啥好物事：“吃牌头”、“吃搁头”搭仔“吃轧头”。“吃牌头”通常是指用辣上级或者长辈对下级、小辈批评个辰光。一般人也得会讲“吃批评”，但是作为一个上海人，讲“吃牌头”、 “吃搁头”搭“吃轧头”，会得显得更加本土。 讲到上海人个“吃”，有一种“吃”，辣外地人听起来“吓丝丝”个——“我老吃伊个！”。当年，谈恋爱个小年轻相当流行搿能言话，一般个级别叫“吃伊（他／她）”，最高个级别就叫“吃煞伊（他／她）”——辣手伐？“吃”还勿够，要“吃到死”！ 经常会得听到搿能讲：“伊（他）对伊（她）勿要忒好噢，样样事体侪肯帮伊做个，有啥办法啊，啥人叫伊（他）吃煞脱伊（她）了。”讲个人觉着老自然个，而听勿懂上海言话个人就像辣听外国言话。虽然每个字侪晓得是啥个意思，但放辣辣一道，却完全是一笔糊涂账。 老底仔，王辉荃搭仔谭义存演出过一个著名个独脚戏《上海小吃》，里向对于上海男女青年个谈恋爱总结个真是邪气好笑，要是勿懂上海言话，还真个以为上海人是啥个侪能吃个：一个“吃”是欢喜，是爱，要是两个“吃”，搿就有另外一层意思了——千万勿要对上海人讲：“我老吃吃伊个”，搿是要成为笑柄个。“吃吃伊”是啥意思？就是欺负，贪人家小便宜，晓得伐？ 上海人还欢喜拿工作叫做“饭碗头”，有个稳定个工作就叫“铁饭碗”，叫人眼热（羡慕）个好工作就叫作“金饭碗”。相应个从事某一职业，就叫“吃搿行饭”。有份好工作，又辣单位里、社会浪混得好、路路通、受欢迎个叫“吃得开”，相反就是“吃勿开”。最受追捧搭注意个叫“吃香”，譬如讲，某某职业交关红火，上海言话里就叫“某某行当老吃香”；当然，人或者商品也可以“吃香”，譬如“现在海归勿吃香了，要MBA了”。 上海言话里还有一个词：“老吃老做”，讲个就是为人，意思是一贯迭能做，通常是指对于勿好个事体老熟练个样子，譬如，某小偷常常要到派出所报到个，人家就会讲，“迭个人是常客，老吃老做了”。 好了，解释了介许多个“吃”，哎，?看看叫，阿拉上海人个“吃头势”结棍？    |
|
|
