闲话“大咖”
作者：陈甬沪
改编：郭莉
朗读：王宇洲
推荐：丁迪蒙
（朗读者近照）
大咖来自吳越小豬03:4810:34
现在个社会，是各种新名词层出不穷，也是啥个“高频词”邪气“网红”个年代。有个词来得快，去得也快，淘汰率老高。大家对新生事物勒勒认识、认知、认可方面越来越多元化，迭个实在是一种好现象。讲起来，我真是孤陋寡闻，第一次听到“大咖”，又拨人家叫我“大咖”个辰光，我还真吃了一惊，呆了交关辰光呢。
三四年前，我应邀参加一只公益活动，以为无非就是到校区鼓动、鼓劲、鼓励，为大学生投身闹闹猛猛个“双创”活动鼓鼓掌叫叫好。勒勒主持人介绍嘉宾辰光，音乐一记头响起来，“大咖”亮相。一片掌声当中，我竟然也是“大咖”！我一时浪向真个懵脱了。“大咖”是啥物事？实在勿晓得！记得我小辰光，社会曾流行过“大卡”搿种讲法，一般叫“大卡”个，好像侪有勿正宗个意思。假使拨人家当做“权威”而叫“大咖”，又实在勿敢当。乃末我要紧解释，我参加个服务“双创”个公益组织，叫“专家志愿团”，但是我自家只是志愿者，勿是专家。事后了解到有种公益活动常庄委托市场化机构操作，我想，迭个或许为了虚张声势，也可能为了贴金。总而言之，啥个叫“大咖”只有伊拉心知肚明。
回到屋里，翻书查典，求教微信圈。“大咖”原来并勿是汉语个“原生词”。解释个意思是：要角儿，大人物。譬如：大咖球员签约，大联盟薪资再攀升；又譬如，某某国际影展，大咖电影人侪力挺。朋友也用微信告诉我，咖，是闽南方言“脚”个谐音， “咖”也是由英文单词cast音译过来个，指演艺圈各类艺人。“大咖”原意是有铜钿、有能力之人，或者讲人物个社会角色。譬如“社会咖”，就是指勒勒社会浪向混个朋友，有圆滑、势利个含义。中国台湾闽南言话里向个“大咖”，也引申为某一方面个达人。台湾还用ABCD为演艺圈明星区分大牌个等级，怪才还拨大家称为“怪咖”。
查来个知识总归觉着太轻，朋友解释也蛮理性，但是勒勒后现实生活中碰到“大咖”，再是栩栩如生、活龙活现。生活中个“大咖”侪博学多才妙趣横生，有个字斟句酌，妙语解颐，有个天宇地幔，异想天开。我有个一道欢喜讲讲诗词个朋友，伊硕士论文选了客座教授个课题。搿位导师名头老大，听说伊是当选过全国性讲师团“网评”个精英，伊自家也自称是某某学科个第一人，是市场标准定义个“大咖”。但是导师学问太深，弟子就难成正果。我朋友个论文就是通勿过，乃末只好请教也是圈内诗友黄老师。黄老师教高中语文，伊看了提纲以后，就是勿相信迭个是“大咖”审过题、定过调个，直截了当一句言话：迭个还勿及微信浪向盛传个“红烧肉”论文个范本！乃末用论文个平衡性、创新性、理论性、逻辑性搭仔引用性咾啥一指点，诗友论文立马过关，还得只优秀！可见，要叫 “大咖”，非黄老师莫属。但是黄老师坚决讲：“我勿做大咖”！
当然，大言不惭、语不惊人誓不休个“大咖”还真有勿少。有一位理工男转型个新型农业人士，提出了“构筑新技术专家指导平台”，用共享模式，来为新型农业人士服务个看法，话音未落，“大咖”马上语出惊人：农业靠专家没用，种田农民就是真正专家。理工男瞠目结舌，过脱一歇反问“大咖”：葛末振兴乡村战略，就勿需要专家咯？
有一趟参加一只国学沙龙活动，一位拨人家前呼后拥个“大咖”滔滔不绝。伊讲，汉字博大精深，譬如“和”迭个字，拆开看就一目了然，人人有饭吃，天下就和谐了嘛……迭番言话让阿拉啼笑皆非。如今，大家侪追求美好生活，社会活动人人侪老多，乃末“大咖”满天飞，连“华威先生”式个“大咖”也越来越多。以“大咖”自居、自傲、自怜、自娱、自乐，翻来覆去侪是套话、大话、诡话、神话，缺失思维、缺乏思路、缺漏思辨、缺损思证个言词、观点，思想，有啥个价值好讲呀？！
所以，阿拉还是自尊、自爱、自勉吧！
注：本文改编自“夜光杯”，原文可点击下方“阅读原文”。
|
