[香港奇景] 黃竹角咀 鬼手岩 | 朱溫 | Fitz • Get Moving

鬼手岩係香港地質公園嘅地標，好多人都係相入面睇過呢舊「奇石」。不過，由於路途遙遠，位置偏僻，所以大多數人都只能隔住個mon睇。

一般而言，去黃竹角咀可以由烏蛟騰起步，行12公里左右，再走回頭路。想挑戰自己體能，就可以由大尾篤出發，沿船灣淡水湖，沿海邊到黃竹角咀，俗稱「環湖出咀」，最後出烏蛟騰走人，全長超過30公里。

最短嘅線，就係由西貢黃石碼頭，租「大飛」或「細飛」(即快艇，大飛可載約20人，細飛載6至7人)，坐船30分鐘直達黃竹角咀，然後依以下路線到烏蛟騰搭小巴走人。

路線資料

• 路線: 黃石碼頭 (船) > 黃竹角咀 > 大嶺 > 跌死狗 > 鹿湖峒 > 上下苗田 > 烏蛟騰

• 距離: 12公里 (黃竹角咀至烏蛟騰)

• 需時: 10小時

• 難度: 4.5星 (5星最難)

 

Google Map缺乏山徑資料，只供參考。行山時必要依據適合之地圖。

注意事項

• 有關租船: 快艇以每隻計算，開船費約$800一隻。人多啲，每人計自然平啲; 天氣唔好，快艇隨時唔可以喺黃竹角咀登岸。通常冬季海浪較大

• 因為冬天吹北風海浪大，風向亦不利登岸。夏天登岸較易，但天氣炎熱。往往難以計劃行程

• 黃竹角咀至烏蛟騰之路線極長，路況不易，需時甚久。無論由陸路以至海路，都必需一早出發。否則就要作夜行打算

• 中途完全無補給，必須準備充足糧食及食水

• 路線要上山落山，必需要體力好

• 山徑無遮蔭，做好防曬

• 該處電話網絡不穩，須定時向親友匯報行踪

• 地質公園景觀為大自然傑作，要小心保護