|
十多年以前，外白渡桥曾经被移出去大修了一年。大家临到伊辰光，深深感到了外白渡桥个重要搭仔可贵。伊日天，交关人立勒桥边个黄浦公园，看到桥去河空个水面，心里七荤八素。文人禁勿住要感叹：“它曾是多少上海人第一幅涂鸦的模特，幼稚的笔画下，仍然保持着高贵的矜持；它曾是多少上海人失恋时第一个聆听者，拥你在坚强的臂膀，用微风拭去你的苍白；它曾是多少游子远眺时的坐标，即使远在他乡，也能感受它传递出丝丝家的温暖。” 外白渡桥1907年开始修造，正好勒勒苏州河下游个河口，黄浦公园西侧，一头勒勒中山东一路、一头是东大名路，伊是上海市区连接沪北、沪东个重要通道，伊也是中国第一座全钢结构铆接不等高桁架桥。伊有两只桥孔，全长106.7米，车行道宽11.2米，两侧人行道各宽3.6米。外白渡桥也是上海市优秀历史保护建筑。2008年搿场大修，是伊百年历史浪最彻底个一次“恢复和加强原有风格”，有16万只钢铆钉重新固定，将近63000只钢铆钉换脱，希望搿能做可以恢复大桥1907年风格。2009年4月，外白渡桥重回黄浦江苏州河口，上海人好像落脱魂灵个心又寻着了归宿，迷失了个记忆又慢慢叫回来了。 外白渡桥个建造历史邪气复杂。1856年，英国商人韦尔斯个“苏州河桥梁建筑公司”，勒勒苏州河浪造了一座木桥，叫做“韦尔斯桥”，过桥要收费，引起了上海市民强烈反抗。1873年，上海工部局勿得勿勒勒“韦尔斯桥”东面外滩公园边头，造了一座新个木桥叫“公园桥”。过“公园桥”勿要交费，所以大家侪叫伊“外白渡桥”。“韦尔斯桥”也勒勒当年拨拆脱了。 1899年，11岁个顾维钧考进上海英华书院。有一次路过外白渡桥，看见一个英国人坐勒黄包车过桥，用鞭子抽打车夫。顾维钧跑上去用英文骂伊：侬算啥个绅士？到了晚年，迭位勒勒巴黎和会拒绝签字个著名外交官告诉伊自家个子女，当年勒外白渡桥看到个一幕，让伊一辈子心里也放勿下来。 1907年，工部局决定拿“公园桥”改造成钢桁桥。外白渡桥个设计方是著名个豪沃思·厄斯金公司。开始工部局想，拿迭只建桥工程交拨外国建筑商承包，但是勒勒拆除原桥辰光碰到麻烦了。原来个木桥上部结构，老便当就拆脱了，但是下部结构是打到河浜最深底下个十几根木质桥桩，实在呒没办法拔出来。外国建筑师用了各种当时世界浪最新个西方技术，侪勿来事，最后工部局只好勒勒全上海范围招标：啥人家有本事拿迭眼桥桩全部拔脱，建桥工程就拨啥人家承包建设。上海本地个“周瑞记营造厂”接下了迭只烫手山芋。据说拔桩搿日天，苏州河两岸侪是来看闹猛个。“周瑞记营造厂”工人弄来两条大船，船舱里向装满泥沙，趁黄浦江水落潮辰光，紧紧夹勒桥桩两侧，然后又勒勒两条船浪向，横放两根又粗又长个硬木方，再用绳子拿桥桩搭木方紧紧捆勒一道。江水涨潮了，水位一眼眼上升，倒脱船浪向个泥沙，木船巨大个浮力，就拿桥桩慢慢叫拔起来了。 “周瑞记营造厂”是上海本地人周瑞庭创办个。伊是抢洋人饭碗，抢洋人风头，邪气有个性个。周瑞庭勿仅修造了外白渡桥、俄罗斯驻沪领事馆、礼查饭店，伊还买进了租界个“1号”车牌。为了勒勒大上海立足，周瑞庭做事体也高调，做人也高调，伊买进个“1号”车牌，但是汽车始终停勒自家车库里向，老少开出去个。 要是能调一个时代，顾维钧也好，周瑞庭也好，侪可能有另外一种生活。当时中国是多难之秋，高调就是伊拉面对故园风雨个处世方式。迭个高调里向，阿拉可以隐隐约约感受到一种身为中国人个倔强。 岁月就搿能过去了，即便是当年响当当个大人物，现在也只不过是大家翻老账个话题了。但是，就勒勒阿拉对历史传奇个反复回味之中，大家是勿是应该收获到更多个意思呢！ |
|
|
