|
作者：沈嘉禄 来源：文汇读书周报 改编：郭莉 朗读：牛美华 编辑：麦小姐 推荐：丁迪蒙 图片来自网络 每年2月21号是联合国教科文卫组织指定个“国际母语日”，迭个“母语日”是为了“促进语言和文化个多样性以及多语种化”。对上海来讲，本地个语言当然是上海方言，但是，有几化人晓得迭个“国际母语日”呢？今年国际母语日个主题是“土著（本地人）语言对可持续发展、和平建设与和解至关重要”，葛末，又有几化人，会从迭个层次个高度，来认识“土著（本地人）语言”的重要性呢？目前，上海方言勒勒社交场合、市井生活场景方面侪大大消退了，迭个是不争个事实。好勒搿些年来，无论是政府部门还是各行各业个有识之士，侪已经认识到方言对上海文化发展个重要意义，正勒勒着力推动上海方言个回归。目前上海方言也终于走进了课堂，民间人士也纷纷努力，借文学、艺术唠啥现代媒介，来推动上海方言个传承、推广、研究，真是“一刮两响”，成绩斐然。丁迪蒙教授就是其中邪气有成就个一位。丁教授近年来致力于上海方言个推广搭仔研究，通过各种培训、讲座以及广播电视节目，身体力行，为上海方言个文化传承，贡献了交关精力搭仔智慧。 上海方言，可以讲是打开魔都大门个一把钥匙。伊个特殊意义就勒勒迭个一点：伊蕴藏了交关用普通话根本勿好翻译、勿好替代、勿好覆盖个内涵，假使对迭眼词语个含义、还有使用规则，呒没一个大致个了解，是勿可能对海派文化有充分、准确个解读个，再就是对上海人个集体性格，搭仔上海人处世为人个基本风格，也可能会误判误读。 最近几年，出版界倒是推出了交关学习上海方言个读本，甚至还有上海话字典。现在，丁迪蒙教授个《上海方言词语使用手册》，更是体现了作者对上海方言学习与推广个务实态度。迭本书有搿能几个特点： 第一，伊个词条搭仔例句，侪可以通过页码浪向个二维码，来听到邪气纯正个上海话读音。 第二，所有词语，侪是通过音序来排列个。所以，只要侬发得出音，就可以勒勒有关个声母序列里向，寻到跟伊对应个词语。 第三，发音相同个词语，侪集中勒一道，迭个对读者来讲，检索起来就交关方便了。 第四，为每个词语个解释，至少提供了三只勿同语义环境下头个例句，让读者可以从多种角度来理解迭个词，方便大家勒勒日常使用过程中更加准确个掌握迭个词语。 第五，整个《手册》有大量例句。除了可以帮助读者练习上海方言个发声，还可以帮助读者了解各个词语勒勒勿同句子里向个语调。根据我个了解，有勿少外地人、外国人，勒勒讲上海方言辰光，总归有眼“滑稽”、有眼“怪腔”，之所以会得搿能，交关侪是因为发出来个语调不对，乃末就呒没上海腔调了。 最后还要大大点赞个是，著名电视节目主持人陈燕华，是丁迪蒙个中学校友，伊友情加盟，为《手册》部分词条做了纯正、清脆个“上海闲话”音频，伊亲切动人个声音，正好搭《手册》个精彩内容相得益彰。所以《上海方言词语使用手册》得到了社会广泛关注，大受欢迎。 |
|
|
