|
作者：李士封 沪语改写：徐琏 朗读：叶雁 推荐：丁迪蒙 点击下方收听音频，时长6分54秒。 有余里是位于上海城隍庙附近个百年老个石库门建筑。上个世纪三、四十年代开始，一些从苏南搭仔浙江宁波、绍兴一带个人到上海来谋生，从事各行各业，有红帮裁缝、木匠、船上浪向个厨师、麻袋店职工、还有水产行个伙计，伊拉侪租住勒有余里，过普通小市民个日脚。 我曾经勒有余里个一号里登过，对有余里个记忆邪气个深。 上个世纪二十年代，我祖父母一家三代人居住勒一号里两上两下个整幢楼房。伊个辰光，祖父勒十六铺鱼行里手握销售大权，收入邪气丰厚，算是殷实人家。 1937年8月13日，日本人占领上海，阿拉全家门逃难到了宁波乡下头，两个号头以后回到上海个辰光，城隍庙附近已经成为了难民区，我屋里厢所有个家生侪拨洗劫一空。1941年以后，局势逐渐安定，有余里又陆陆续续个住进了其它房客。记得有余里三号曾经拨日本飞机轰炸，留下来残墙断壁，住勒两户贫困人家，靠做手工生活过日脚。两号过街楼一户个男个，勒电车公司工作，年轻夫妻有一个男小囡，可以列入小康之家。 四号里有一户，女主人叫桂香，伊个丈夫是一名技工，邪气勤劳，日脚也还算过得过去。住勒东厢房个是朝清一家，伊个母亲娘小人生得比较多一眼，人邪气和善个，爷呢，是以画画养家糊口个，摆到现在，应该称作为国画大师了，弄堂里向大家侪叫伊李先生，是有余里唯一一个文化人。 五号里向住勒一家大户, 人家侪称伊阿福大块头，伊有四个儿子。四个儿子走个路勿同，前途也勿一样。一个儿子勒电车浪卖票；三儿子勒1949年夏参加了南下服务团，成为了有余里最早离开家庭个小青年；小儿子却是轧了坏道，走了弯路。 六号人家个大门是经常关闭个嗨个，侪从后门进进出出，房主是一个人家叫伊“舅妈”个，人邪气精明强势，邻居侪要让伊一步，伊个先生是一名职员。六号里还有一个面部拨烧伤个女小囡搭仔一个因为感染，鼻头开天窗个女个，邪气残古个，“舅妈”倒是经常拨伊拉一些帮衬。 上个世纪四十年代，学生子放学回来，就勒弄堂里向打弹子、滚铜板、刮香烟牌子；女小囡白相跳房子、踢踺子、接小沙袋。热天介放暑假，斗才即邪气闹猛，一只才即盆可以有七八个人围勒海看；欢喜象棋个，一边乘风凉一边着棋。辛苦了一日天个当家人，摆开小台子，买点猪头肉搭仔油汆花生米，吃吃老酒解解乏。回味老底子个弄堂生活，真个是别有一番风情。 随勒时代个变迁，有余里个上一辈侪已经相继离世，三四十年代出生个也已经是老了。过去个有余里, 早浪向天蒙蒙亮， 粪车就推进了弄堂里，听到环卫工人个大嗓门，家庭 主妇勿论是大热天还是大冷天，侪要爬起来，拎仔马桶出门，然后开始刷马桶个晨曲。伊个辰光，买小菜也要起得邪气早个，因为凭票个品种要排好几趟队。夏天介，弄堂里向坐勒一群妇女，一边拣小菜，一边茄山河，讲眼张三李四个琐碎事体，也有得议论人家私生活个。谈到烧饭、汏菜、汏衣裳，个就更家闹猛了。六、七个平米个灶披间，有6只煤球炉，共享一只自来水笼头，大家侪抢勒海汏菜，汏衣裳，邻居之间勿和睦个事体经常发生，不过伊个辰光个邻居隔壁勿记仇个，没几天，相互之间就又说说笑笑了。 现在个有余里，显得有眼冷清了。住勒里向个人，老大一部分是外来人员，日里向侪忙于生计，弄堂里向缺乏生活个气息。 有得百年历史个有余里是二级旧里，列入老城厢旧区改造个范围，目前已经完成了旧房征收工作。随勒时间个推移，有余里勒勿久个将来，就会得消失勒大家个视线当中，但是，伊会得以崭新个面貌重新出现，阿拉邪气期待个。 （朗读者近照） 来源：“吳越小豬”微信公众号 |
|
|
