 我生命中的淮海路 作者：苏秀 沪语改写：丁迪蒙 自从1952年，我从虹口东长治路搬到长乐路三角花园附近，到1984年再搬到永嘉路译制厂新建个楼，直到2004年离开市中心，我勒淮海路附近整整生活了52年。从青年到老年，我生活个方方面面，侪搭淮海路紧密相连。 首先是襄阳公园，离屋里邪气近，节假日是小囡最欢喜去个地方。到现在我还保留勒海阿拉夫妻搭小辰光个子女，勒襄阳公园拍个照片。 …… 伊个辰光上海几乎所有个电影院礼拜天个上半日，侪有学生专场，票价一律五分洋钿。从我屋里出门呒没走几步路，就是东湖电影院。顺牢淮海路往东再走两条马路就是国泰电影院。小囡想看电影邪气方便。 国泰往东是一家老大个鞋店。搿家店做个鞋子，式样邪气精致。到2006年，《艺术人生》节目组请阿拉到北京去做节目个辰光，我想买双新鞋子，还从老远个柳州路回到搿搭来买。再往东则是一家老大个绸缎店。搿家店勿光卖高档个绫罗绸缎，也卖手工织个蓝花土布。我邪气欢喜用搿种布料做长袖子衬衫。 再往东就是上海市电影局个局机关了。五、六十年代电影局个小礼堂常庄放电影、作报告。伊个辰光，所有刚刚拍好个片子，勿管是上影厂自家拍个，还是北影，长影个，侪会放拨全局系统个创作干部看。国庆十周年，上影拍了十部献礼片，头搭尾巴两部是《聂耳》《林则徐》，侪是郑君里导演，赵丹主演个，拨大家戏称为“红烧头尾”。 电影局笡对过有一家“宝大西菜馆”，大菜每客一元洋钿，包括一盆汤，一道主菜，主菜每日天是勿一样个，有辰光是一块炸猪排，有辰光是一客罐焖鸡，有辰光是一客罐焖牛肉。还有一小块奶油，一小碟果酱。面包嘛随便侬吃多少。相当于现在西菜社个套餐伐。伊个辰光我搭张同凝个工资侪是103元，李梓搭赵慎之也有八、九十元。花一元洋钿吃次西餐，还勿算忒破费。所以，每当电影局有活动个辰光，阿拉就结伴去开次洋荤。 我个先生身高有1米80。勒学堂里读书个辰光，就是校篮球队个队员。上海解放个辰光，伊已经30岁了，仍旧是伊拉工业部第二设计院篮球代表队个成员。我呢，是阿拉电影局乒乓球代表队个成员。60年代前期，吃好夜饭以后，阿拉两家头有辰光会得到淮海路浪去散散步，顺带便到陕西路个体育馆看看，勿管有啥比赛，篮球、排球还是乒乓球，侪会用五分、一角买票看一场。 记得陕西路再往南，还有一只戏曲学堂。学堂个小礼堂常庄有演出个。大部分是学生子个实习演出，票价也只有两、三角洋钿。李炳淑咾啥还是学员个辰光，我就看过伊，还有杨春霞、华文漪咾啥演个折子戏《白蛇传》。有一趟居然还看到了俞振飞、言慧珠唱个昆曲《断桥》。伊拉两家头侪是京昆界个大腕噢！ 我个三个小囡，侪勒淮海路或者淮海路个附近读书。长子是淮海中学个，就勒淮海路、襄阳路路口浪。次子勒上音附小师学钢琴，也勒淮海路浪，搭淮海中学只隔了一条汾阳路。囡儿勒市二女中，离淮海路也勿过一步之遥。伊拉侪勒邪气理想个学堂读书。 …… 现在，因为朋友要聚会，我偶尔会回到淮海路，但是记忆当中个淮海路已经完全呒没踪影。当年搭淮海路相关个喜、怒、哀、乐，只有到梦里向去寻了。  |
|
|
