|
寻找儿时个记忆 作者：唐培良 改写、朗读：顾敏 推荐：丁迪蒙 点击下方收听音频，时长4分59秒。 我一家头兜兜上海个老城隍庙，想试试看寻寻小辰光个记忆，呵呵，几乎是呒没了。看到有条“三牌楼路＂，路名是老个，但是完全勿认得了，走走看伐，看看是勿是还有一点点印象。 勿知勿觉走到了学院路、寻到了218弄。弄堂口有只倒马桶站，还勒海。旁边有只仓库，一个人勒装货，大门浪有块牌子写了（原上海塑料十厂）还勒记忆里。一直往朝里向走，搿条几十户人家个小弄堂，呒没了小辰光个闹猛，也勿看见人影子。有个八十多岁个老太太坐勒门口头，看见我是陌生人，就走过来就问我寻啥人。我认出伊了，叫了声“宝珠姆妈”， 老太太讲伲屋里勿订报纸个，叫我走。我讲，我是8号罗家阿婆个外甥，侬勿是宝珠个姆妈嘛？讲个辰光，邻居阿姐雅仙跑出来了：噢哟，迭个勿是阿良嘛？哦，总算是有人认得我了。 乃么，王家姆妈，李家阿嫂，侪出来了：“小阿良啊，介大啦，还好，还好，还是认得出来个”。勒伊拉个眼睛里，我永远是伊个勿大活络个老实头小阿良！ “侬是唱戏阿姨，勿好意思，我一直勿晓得侬叫啥名字，只晓得侬是阿拉弄堂里向最漂亮个唱戏阿姨。” 伊笑了，笑得邪气开心，“我就欢喜人家叫我唱戏阿姨”，一面讲一面手里向动作就做起来了，就像勒舞台浪说台词，尽管伊已经八十多岁了。 啰啰嗦嗦聊了一个多钟头，晓得现在住勒此地个侪是老人，年纪轻个侪搬脱了，老人留勒海等拆迁。雅仙个姆妈搭我讲，此地靠城隍庙，要保持传统，勿好造高楼，开发成本忒高了，五六个平方个一间小房子，里向个户口倒是有得四五只，拆勿起，呒没开发商愿意来造房子，勿晓得要屏到阿里一天了。搿搭算是上海城区里向最最破烂个房子了，抽水马桶呒没，汏浴设备呒没，搿眼老人一个大冷天也汏勿着一趟浴。 伊拉搭我讲，一辈子也过来了，就搿能了，也没觉着啥勿好，只要子女过得好，就样样侪好了。听了搿眼闲话，一阵心酸。其实我也晓得，伊拉并勿是没办法去蹲好房子，也勿是子女拿伊拉厾勒此地勿管，是伊拉离勿开此地，离勿开搿搭个乡邻情，假使离开，伊拉会觉着邪气孤独。 要走了，伊拉搭我讲，小阿良，有机会常庄来看看噢，勿晓得侬下次来，阿拉还有几个人勒海。是个呀，我外婆是93岁走个，雅仙个外婆是101岁走个，我讲，㑚侪好活过100岁个，我会得常庄回转来看看个。 （朗读者近照） （作者近照） 来源：“吳越小豬”微信公众号 |
|
|
