  作者：朱海洪 沪语改写：边秦翌 沪语讲述：朱友好 “广泰”是一爿烟纸店，对勒马路有一只曲尺形个玻璃柜台，柜台里向摆了一眼香烟、自来火咾啥，靠墙立勒一排橱窗，陈列一眼蚊香、蜡烛搭仔针头线脑个小物事。柜台个旁边是过道，供人进进出出个。店老板定定心心个坐勒矮凳浪，有人来买物事就做做生意，呒没事体个辰光呢，就看看风景。“广泰”个风水邪气好，总归会得吸引一帮子人，勒勒此地香烟吃吃、山河嘎嘎、野眼望望。 有一日，还俗之后个小“尼姑”跟牢仔搿个男青年从弄堂口有说有笑个走出来，店老板看牢仔伊拉个背影自说自话，讲了句：“小尼姑还俗，终于成家了”。只看到一对依依倩影，悠悠的走远了。 “广泰”老板收回眼光，勒末生头问一眼勒勒嘎山河个人：“酱园弄杀人个案子，㑚侪晓得伐？” “酱园弄杀人案啊，啥人勿晓得啊”！搿眼人七嘴八舌个讲了伊桩奇案。 酱园弄杀夫案，是民国时期个四大奇案之一，案情曲折离奇，曾经轰动上海滩。我小辰光经常听人家讲起过，必过侪是零零碎碎的闲话，而且多数是捕风捉影，断断续续连勿成篇个。后首来，看到有关个文字记载，再有了比较清晰个轮廓。 搿歇稍微归拢整理，写下来搭大家分享分享。 酱园弄杀夫案，发生勒1945年。 凶手个名字叫做周惠珍，当时30岁，是丹阳人。伊从小爷娘就死脱了，呒没读过书，是由亲眷抚养长大个。9岁辰光到了上海，卖拨一家大户人家做小佣人。17岁个辰光，由主人作主许配拨詹云影，21岁正式结婚。周惠珍嫁拨了詹云影之后，按照老法，就叫伊“詹周氏”了。 詹周氏结婚后之跟牢仔男人搬到酱园弄85号后楼居住。 酱园弄，是新昌路浪勒勒青岛路搭仔新闸路之间个一条弹硌路弄堂，从新昌路可以横穿到黄河路。之所以叫伊酱园弄，是因为上海滩个酱园大王张振新三兄弟曾经勒此地住过个。 詹周氏个男人詹云影又长又大，绰号叫做“大块头”。大块头老底子是勒勒典当行里向做事体个，收入应该还勿错。呒没想到，刚刚结婚两个号头，伊身边就有了另外个女人了。詹周氏当然是勿肯卖账个，乃末大块头对伊是又是打又是踢呀。从此之后，詹周氏是常庄拨大块头骂咾打，有辰光是连得饭也呒没吃。呒没多少辰光，大块头又开始去赌博了，迷得来连饭碗头也拨敲脱了。再后首来，索介是没日没夜个混勒牌桌浪向，连得屋里也勿要了。难板回转去一趟，勿是睏觉就是打老婆。屋里又呒没其他个收入，詹周氏只好到纺织厂去做女工了。大块头晓得之后邪气光火，骂伊出去打工是假个，寻野男人再是真个，打得老婆头破血流。詹周氏呒没办法只好拿工作辞脱，靠向隔壁邻居借眼钞票来过日脚。但是，日脚一长，只借勿还，邻居咾啥就勿开心了呀，开始翻伊白眼，浪里浪声骂，也呒没人再愿意借拨伊钞票了。搿能介个日脚真个是呒没办法过下去了。走投无路个詹周氏去吃“来沙儿”自杀，结果还勿成功，拨邻居伊拉送到了医院里去救回来了。 真个罪过八腊，呒没办法活、死又死勿脱，詹周氏实在是熬勿下去了，伊终于爆发了。1945年3月20号凌晨3点钟，詹云影从外头回转来，又是老样子，对牢仔自家个老婆先是一顿臭骂，挨下去拳打脚踢，打得吃力了就自家倒头去睏觉。詹周氏觉着是万念俱灰，就去寻了把切菜刀，朝牢仔大块头就斩，一刀又一刀，一直斩到搿个男人血肉模糊了，又分成功十六块。住勒伊拉楼下个二房东王瞎子——其实伊个眼睛并勿瞎啦，只必过是高度近视而已，伊听到楼上向大块头发出哇啦哇啦个叫声，就朝楼浪向问了一句：“㑚勒做啥啊？”詹周氏讲：“呒没啥事体，伊又勒做恶梦了”。王瞎子也就勿在意了。过脱了一歇歇，天花板浪开始嘀嗒、嘀嗒往下头滴水了，王瞎子眼睛是勿好，鼻头倒是邪气灵了，伊闻出来有得血腥气，快点搭老婆一道到楼浪向去看，就看到詹周氏披头散发个坐勒地浪向，邪气平静个讲：“我拿大块头杀脱了。” 朗读者 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
