 上海人个住房（上） 作者：王汉梁 改编：丁迪蒙 朗读：张正风 葛讲起上海人个住房啦，大家个第一印象，是小塔仔轧。 搿的确个，多少年来，上海人个住房，确实是相当个紧张。 虽然讲上海这个城市，是从一个小渔村演变过来个，但是，由于伊有各种得天独厚个优势，发展到后来，就成为了华洋共处、融汇八方个国际大都市。伊息辰光啊，有人讲，上海遍地是黄金啊。所以，来自五湖四海个三教九流，各种各样个人，侪争先恐后，朝搿块宝地翁过来了。人来得比造房子快呀，再加上其他各种个原因，上海人个住房条件当然就邪气紧张了。 不过呢，也勿是一概而论个。旧上海个搿点大亨、富商，一眼要风有风、要雨得雨个上流人士啊，伊拉大部分侪住勒公馆、别墅里向个。搿种公馆、别墅个建筑呢，一般侪是有得外国个建筑设计师，勒二十世纪二、三十年代设计建造个。式样搭仔风格，侪是相当个优雅，里向个设备搭仔摆设呢，是中西兼备个，既舒适、又高贵。迪种建筑啦，主要分布勒勒上海个西区，所以呢，哀面搭就形成了上海所谓个万国建筑博览会。 搿点公馆、别墅啊，平常辰光大门紧闭，难板，从花园个高高个竹篱笆里向呢，飘出来一阵阵优雅个钢琴声。假使大门慢慢叫个开开来个闲话呢，搿里向一定是有小汽车开出来了。 上海个花园洋房虽然勿少，葛普通老百姓是呒没份个。一般个中、小老板、高级白领、还有得知识分子咾啥搿种中产阶级，还有呢，像店员、职员，搿种小市民，大部分侪住勒石库门房子里个。 搿种石库门房子，勒勒上海个复盖面邪气广、数量也邪气多。伊是融汇了中西建筑当中个各种元素，独创出来个一种式样。石库门房子，也邪气适合，当时从江苏、浙江、安徽来个新移民伊拉个生活习惯搭仔经济能力。 石库门房子，往往有两扇蛮大蛮高个黑漆大门。门浪向呢，各有一副铜环，搿是拉手，也可以呢，用来敲门个。推门进去，里向是一只小小个院子，伊是由高高个围墙搭仔房子围起来个，像一口井，抬头看，头顶浪向是天，所以呢，跌个小院子啊，就叫天井。天井呢，可以朗哴衣裳、晒晒被头，热天介呢，可以乘乘风凉。 走过天井，再进去呢，就是客堂间。因为勒勒底楼，外头个围墙呢，又比较高，所以客堂间啊，是比较暗个。客堂间个旁边呢，是叫做厢房。 石库门房子个层高啊，比现在个迪种新楼盘个房子要高敞得多。地面到天花板个距离也是蛮大个。有种人家呢，就勒天花板下头啊搭只阁楼，用小扶梯爬上去，哎，上面啊好睏好几个人唻。葛就算勿睏人呢，堆堆物事倒也蛮好个。尽管天花板蛮高，因为呢伊没夹层，天花板啊直接就是楼浪向个地板，所以，楼浪向小囡奔跑个声音，痰盂罐里小便个声音啊，下头侪听得来是清清爽爽。 楼梯上去，勿到两楼，勒勒楼梯个转角个地方，有一扇门，进去呢，是一间小房间，迭间小房间啊，就叫做亭子间。搿只小房间呢，上头是晒台，下面呢，是灶披间，窗门呢，是朝北个，所以冬天冷、夏天热，葛房租呢，就比较便宜了，搿个呢，也比较适合一家头独住个。葛勒三十年代个辰光啦，一点穷文人，勒勒得发之前啊，大部分侪住过迭种亭子间个。 老式个石库门房子里向呢，是没卫生设备个。住勒里向个居民啊，侪是要用马桶个。早浪向啦，每家每户倒好马桶以后呢，要用马桶甩洗来清洗马桶，会得发出来一种独特个声音，回响勒勒弄堂里。 有条件独家人家住一幢石库门房子个呢，葛是比较有钞票个人家了。否则呢，就只好搭别人，大家佮住。葛末张家呢，住前楼，李家呢蹲厢房，王家住亭子间，方家蹲三层阁，迭个是上海滩浪最常见个现象。就是所谓个“七十二家房客”。 本公众号最近发布的原创： 图片来自网络 |
|
|
来自： 渺渺m69vnzsah9 > 《待分类》
