 沪语朗读：渺渺 游踪：七分游伴三分景 作者：吴翼民 来源：香港文汇报（2018年12月22日） 改编、推荐：丁迪蒙 朗读：渺渺 游伴比风景更重要，迭个是我经过若干次旅游以后，得出个真切感受。最近搭几对老同学夫妻结伴游广东香港，又一次证实了搿条铁个规律。 港珠澳大桥胜利通车，老同学们侪跃跃欲试，要去尝尝新，同时看看改革开放个起源地，看看南方大城市，看看邪气有特色个南国山水。所以有一位同学“揭竿而起”，就有了好几位老同学立即响应，尽管我勒勒外地，也举手报名，因为我觉着无论是尝新还是念旧，跟老同学结伴看大桥、游岭南，实在是妙不可言个好事体。 果然，旅游过程因为是老同学聚会，就变得色彩绚丽，车浪船浪，只要一讲起当年同窗辰光各种情景，大家侪会熬勿牢抚掌大笑。同学个夫人还勒勒边头加油添醋，拿故事个续集讲下去，每个人个经历就搿能惟妙惟肖个展示出来，也印证了改革开放四十年，搭每位同学带来翻天覆地个变化。阿拉迭个一茬六六届高中毕业生，经历跌宕起伏，大阖大开，总体也就是跟上了时代节拍，捉牢了青春尾巴。蛮多人得益于恢复高考，成就了一番事业，现在得以安度晚年。呶！有机缘出远门旅游，就是顶好个例证。 同样，十年前阿拉搿批老同学也侪带仔夫人，畅游湖北，登武当、探神农、看大坝、逛武汉，还循了荆州、襄樊搿条线路，游历了“三国”遗迹。 回程火车浪，老同学积极评说搿趟旅游过程个风景名胜搭仔兴奋点，有讲山水个，有讲名胜个，有讲地方风物个......我倒是讲：“搿趟旅游最大兴奋点是游伴，游伴胜过了山水名胜，胜过了地方风物。假使按比例来讲，应该是七分游伴三分景！” 老同学们听了先侪是一呆，回过味道来，侬一言我一语个评说起来，最后一致同意了我个观点：旅游游伴个重要性，胜过风景名胜，游伴是旅游中最佳“风景”。 就讲欸趟旅游，由于是老同学独立组团，就一眼呒没拘束，一路浪，无论是动车车厢、旅游大巴还是客房餐厅，侪是讲勿光个言话、唱勿光个歌，称呼侪是直呼其名，要么索介拿乳名绰号挂勒嘴巴浪；官场职场事体一概勿讲，只拿学生时代趣事轶闻寻出来玩笑回味，包括各自个家长里短、养生之道、烹饪技艺......有种故事细节已经记勿得了，拨啥人重新提起，一车人开心大笑。侪已经年逾花甲了，偏偏大唱学生时代歌曲，包括俄罗斯歌曲，搿副忘情个腔势，弄得导游姑娘又惊奇又感慨。 搿种旅游氛围中，随便啥景物侪大大增色，碰到啥勿顺心侪化为乌有，团队餐勿好吃，就添菜加汤，还常庄吃点小老酒；啥人沿途买了水果土特产，全部等分共享；看到景点可以合影，就一呼百应，各就各位，摆好姿势，导游姑娘手臂浪一挂就是十几只照相机，一只一只拍摄，拿迭个一刻个欢乐定格下来；啥个景点有好个土特产，就一道选购，各自个夫人发挥优势，讨价还价，跟当地人讨价还价，简直是旅途中一大情趣，倒也勿好讲侪是因为吝啬小气...... 有人要讲，夫妻搭档、同学佮群旅游，毕竟难得，尤其是中学时代老同学聚勒一道，纵情山水个机缘勿会太多，旅游一般侪是跟萍水相逢个陌路人结伴个。也好！就算是陌路人，也可以结成合适个游伴。环境侪是心情化出来个，游伴难道勿好也由心来造就么？我就多次跟陌生人一道出游，一趟下来居然结成朋友，现在还是常庄往来。迭个就要看各自个缘分，各人个心情搭仔姿态啦。 七分游伴三分景！ 点以下文字即有精彩回放： 我有一个梦想 图片来自网络 |
|
|
来自： 渺渺m69vnzsah9 > 《待分类》
