 沪语朗读：郭莉 诗是最佳“清俗药” 来源：新民晚报 作者：李佳 沪语改写：丁迪蒙 朗读：郭莉 鲁迅先生个《病后杂谈》邪气有趣，以至于当我读到伊写个“生一点病，的确也是一种福气”“秋天薄暮，吐半口血，两个侍儿扶着，恹恹的到阶前去看秋海棠”迭恁个句子，难免有眼心向往之。 然而，向往归向往，倒也觉着“吐半口血”忒凛冽了，未敢期待。更何况鲁迅先生还讲：“‘雅’要有地位，也要钱……至少手头有一点现款，不至于躺一天，就饿一天。”反观我自家个经济实力，只好就此作罢。等到辰光过得长了，也就绝了迭个“念想”；再讲，我个身体又邪气个好。 没想到，今年初春，我竟然真个生毛病了，还去住医院了。每日天输液就要输八袋，勒委屈之外，突然多了一份暗暗叫个开心：嗨，可以安安心心读眼书了呀！ 读点啥呢？鲁迅先生讲，读《世说新语》。搿本书倒实在是有趣个，蛮适合勒生毛病辰光读，看看搿眼魏晋时代个“奇葩”，勒心里向偷笑，痛快个！但是，对于我好像就勿大合适，因为书忒厚了，我实在是力不从心。 葛末就寻眼“快乐”。最好个“快乐”是人世间个事体，葛么就读小说吧。王小波个《红拂夜奔》、刘慈欣个《流浪地球》、张一枫个《借命而生》……拿迭眼“计划名单”浪个书一本本读过去，速度快得吓煞人，一天可以读光一本甚至读个几本，真个是乐在其中、其乐无穷呀！ 快乐之余，顺带便也要洗涤一番灵魂，毕竟勒杂务当中泡了介许多辰光，勿晓得染了多少个俗气。黄庭坚黄山谷搿恁讲：“世有百病，唯俗不可医。”有道理个。但伊讲个是“骨俗”，要是“骨清而气俗”者，尚还有救。我自认为自家是属于后者，搭自家开个“药方”就是读眼诗词。诗词是最好个“清俗药”。但是，平常用，总归蛮难达到最佳效果，大概是因为俗事缠身、以致于人心慌慌。读诗词，最是自家个事体，读个辰光只有自家搭仔诗词是最好个；心勿静，再好个诗词读勿进去。而病床浪个人，心是最静个，普天下个事体，除脱养病以外，侪搭自家无关。因此，我要紧去拿压箱底个《唐诗分类品鉴》《唐诗三百首》翻出来读。 唐诗个美，绝勿仅仅是“床前明月光”，其中蕴含了多种层次，就像卢仝笔下头个“七碗茶”，每一泡个滋味侪勿同，只有慢慢叫泡、慢慢叫品，再能够拿滋味泡出来。终至“两腋习习清风生”。勒病床浪，我慢慢叫个读诗词，品词酌句，虽然勿及“七碗茶”个境界，但总可以达到“三碗”“四碗”，因此觉着是口舌生津、意兴盎然。 更巧个是，住院期间，搭我亦师亦友个美女作家陈晨从北京寄来了一本诗集，搿是现代诗人程鹏个新书《装修工》。搿能一来，新诗、唐诗勒小小个病房间里汇合了，实在是雅缘；而拿唐诗夹勒新诗一道来读，就更加有趣、有味道！ 读倦了，慢慢叫拿书搁下来，顺牢病房间里向唯一个窗门望出去。虽然是隔了一道窗门，倒好像是跟外面隔山、隔水；虽然天色勿大清、地也勿大明，但是依然可以感受到春天个脚步，勒静悄悄个走近了：空气里个雨点，是春雨；轻轻拍打窗门个风，是春风。于是突然觉察，搿场毛病，真个是巧呀，齐巧赶上了春天来读诗，搿一读，春天勿仅仅是开放勒现实世界里，更是进到了心里向去了。 真是“读诸集宜春，其机畅也。” 往期回顾： 图片来自网络 |
|
|
来自： 渺渺m69vnzsah9 > 《待分类》
