 沪语朗读：刘芳华 朗读者 闲话人民广场 来源：新民晚报 2019-03-20 作者：杨忠明 沪语改写：郭莉 诵读：刘芳华 推荐：丁迪蒙 上海人民广场迭块地方，勒勒开埠之前，不过就是一片水田。1848年英租界扩张到了此地，修了护城河，筑起了泥城，搿个就是“泥城浜”。清朝咸丰四年，英国人勒勒泥城浜附近开辟了只新个公园，还修了跑马场。 从前辰光个泥城浜，南面从洋泾浜开始，一路朝北，顺牢现在个西藏中路，最后流到了苏州河，长度大约是1.4公里。1897年个上海老地图，北海路口有“南泥城桥”，南京路口有“泥城桥”，牛庄路口有“北泥城桥”。现在常庄看见个老照片，里向个苏州河南面顶靠北个泥城桥，估计是后来造个。晚清辰光，泥城浜个西边，清军造了三座营房，还设置了一眼军事设施。1854年小刀会起义，搭英国、美国个军队，还有清朝个军队，侪勒此地打过仗个，历史浪称作“泥城之战”。迭眼侪是搭人民广场搭界个旧闻了。 有张旧照片显示，勒南京西路新昌路个路口，也就是从前个梅白克路搿搭，养马房门前头有两只石翁仲。迭个石头人啥地方来个呢？据说1861年建造跑马厅个辰光，圈进来个土地浪向有座乾隆年个古墓，上海跑马厅大班马勒，就从别场化买来两只石翁仲放勒墓前头，乃末古坟、石头牌坊、石头人形成为了一景，石翁仲后首来拨移到了新昌路口，引来交关善男信女烧香拜佛，南京路一时头浪真是烟雾腾腾啊。 人民广场也是学生子捉金火虫、捉药胡翅，搭仔捉才即，跘野猫猫、翻跟斗个好地方，老年人呢，就勒此地打打太极拳。年轻人还凑成了一支“人民大道足球队”，有固定个辰光，勒此地踢球比赛。广场个南面是新成木箱厂堆木板个地方，小学生侪欢喜勒此地爬上爬下白相。有一年个大热天，我也跟仔弄堂里个小囡一道，铺张草席睏勒人民广场。想勿到半夜里落场大雨，大家侪要紧逃到屋里向…… 1958年，广场浪向从四面八方收集来个废旧钢铁堆成了山。1959年，勒广场东南面搭了只布头大棚，里向演出杂技节目，差勿多有三年辰光，还有蔡少华“飞车走壁”个精彩表演。热天式，周边还有卖腌金花菜、大麦茶、小馄饨、麦芽糖，还有鸽子、才积咾啥个小摊头。从前老弄堂里向，小鬼头寻相骂，总归是搿能个一句言话：勿要搞唻，阿拉两家头到大道里去对开，哪能？ 人民广场西面是威海路个路口，有幢老洋房花园里也堆了勿少木板。热天介到了，几棵老桑树结满了紫红颜色个桑果，勿少小鬼头常庄爬上去采桑果，吃得手浪向侪是紫颜色！附近还有一块三角地绿化带，旧上海辰光，搿搭有蛮多木头行，柴爿店、煤球店咾啥，还有苏州人毛养浩拉屋里向个小别墅。 上海老中医陈存仁开个中医诊所个老房子，就勒勒广场西北面个威海路口。陈医生曾经冒仔危险，爬到跑马厅钟楼个顶部，看到日本人投降前头，勒兵营里向，一副鬼哭狼嚎个混乱场面。 广场南边个“八层楼”，从前叫做“年红公寓”，也就是跑马厅公寓，上个世纪60年代，人造小太阳灯就是装勒八层楼个楼顶浪向，灯光拿人民广场南面一只角照得像日里向一样，轰动了全上海。 到了国庆节，人民广场一定会得有造造反反个人到搿搭来参加庆祝活动，宫灯下头会得安装大红颜色个流苏飘结，一副喜气洋洋个场面。乃末小鬼头也侪溜到马路浪向来轧闹猛来了。欸歇辰光，上海顶顶闹猛个地方，当然就是人民广场搭仔外滩了。 往期回顾： 图片来自网络 |
|
|
来自： 渺渺m69vnzsah9 > 《待分类》
