 沪语朗读： 高仁 朗读者 剖视上海人个尴尬（一） 作者：余秋雨 沪语改写：丁迪蒙 近代以来，上海人一直是中国一个邪气特殊个群落。上海个古迹呒没多少好看个，到上海旅行，领受最深个就是熙熙攘攘个上海人。伊拉有交关心照不宣个生活秩序搭仔内心规范，形成了一整套个心理文化方式，讲得响亮一点，可以称之为“上海文明”。 一个外地人到了上海，勿管勒公共汽车浪，勒商店里，还是勒马路浪，侪会得老快就会拨认出来，主要个勿是外貌搭仔语言，而是勿能贴合搿种上海个文明。同样个，几个上海人到外地去，往往也是显得邪气弹眼，即使伊拉并勿一定勒讲上海闲话。 全国侪有点离勿开上海人，又侪勒讨厌上海人。各地个文化科研部门往往缺勿了上海人。上海个轻工业产品用起来也勿错，上海上交拨国家个资金也邪气可观个，但是，交朋友却千万勿要去交上海人。为啥？ 上海人出手勿大方，宴会台子浪吃勿了几杯酒，搭伊拉谈点啥却是要多动几分脑筋，到伊拉屋里去住宿更加是要命，邪气拥挤又处处要讲究。搿能介个朋友哪能可以提交呢？ 上海人可以拨骂个由头比上头所讲个还要多得多。譬如，勿止一个政治恶棍是从上海发迹个，侬上海还有啥个闲话好讲？勿大关心政治个上海人就吓丝丝勿再讲啥，偶然勒私底下会得轻轻叫讲：”伊拉啥地方是上海人啦，侪是外地来了呀！但是，究竟有多少道道地地个上海人？真正道地个上海人就是郊区个农民，而上海人又看勿起“乡下人”个。 因此，上海人陷入了一种无法自拔个尴尬。搿种尴尬远勿是从现在开始个。照我看来，上海人始终是中国近代史开始以来最最尴尬个一群人。 剖视上海人个尴尬，是当代中国文化研究一个沉重个课题。 上海前两年勒徐家汇附近造了家豪华个国际宾馆，叫华亭宾馆，搿个名字起得勿错，因为上海古名华亭。因此，早期个上海人也是华亭人。但是，搿搭我伲所讲个上海文明基本勿搭界。 我认为，上海文明个肇始者，是明代进士徐光启，可以算是第一个严格意义浪个上海人。伊个墓地离华亭宾馆邪气近。两相对应，首尾提携，概括勒无形个上海文明。 今朝上海人个某种素质，勒徐光启身浪可以找到眼踪影。搿位聪明个金山卫秀才，南北游逛，勒广东碰到了意大利传教士郭居静，聊起来邪气融洽，徐光启开始晓得了天主教是哪能桩事体了。 搿年伊三十四岁，伊并勿拿刚刚听到个西方宗教当作西洋镜一笑了之，也勿仅仅作为一种域外知识勒某一篇著作当中记一下而已，而是邪气深入个思考起来。伊并勿想放弃科举，四年后到北京去应试，路过南京，专门拜访了更加有名个欧洲传教士利玛窦，询问人生真谛。以后又搭另一位传教士罗如望交结，并接受伊个洗礼。 洗礼后个第二年，徐光启考了进士，成为了翰林庶吉士。搿对中国传统知识分子来讲，已经跨进了一道邪气荣耀个门坎，可以安安心心做个京官了。 但迭个上海人邪气勿安心，老是去寻当时勒北京个利玛窦，探讨个话题已经远远超出宗教，天文，历法，数学，兵器，军事，经济，水利，无所不及。其中，伊对数学兴趣最大，着勒翰林院个官服，邪气痴迷个投入到了精密个西方数学思维。勿久，伊居然搭利玛窦一道翻译了一大套《几何原本》。当时还是明朝万历年间，离开鸦片战争个炮火还有漫长个二百三十多年。 迭个上海人邪气善于处事，并勿整天拿好一整套数学思维搭封建政治机构寻衅挑战，而是左右逢源，勿断受到皇帝个重用。 《几何原本》刊行了廿二年以后，伊竟然做了礼部侍郎，勿久又成了礼部尚书。获得了介大个官职，就一本正经宣扬天主教，提倡西方科学文明，延聘重用欧籍人士，忙了没几年，就过度辛劳过世了。 徐光启死脱以后，灵柩运回上海安葬。安葬地以后也就是伊家族世代个汇居地，称为“徐家汇”。 开通，好学，随和，机灵，传统文化学得会，社会现实也周旋得开，却拿心灵个门户向世界文明洞开，敢拿勿久之前还邪气陌生个新知识吸纳进来，并且邪气自然个汇入人生。搿就是出现勒明代个第一个精明个上海人。 人生态度相当现实个徐光启是勿大考虑自家个身后事个，但细看起来，伊个身后流泽实在邪气了得。 徐家汇成了传播西方宗教和科学文明的重镇。 交通大学从上世纪末开始就出现勒搿搭，复旦大学勒迁到江湾之前也一度设勒附近个李公祠里向。从徐家汇一带开始，向东延伸出一条淮海路，笔直划过上海滩，伊曾经是充分呈现西方文明个一道动脉，老上海高层社会个风度，长久个由此散发。因此，有人认为，假使要拿上海文明分等级，最高等级也可以名之为徐家汇文明。 徐光启个第十三代孙是个军人，伊有个外孙囡叫倪桂珍，就是名震中国现代史个宋氏三姐妹个母亲。倪桂珍继承了先祖个风格，是个虔诚个基督教徒，而且擅长数学。伊所养育个几个囡儿对中国现代社会个巨大影响，可以看作徐光启发端个上海文明个一次重大呈示。 图片来自网络 吴侬细语吟诗词歌赋 往期回顾： “上海言话讲起来”旨在传播沪语，若有不当之处，敬请留言指正。 感谢您的支持转发，欢迎关注本公众号
|
|
|
来自： 渺渺m69vnzsah9 > 《待分类》
