 作者/周云海 沪语诵读：高仁 推荐：丁迪蒙 制作：沉默是金 人是会变的。除忒人个生理肉身会生老病死之外，隐秘个心理勒勿同个生命时段里，也可能会呈现出不同以往个善念、爱举或者是贪欲、邪恶。所以有“人时而是天使，时而是魔鬼”之说。“盖棺定论”是对人个终极评定。 “盖棺定论”，往往是对国家、政体、社会产生影响，甚至是产生根本性影响个国家政要，或者是对掌控某地区、某领域个重要人物，或者是社会名流个官方评定。一般老百姓，是勿享有迭能介官方评定待遇个。但是民间也有类似个“盖棺定论”。不过评论逝者是呒没好坏之分个，一律用溢美、拔高致辞（当然，服刑刑事罪犯除外）。有一句闲话讲：人之将死，其言也善。用勒勒平常逝者追悼会浪，可以替换成迭能讲：故人已逝，悼辞也善。作为个体寻常人一般不具有社会影响力，所以，褒赞随意？ 我参加过勿少逝者个追悼会，觉着单位干部所作个悼词，基本浪侪是过度赞美个乏味套话，除忒出生年月、工作单位勿同外，统统是放之四海人人可用个格式范本。假如勿是勒追悼会个特定场合，冗长个悼词，是会让我听得打瞌冲个。不管逝者生前哪能，甚至根本勿晓得逝者过去岁月个生平，单位派员所作个悼词，大体浪是迭能介个意思：该同志，勒工作浪兢兢业业，努力学习、克服困难、潜心专研生产技术，对同事和蔼、友善、大度，从不计较个人得失；生活浪作风正派，艰苦朴素、勤俭持家、敬老爱幼，充满慈爱之心。 雷同个套话，千遍一律个追思褒赞悼词，有辰光听起来觉着既滑稽又好笑。 我个嬷嬷生命油灯耗尽，年近百岁而逝世。嬷嬷漫长个人生之旅，历经交关工作变化搭苦难周折。作为亲人小辈，甚至于儿女们侪勿了解伊搿个已经遥远个过去岁月，尤其是陌生个三四十年代个工作搭生活状况；但是嬷嬷曾经工作过个最后一个单位个年轻干部，勒拉伊本单位职工已退休后四十多年个追悼会浪，却能够对经历过两个不同政府、纵跨两个社会个嬷嬷个工作搭生活状况了如指掌，从容不迫个朗读悼词。 我爱我个嬷嬷。勒拉追悼会浪，我特别祈望勒搭遗体个告别辰光，讲讲老人家个往事，念念嬷嬷生前个好。可是，迭格已经睏勒伊面，搭阿拉阴阳两隔个亲人，真个有嘎许多出类拔萃个好伐？作为单位派来参加追悼会个年轻干部，勒老人家退休个辰光，侬也许还呒没养出来呢！侬能够晓得老人家勒民国时期哪能努力工作？侬真能够如数家珍一样熟悉伊跌宕磨难人生个工作搭生活情况吗？ 我希望阿拉今后开追悼会，可以像西方影视剧里个逝者葬礼迭能：氛围悲切而庄重、面容肃穆而真情，悼词简练而勿乏追思。悼词可以讲讲逝者生前让人印象深刻个往事、趣闻，甚至可以用眼打甏、幽默的话语，让亲朋好友记牢搿位升入天堂个逝者。 我已步入花甲之年，我个工作、生活、家庭影像大致定格。人生百年古来稀。是人，终归要辞别尘世个。真正到了迭格一天，我勿希望别人搭我戴上无论张三李四王二麻子统统侪一样个帽子吹捧我，勒勒迭能介庄严肃穆个作别或是泣别时刻，让我混同于张三李四王二麻子，我个在天之灵也会得浑身发痒个。 所以勒有生之年，我愿意为自己预先写好我个悼词：“我，某年某月出生；民族：汉族；籍贯：某省某地；某某年中学毕业；七十年代到某某农场务农，担任耕牛饲养员工作，大家侪叫我‘牛司令’；八十年代返城，勒某某单位工作；九十年代从内企辞职，从此，好比是新生个游牧民族长年累月搭丰茂个草场、清澈个湖水打交道，我勒外企工作，我勒民企谋生；本人喜欢方块字，命运却让我搭阿拉伯数字作伴，领导派我做财务工作，平常喜好看书作文，虽然勿能成为作家，却有人生感悟、烟火诗文见诸全国天南地北个100多家报刊杂志。 我，生性善良，勿乏爱心，亦有勿少生存私心。比如二十岁辰光贩卖过刀鱼，三十岁辰光卖过洋泡泡（气球）；我懂事明理，但也有稀里糊涂个辰光个，生前有辰光走勒马路浪，曾经穿过交关趟红灯；我个性爽直、坦诚，心勿设防，遇事会搭人家争论、对立，但内心却胆小怕事，无论对方模子大小，搿辈子，我从来勿敢搭人家打相架，作为男子汉，是不是有点推板？我生活比较节俭，记得做知青辰光，曾经搭农友勒农场小卖部里，每人手捧10根刚刚氽好个，香喷喷、热乎乎个油条，狼吞虎咽个穷喫阿念头。 好了，人生忙碌，不多占用大家宝贵辰光了。我，自我‘盖棺定论’：人勿聪明，但很努力；人勿坏，但绝对勿是好个榜样；年轻辰光我有过勿少美好个愿望，直到老了，还是实现勿了，只能摆勒心里想想而已；时至今朝，我也勿再想、也勿能想了，因为我要离开大家，到伊面再也看不到我个老远个地方去了。特此，我向大家作最后个告别！我是某某某。记牢，我只是一个曾经来到过迭个世界个平常人！” 作者 朗读者 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
