 白露 秋思 作者：易中天 沪语改写：边秦翌 沪语朗读：徐蔚华 过好七月十五个中元节呒没几天，就是白露了。秋处露秋寒霜降，白露是秋天个第三只节气，北方已经开始变冷了，桂子也应该飘香了。葛末，阿拉一道来读一读迭首唐诗伐。 中庭地白树栖鸦，冷露无声湿挂花。 今夜月明人尽望，不知秋思落谁家。 春日多风情，秋夜多思绪。中唐诗人王建个迭首诗就是表达了搿个意思。 搿是一个清冷而又孤寂个夜到。邪气圆个月亮老老高个挂勒天浪向，拿庭院个空地照得来是雪雪白呀，白天介一直勒叽叽喳喳个小鸟，搿歇侪迓勒树阴里向睏着了，可以讲，现在是万籁俱寂、鸦雀无声。潮搭搭个寒气，像煞是月光从天浪向洒下来，迓迓叫个湿润了飘仔幽香个桂花。勒迭个清辉普照个夜里向，所有个人侪勒望牢仔月亮伐？但是，勿晓得此时此刻，埃个浮想联翩、万千思绪，又落勒啥人个屋里了呢？ 邪气明显，诗人笔下头个月夜是澄静素洁、寒意轻袭个。中庭月色如水，枝头冷露暗凝，既是眼前之景，也是内心个写照。情怀意绪需要传达，搿能再有了“不知秋思落谁家”之问，尽管有着难言思绪个齐巧是伊自家，但假使直别别个讲出来就勿是诗了。更何况勒勒中秋之夜，正好是“月明人尽望”个辰光，侬哪能晓得别人家就呒没秋思了呢？ 大家侪有，再有意思。 某些人有，某些人呒没，也蛮有意思个。 王建个迭首诗另外还有只版本，是拿“落谁家”写成功了“在谁家”，我觉着是各有千秋个伐。落，新颖奇特，充满了动感；而“在”呢，看上去是普通了点，但实际浪是邪气有道理个。譬如王驾《雨晴》里个“却疑春色在邻家”就勿能用“落”迭个字。实际浪，“在”，意思是原来、是老底子就有个；而“落”呢，是原来呒没个，是现在从天而降下来个。我勒此地选择“落”，是因为搭月光是邪气匹配个，大家完全可以根据自家个心情搭仔理解，去读搿首诗。 “在”搭仔“落”，迭二个字，侪有眼意思个，侪是蛮好个。 朗读者 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
