 讲述：王幼兰 作者：欧阳德彬 来源：渡十娘 沪语改写：边秦翌 张潮刚刚到大厦来上班个辰光正好碰着鸟城个读书月，搿也是书部最最忙个一个号头。没有上下班个界限，没日没夜个看书写物事，当然也没有周末假期。林莉是伊个搭档，伊写，伊编。当然，伊加班个辰光，也少勿了伊。 已经半夜了，昏暗个版房里向只剩伊拉两家头。伊坐勒电脑前头修修改改，伊立勒一侧帮忙斟酌字句。伊讲原来个大标题有得一股腐朽个学院味道，要调一只实在又响亮个新标题。伊段日脚，伊像煞是一位手持皮鞭个女王，催促伊写稿改稿。 夜深沉了，伊还呒没想出来让伊满意个标题。伊焦躁勿安个立勒伊面，两只脚勿停个动来动去，交换位置，时勿时用岔开个五只手节头从额角头插进竖勒海个短发里向。再拿手掌勒勒眼门前摊开来个辰光，只看到指缝搭仔掌心浪还粘勒几根脱落个头发。 用勿着几年，搿只工作就要拿我变成功像老丁一样个秃顶了。为了缓和气氛，张潮开起玩笑来。 到辰光侬就可以自称为老油条了呀。伊也暂时从布满文字个版面中逃离出来，转过身，嘻嘻哈哈个讲。 恐怕还没熬到转正，就未老先衰啦。伊讲。 呒没介夸张好伐，侬是从绿色通道引进来个高技术人才，三个号头就转正。想当初我来个辰光，单单试用期就要一年唻。迭个单位待遇一般，但是也勿是介好进个。伊讲。 高技术？啥个技术啊？ 码字个技术呀！前两天总编室黄主任还表扬侬，讲侬码字又快又好。伊笑了。 假使讲码字算是技术个闲话，搿真个叫做是码字者个悲哀。伊隑勒电脑台子旁边，两只手臂抱勒胸口头。 哪能啦，侬勿喜欢搿份工作啊？勿是告侬个专业老对口个啊？ 对口是对口个，上班个辰光写得忒多，对文字就会得丧失敏感，业余辰光再想写点自家个物事就难了。搿仿佛是缪斯女神对码字者个诅咒，一天就千把字个量，超过迭个限度写出来个物事就是垃圾了。伊扭过头看看伊，皱仔眉头讲。 侬个腰带扣老亮喔。伊讲。 伊本能个低头看了看下身，还好还好，前开门个拉链呒没忘记脱拉好，纽扣也呒没脱落。隔手，伊个目光沿牢仔伊个短衫看到无毛个胳肢窝，也看到简易文胸包裹个胸部。伊也勿晓得是啥个原因让伊耗得油尽灯枯。搿个辰光，伊细细长长个眼睛里向有得一种麻黄，像煞是蜥蜴个眼睛一样，好像还有花蛇眼睛个斑点。 伊勿敢一直盯牢仔伊个眼睛。 哦，腰带扣啊，搿是网购个便宜货。伊局促勿安个讲。 侬看呶，近抢把侬天天加班，我陪侬个辰光比侬女朋友还要长了。 哈哈，是个是个。 侬迭个小鲜肉勒此地上班要注意哦。搿搭一多半个女人侪是单身。搿眼老阿姐，老阿姨。 我倒是勿吓个。必过，我勿懂伊拉为啥单身呢。 搿有啥搞勿懂个啦。三日两头加班，啥地方会得有辰光去照顾屋里照顾小囡呢？结过婚个大多数也分了。 往期回顾： 图：摄友 / 编辑：渺渺
|
|
|
来自： 渺渺m69vnzsah9 > 《待分类》
