 讲述：周月英 作者：欧阳德彬 来源：渡十娘 沪语改写：边秦翌 沪语讲述：周月英 张潮走勒文化路浪，抬头看了看榕树个枝丫搭仔天浪向个白云，深深个吸了一口带仔榕树叶子味道个空气，心情蛮勿错个。伊刚刚睏了一只中觉，虽然短暂但是甜蜜，还梦到一个主动投怀送抱个小美人。伊邪气庆幸自家住个地方距离单位邪气近，可以回去睏只中觉。伊间房间也蛮好，午后有得阳光，床垫宽敞适意，就是房租有点点贵。 到了办公室，老大哥通知书部职员开例会。部门忒小，开会也用勿着到会议室，大家拿自家个办公椅滑到老大哥旁边，聚成一只半圆就可以了。张潮滑到老大哥办公桌前头，正好对勒伊。作兴是中浪向个觉睏得忒适意了，伊好像还呒没完全回到现实，小声个咕哝了一句“搿趟开会能勿能开得快一点啊”，平常辰光每趟开会，老大哥总归会得啰里八嗦，闲话讲也讲勿光。伊刚刚咕哝好，就拨老大哥骂了只狗血淋头。老大哥个声音忒响了，拿伊个耳膜震得痛得勿得了：滚侬个蛋！侬有啥个资格让开会开了快点！盯牢仔眼门前迭个年纪已经四十几岁、身材已经发福走样个圆面孔老大哥，张潮紧攥个拳头已经咯吱作响了，北方个血液裹挟着愤怒勒勒伊个体内奔腾。真个就想朝牢仔迭个双下巴一拳头打过去，让伊再也讲勿出骂人个闲话。必过，迭个辰光，伊勒勒老大哥个呵斥声中完全清醒了。有得几秒钟，眼看张潮就要对老大哥动手了。打伊一顿收作物事走人，就像老底子一样，反正到阿里工作侪一样。讲起来单位还算是做文化个单位，职员也侪算是文化人，算了伐！滚伊个文化蛋。 齐巧，刚才到茶水间去接水个林莉回来了，急急忙忙回到自家座位浪向。迭个辰光，老大哥发好火，气也慢慢叫个消脱了，语气也缓和下来。为了表示勿开心，张潮就拿椅子滑到自家台子旁边，有意要拉开一眼距离。老大哥让伊返回原处。张潮讲搿搭就蛮好，靠勒台子方便记录。老大哥坚持让伊回到原处，伊勿情愿个滑动椅子，重新坐到老大哥个正对面。会议告平常一样，像一杯白开水，平淡无奇，婆婆妈妈，拖拖拉拉，一直到夜快头再结束。 张潮离开办公室，走勒文化路浪向，鸟城冬日个凉风迎面吹过来。受了气个缘故，伊好像一眼也勿觉着饿。再讲，已经介晏了，食堂个饭点老早就过脱了。 一家理发店个门口头立勒一个穿仔单薄绿裙子个姑娘勒勒发传单，伊个头发染了庸俗个黄颜色，面孔倒是长得蛮标致个，有双杏仁眼，一看就是一个到城里向来打工个村姑。张潮路过个辰光，迭个姑娘递拨伊一张传单，还朝伊微笑，伊回笑了一记，受伤个心好像突然就康复了，伊看看姑娘搭仔张灯结彩个理发店，心里向重新洋溢起对世界个柔情。 帅哥，办张会员卡伐，一楼可以理发，二楼可以按摩。姑娘露出一口漂亮个白牙齿笑容可掬个讲。 好个呀，好个呀，当然可以个咾。必过，假使讲我来按摩个闲话，我想要侬来帮我按，好伐？姑娘就拿张潮引进了理发店。 可以个，可以个，我个手法请侬放心。姑娘又笑了，简直是一位金发天使。  往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
