 讲述：卢咏梅 作者：欧阳德彬 来源：渡十娘 沪语改写：边秦翌 沪语讲述：卢咏梅 张潮讲先考虑考虑，自家本来呒没工作个打算。老大哥讲，侬上班也是读书写字，跟侬勒勒屋里向做个生活是一模一样个，还好有一份稳定个工资拿拿，上班辰光也比较活络。㑚搿眼自由撰稿人啊，我是最最了解个，也想为㑚提供一眼实际个帮助。老大哥循循善诱。等到张潮按部就班办好入职手续，再慢慢叫个晓得上班个情形并非如此，读书是勿自由个，还有没完没了个加班。既然来了，就多蹲几年，看看到底啥个情况伐。 魏封就勿会得搿能介写呶。勒勒昏暗个排版房里，林莉常常搿能讲。 魏封写卷首语个辰光会得先谈论谈论时节。林莉讲。 每趟林莉提起魏封，张潮心里就勿适意，像煞是女朋友老是要提起伊个前男友，比较来比较去个。亲密个工作搭档，共事辰光长了，也有一种微妙个情愫。 张潮看得出来，魏封个辞职对林莉影响是邪气大个。魏封辞职个原因，林莉个版本搭仔魏封本人个讲述差勿多，就是有趟魏封到香港去出差，老大哥托伊带两本港版书，结果过海关个辰光拨没收脱了。刚刚回到办公室，魏封就拨老大哥臭骂了一顿，让伊寻海关去讨回来。魏封一肚皮个闷气，去了趟海关，当然是无功而返，又拨老大哥一顿臭骂。魏封火气就上来了，骂老大哥是一个勿通情理个戆大，两个人差点动手打起来。工作是做勿下去了，辞职离开了大厦。 林莉勒勒魏封辞职一年之后也辞职，搿多多少少有眼关系个。 每隔一段辰光，书部侪会得收到一份书单，有辰光是红头文件，有辰光是电话告知。电话告知个辰光，电话机显示屏浪是勿会得显示任何号头个，话筒里传出来声音，暗示阿里几本书勿可以报道，当然咾，有辰光拨个勿是书名，而是作家个姓名，搿比单本书更加严重，意思就是要拉进某只黑名单，彻底封杀。 偶尔有风声传得来，讲啥人啥人因为私藏了几本禁书锒铛入狱。没有啥个确切标准，有辰光今天允许读个书明天读就违法了，好像背后头有得一个喜怒无常个小囡勒勒暗暗叫个操纵。 勒勒大厦蹲个辰光长了，张潮就会得眼睛干涩，视线模糊，甚至拿一个人看成功两个人，有辰光还会得拿领导看成功保洁员，耳朵里向侪是同事茄山河个杂音。迭个辰光伊就需要出去走一走，沿牢仔文化路一路朝东，勒勒邮政报刊亭旁边弯进一条无名小路，再往右转，就到学院路了。 当伊到学院路浪去兜脱一圈，迓迓叫个欣赏着仔蓝灰校服个职校女生，搿眼还没学会拿口红搨搨均匀个小姑娘，心情就会得重新舒畅起来。搿个辰光伊就会得想，啥个辰光可以去做做职校老师呢？中小学老师勿想做，视野受限，呒没意思。大学老师也勿好，面对个侪是眼历经考试驯化个利己主义者。只有勒勒职校里向，体制教育个灰色地带，到处是十五六岁成绩一般个蓓蕾少女。 朗读者 往期回顾：  图：网络 / 编辑：渺渺
|
|
|
来自： 渺渺m69vnzsah9 > 《待分类》
