上海闲话 | 小辰光看译制片

现在个小朋友肯定勿晓得，欣赏好个电影配音本身就是一种享受。

一年一度个上海国际电影节又开幕了，对于痴迷电影个影迷来讲，迭个就是一桌满汉全席，各种风格个电影侪有，只要侬身边个网络够流畅，手速够快就可以抢到票。阿拉小辰光虽然刚刚改革开放，但已经可以看到勿少外国电影，只勿过类型呒没现在介丰富，搭现在最大个区别是，当时阿拉看个侪是上海电影译制片厂个译制片，有中文配音嗰。勿像现在看外国电影虽然也有配音版，但大家基本浪侪欢喜看原版片，觉得原汁原味有味道，顺便看电影个辰光也好练练外语听力，有辰光看到字幕觉得别扭个地方，听了原声也就晓得到底人家要表达啥了。

不同时代会有不同审美记忆，文艺作品也会辣其中发挥勿一样个作用。阿拉小辰光看个译制片当中个配音绝对是和画面、音效同样重要，甚至于从某种程度浪向讲还超越了电影本身，成为可以独立欣赏个作品。埃歇辰光电影下档以后，电台里还会放电影录音剪辑，特别精彩个像《叶塞尼亚》《佐罗》《简·爱》《苔丝》等等，我根本就呒没看过电影，但是每趟播一遍就会再听一遍。后来有了录音机，还买过不少磁带反复听，真是百听勿厌。

现在个小朋友肯定呒没办法想象，电影也呒没看过就听录音有啥意思呢？伊拉勿晓得欣赏好个电影配音本身就是一种享受，配音演员或醇厚或深沉或充满磁性个嗓音各具特色，而台词之间起承转合个音效又会让听众展开想象个翅膀，虽然呒没看到画面但比看到画面更加有意思，因为想象个力量是无穷嗰。当然迭个也不是绝对嗰，比如像《魔戒》搿种视觉特效大片，就肯定是到电影院看才能得到最好个体验。

再后来，上大学个辰光有一门关于广播剧个专业课，先导作业就是制作广播剧个浓缩版，里向用效果音转场个辰光我常常就会想起小辰光听个电影录音剪辑，配音演员配合剧情个气息声侪清晰可辨，屏息凝神个听，好像勿仅能进入剧情当中，还可以进入主角个内心世界。

我辣电影院看个第一部外国战争片是《老枪》，后来看《茜茜公主》才晓得《老枪》里向个女主角就是演茜茜公主个罗密·施耐德，但当时印象最深刻个是喷火枪将人射杀个场面。虽然后来也看过其他战争片，场面要大得多，但《老枪》当中将生命近距离毁灭个惨烈感实在让人汗毛凛凛，让我有相当一段辰光不敢再看战争片。表现家人之间亲情个《我两岁》《父子情深》《英俊少年》等电影总归会让我心生温暖，尤其是《英俊少年》，伊个剧情我老早就勿记得了，但是主题歌《小小少年》实在太好听了。前一段辰光看到一段视频，是14岁个海因切和60岁个海因切合唱《小小少年》，虽然海因切清亮个嗓音已经变得深沉，翩翩少年也已经变成大腹便便个爷叔，但是迭首歌听起来还是让人邪气感动，因为里向有对未来个憧憬，还有淡淡个惆怅，迭种感受实际浪向属于阿拉每个人。“小小少年很少烦恼，眼望四周阳光照；小小少年很少烦恼，但愿永远这样好。一年一年时间飞跑，小小少年转眼高，随着年岁由小变大，他的烦恼增加了……”

---

关于我们：