|
史料编写：何振华 沪语讲述：何振华 沪语记录：飞飞 推荐：丁迪蒙 编辑：王乙其 大家好！我是何振华，从今朝开始，我搭大家讲一讲旧上海十大女流氓的故事。  点击下方收听音频，时长06分43秒。 范开泰，三十岁左右，人品生得倒也端正。因为伊做乌木个掮客生意，得了个绰号就叫“乌木开泰”。当时辰光凡是温州搭仔福建个木商运到上海个乌木，侪是经伊个手转卖出去。木商大多侪住勒小东门一带个客栈里，乌木开泰呢就经常搭伊拉混了一道白相，搓麻将，嫖女人，伊勒城隍庙旁边租了一间店面，雇了几个乌木制作匠，做一眼乌木筷子、砚匣、果盆、茶盘唠啥，生意勿错，年有盈余。 平常辰光勒仁和客栈进进出出、看见过施金绣搭仔张德成个人，常庄有人会讲，一朵鲜花插勒牛粪浪，可惜！介好、介标致、介来赛个女人，哪能会嫁拨迭个男人，真是天晓得！耳闻迭能个闲话，强盗金绣觉着针锋刺勒心尖浪，自家安慰自家，认定命该如此。但看见别人家夫妻出双出对、恩恩爱爱、有模有样，伊不免痛苦在心，恨自家男人。乌木开泰是仁和客栈个常客，强盗金绣见伊一表人才，自家男人一比，一个天一个地。情人眼里出西施，强盗金绣晓得乌木开泰是单身，又是老板，盯牢勿放。乌木开泰乐得将就，强盗金绣心一横，就拿元配丈夫一脚踢开，搭乌木开泰租房间公开轧姘头了。结发夫妻拨拆散，孤零零个张德成哪能还受得了四周围个冷嘲热讽，积郁成疾，吸大烟又欠一屁股个债，裁缝摊不过是两块排门板，仁和客栈老板拿张德成个吃饭家什掼了出去，从此断了经济来源，几个号头功夫，一命呜呼。张德成死了两天，邻居才发觉，强盗金绣买了一口薄皮棺材，收尸了事。 乌木开泰生意做大了，要有人管账目。伊有个堂侄叫范回春，刚刚从财会学堂毕业，就来帮忙做账。迭个范回春，是三鑫公司股东女老板金刚钻阿金个上门女婿。金刚钻阿金个老公活勒海个辰光，勒城内三牌楼开了爿万昌珠宝店。珠宝店个旁边有一块空地，原来打算扩充店面造房子用，老公一死，金刚钻阿金无心扩展营业，空地就搁下来了。三牌楼有个绰号叫“烂块头成根”个地头蛇商人，看中搿块空地，想压低地价格收购，金刚钻阿金哪能肯？地头蛇要吃吃迭个寡妇，金刚钻阿金就寻强盗金绣商量，施金绣邀请了十几个小姊妹，拿烂块头成根喊到萝春阁茶楼碰面。施金绣据理力争，前因后果，剖析得头头是道，勒流氓白相人吃茶个场合，彼此总归要讲点“道理”。施金绣唇枪舌剑，地头蛇哑口无言，双方最终一豁两开，顺利解决。金刚钻阿金邪气感激强盗金绣，从此常来常往，情同姐妹。 金刚钻阿金有一个女儿小蓓，尚未许人。施金绣就拿乌木开泰个堂侄范回春介绍过去做了上门女婿。施金绣勒青帮尤正熙个老婆何氏个门下成了青帮门徒，踏进青帮门槛，强盗金绣更是如虎添翼，为了要进一步扩大伊个势力，伊开始着手组织“十姐妹”女流氓集团，要跟男流氓并肩逞强了。勒王家码头荷花池旁边个紫竹庵里，点烛焚香，拿金兰谱供勒观音菩萨面前，磕头叩拜。 老大，强盗金绣；老二，金刚钻阿金；老三，阿桂姐（黄金荣姘头）；老四，林桂生（黄金荣老婆）；老五，洪老五；老六，小脚阿娥；老七，李宝英；老八，陈宝姐；老九，沈扣珠；末脚一名，丁宝英。“十姐妹”勒钧培里黄金荣屋里举行欢庆典礼，然后再互相宴请，十个女人屋里闹猛了将近半个号头。“十姐妹”个师娘是尤正熙个老婆何氏，拜师娘迭个一天，勒老西门静修庵开设香堂，张灯结彩，邪气隆重。黄金荣、张啸林、金福生、李阿三唠啥参加典礼。迭个尤何氏勒青帮里算阿里一辈排行，呒么人晓得；迭个一班“十姐妹”是属于青帮中阿里一辈排行，也呒么人讲得清爽。名义浪，“十姐妹”是青帮门徒，但开香堂典礼个辰光，既呒么罗祖搭仔翁、潘、钱三堂主爷个神像，也呒么关羽个画像，只勒勒香堂正中挂了一幅像煞道姑个画像。一个尼师跪诵忏词，几个香火尼姑分别点蜡烛，清净个静修庵乌烟瘴气，另一个尼师按名单唱名字，十姐妹依次排列，先后磕头拜像拜师娘。尤何氏呢拨每个女门徒发一个泥金镶边个黄色小折子。接下来摆宴席，赶香堂个黄金荣唠啥一看台面浪个菜，呒么美酒，呒么荤腥，纷纷溜之大吉，跑到别个地方去寻欢作乐了。 （“十姐妹”的故事，明朝继续。谢谢各位收听。） 编写及讲述：何振华 丁迪蒙 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。 来源：“启迪心田沪语”公众号 |
|
|
