|
内有反对外有支持
▍新埭（平湖|思远 摄）  塱语言文化资源亇保护中，交关人全坞著一只误区当中，像煞撘自家俦讲一样闲话或者一类闲话亇人就一定是支持者，撘自家俦讲不一样闲话或者不一类闲话亇人就一定是反对者。实际上，並不是昰恁亇。 就以我为例好啧，我是上海市·嘉定县·华亭乡人，我主打亇就是我亇本真乡音——精确到华亭乡昰只地点亇人类语言。照算讲华亭人就开心啧咾？我替佷话：“真未必！”大家来看看看我亇乡亲是哪恁话亇： 甲话：“覅学！学著咋干？” 乙话：“昰个土话嘞！拾著行啥啊？” 丙话：“我伲话亇，佷只要听得懂就可以啧。外语要学好。” 丁话：“出去著么不讲啧呀！” 戊话：“我替佷话，讲闲话覅忒土！” 己话：“晓得著咋干？阿有铜钱亇咾？” 庚话：“区长畀佷几许铜钱咾？一日到夜弄昰点物事！” 辛话：“拿両个囡细弄得土土得！我覅伲丫头儿讲昰支土闲话！” 壬话：“要弄嘉定闲话么也要弄嘉定街上亇闲话亇呀！” 癸话：“佷昰个闲话也要人家承认亇呀！” 哪话？甲乙丙丁戊己庚辛壬癸昰恁话，阿要再来听听看子丑寅卯辰巳午未申酉戌亥哪恁讲亇？ 实际上，从昰点态度亇流露中，大家应该可以意识着：现在语言文化资源亇消亡，正是原母语人群自家放弃亇结果，叛恁我伲昰坒人也不需要吃力啌啌做语保昰桩事体啧，但可惜做语保亇人常常意识不着昰点，塱简单亇排外逻辑亇左右下，片面认为本人群就是自家乡音亇天然支持者，外人群就是自家乡音亇天然反对者。 轧实，支持不支持，相当程度上是取决于大家对某种闲话亇看法。就以上头诸位华亭老乡亇看法来剖析，可以晓得——不少华亭人觉着分布于华亭本乡亇人类语言土，听懂度低，外界认可度低，呒得学习、传承亇必要，相对来讲更加推崇从嘉定县城直到国外亇威望度更高亇外界亇闲话。对于像我昰恁本著彻底亇语保理念努力学习、传承、弘扬本真乡音亇做法轧真並不赞赏。可以预见，精确到华亭乡昰只地点亇具体亇汉语，会逐点逐点失传，因为华亭人自家也並不看好，昰个也是交关人不肯传畀后代亇原因。嗰么为啥昰排态度上反对亇，或者最起码不支持亇人自家还著塱使用华亭闲话？昰个是因为著佢垯当年亇成长年代里，选为全国通用语亇北京音还朆完全行开，大家还朆普遍掌握，华亭闲话还是大家著整个社会生活中高度依赖亇表达工具，佢垯只是继承著历史形成亇一种惯性而已。就像我伲已经意识着著世界上英语傍汉语具有更广亇通用性撘更高亇威望性，但我伲还是更加依赖于已经习惯著亇汉语来表达。 当然，本人群当中肯定也有支持亇，毕竟，浓浓亇乡音，对于有亇人来讲也还是颇有亲切感亇。但是，实话实讲，撘昰恁多亇反对者比起来，对我弄华亭闲话送来肯定亇华亭同乡，真亇少。昰个实际上也並不意外，因为语保亇难点就在于——人们认识着自家亇乡音通用度低，威望度低，故嘞更加倾向于放弃乡音而转用通用度更高、威望度更高亇外乡闲话。苏州府城、上海都市尚且碰着昰恁亇难点，更何况我伲处于语言同化链最底层亇嘉定县·华亭乡！ 不过，本人群里有交关人不看好，不等于外人群里就呒人看好。不少使用其他地点汉语亇人倒一直著塱支持我，包括嘉定其他乡镇亇、上海中心城区亇、外省市亇，甚至外国亇。为啥？同样也是对语言本身亇态度问题。有亇人觉着有新鲜感；有亇人觉着是独特亇语言文化景观，有价值；有亇人觉着对周边其他地点亇人也是蛮有亲切感亇；有亇人觉着我亇语保理念值得佢自家伊支人群学习。不管哪恁，我亇乡音传承实践做到乃，若假话对于语言资源保护造成著一眼有利亇影响，嗰么不可否认亇就是，有交交关关外乡人通过实际行动帮助我做到著昰点——有亇提供资料，有亇提供技术，有亇提供平台，有亇提供包装…… 可惜，圈子里有不少同仁想不通昰点——无视本人群内部亇强大反对因素而拿外人群全看成功敌人，行语保走偏到地域攻击亇邪路上，实在是相当不明智亇。当然，外人群当中的确也有不少反对者。像我碰着歇亇，外地人也有，上海城区人也有，嘉定别乡镇亇人也有。但一定覅无视——本人群——华亭人，也有人塱反对。语保亇支持者撘语言亇使用者之间並非自然亇吻合关系，内外每支人群当中全有反对者，同样，内外每支人群当中也全有支持者。 当然，塱现在北京音已经全国行开，普遍掌握亇情况下，佷蛮难指望本人群还会普遍稳定亇拿乡音传下去，也蛮难指望外人群来著还会转用佷亇乡音，但作为一个塱为乡音，塱为人类语言资源作最后努力亇个体，理性亇分析问题，不挑动人群矛盾，充分肯定来自内外各支人群亇支持者，也充分尊重来自内外各支人群亇反对者，既是应有亇姿态，也是实现乡音历史地位亇最佳策略！ 疁·浏河长江 2018年6月7号 礼拜四 戊戌年 四月廿四 嘉定建县800周年 本平台暂未开通评论，大家可至吴语学堂微博留言： 新浪微博：吴语学堂微博 你还可以通过以下方式联系我们： 投稿信箱| wugniu@126.com |
|
|
