|
混堂回忆
 记得八九十年代亇辰光大概塱现在嘉定商城后头眼有只混堂，好像阿是叫清泉浴室？我伲爷常庄领我去汏浴亇。 为此著嗰歇儿头儿实在是叫小嘞记得不是哪恁清爽，只记得跑进去么有只浴池，両个汏浴人么一个个全像両只肉馄饨恁“共㗢共㗢”下著塰——昰个已经是我印象里淴浴亇头一只步骤啧，前头行著眼啥统统忘记脱啧。水么浑得来，拆穿著讲就是一镬鏖糟汤，现在想想哪恁爬得下亇？！难得有趟把看上去像煞介仔透明度稍些高点，我伲爷就脱（疑为鼻尾增生）口而出：“喔唷！今朝水清爽啧！” 著只浴池里具体要行点啥么也不记得亇啧，好像、作兴、大概就是颈骨、胳胳、里股、脚弯弯、脚节丫里摼个摼昰排常规亇“操作流程”。有趟看见浴池边头一个人合仆著塱，还一个伏著垯塱行啥，我伲爷话：“喔唷，有人擦背亇倒！”乃么叫我也去体验体验。我仆下来，伊个人拿顿毛巾替我背心上“行趤行趤”一落搓呃！棺材也不是！痛透痛透！像畀人家排脱著顿！简直难以想象有人竟然觉着昰个是种享受！ 不过擦背倒还是难得碰着亇恐怖经历，趟趟阿末脚亇冲浴么叫实在是逃也逃不过！趟趟总贯畀伲爷捉牢定著对牢只喷淋头冲，一冲么冲得眼睛睁不开著总贯骤得极叫连天呃：“眼睛瞎脱啧！眼睛瞎脱啧！”终于有一趟畀我骤脱，从伲爷手里滑出来。伲爷也“嘎嘎嘎嘎嘎”笑得：“今朝终于畀佢逃脱啧！” 经历著喷淋头亇恐怖洗礼之后，终于可以安逸太平啧。记得外头好像是只大堂，排满亇小床嗫躺椅？印象模糊啧。横拣只位子眠下来么一条毯子一盖。伲爷么一般总贯带両只橘子，正好剥著吃吃。不过我亇记忆也就只有到昰滩啧，阿末脚哪恁归去亇也不晓得啧。 疁·浏河长江 2017年8月13号 礼拜日 丁酉年 闰六月廿二 嘉定建县799周年 朗读：疁·浏河长江 排版：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 你还可以通过以下方式联系我们： 投稿信箱| wugniu@126.com |
|
|
