|
▌宾馆的自助早餐 
阿拉上趟讲到到布加勒斯特。阿拉搿只大巴呢是停辣离市区比较远个只叫Militari搿只车站。到市区呢仍旧要坐公交车嘛。搿辰光呢碰着另外只问题，阿拉到达个辰光上半天6点多，所有个货币兑换所还没开。阿拉手高头是没当地个钞票现金个。不过呢阿拉还是先寻着车站嘛，辣海等车子个辰光呢我正好用信用卡买了张公交卡。之前呢阿拉问过个，大罗个公交卡呢是可以两家头合用一张个，所以阿拉就买了一张Activ搿张卡。阿拉进城个辰光正好上下班高峰嘛，所以当中也堵了蛮长辰光个，不过搿种堵嘛，帮上海比起来嘛，小意思唻。 阿拉到达终点站，终点站呢就北站。北站之后呢阿拉就到宾馆去了。为了进出方便呢，阿拉订个宾馆就辣海北站附近，也可以讲是阿拉一路高头最贵只宾馆，因为包括早饭个嘛。所以阿拉之前呢跟宾馆讲过个，因为阿拉第二天早浪向乘七点半个火车，所以早饭吃勿着，阿拉就提前一天早浪向吃早饭。伊拉讲，可以个。本来呢以为介早进勿了房间，就蹲辣宾馆厕所间里向刷牙齿揩面，没想到等阿拉早饭吃好，讲可以进房间了，搿点蛮好个。 刚刚搿个大罗个一路里向放出来个水是勿好直接吃个，勿像之前嘛，一路高头基本上自来水开出来就好吃。葛末阿拉就到房间里去放物事了。放好物事呢，阿拉准备出门。 按照计划呢，搿一天是布加勒斯特一日游。搿几只国家呢，阿拉侪晓得，调钞票千万覅去银行，勿合算，但是罗马尼亚勿一样个。到银行里向调钞票汇率也蛮好。关键是自助调，用勿着排队个。 讲起买电话卡个事体呢，因为之前克罗地亚个教训嘛，我就觉着还是北站附近搿家比较好。本来呢想看一圈啥TELEKOM、 ORANGE咾，但是兜了一圈呢发觉侪勿灵个。关键呢其他哪怕同一只公司个，同一只OFFER，搿只价钿呢都没搿个北站附近搿家低。但是呢等阿拉回去，毛亲女人老早下班唻，所以阿拉大罗全程侪没买当地个电话卡。
▌国家艺术博物馆
▌布加勒斯特大学校舍 阿拉呢全程先到雅典娜皇宫，现在呢是国家艺术博物馆。然后呢就沿了门口搿条路嘛，就叫维多利亚大道一直走。阿拉呢走到只解放广场，就是当年东欧剧变个地方，现在呢，伊个边浪向就是布加勒斯特大学个学堂校舍。阿拉呢还看了路旁边个东正教堂。阿拉小朋友还讲唻：为啥罗马尼亚个教堂里向哪能金子也没？后头来阿拉晓得了。
▌路边的东正教堂
▌弄堂里的小洋伞
▌罗马尼亚历史博物馆 阿拉呢经过只弄堂里向，弄堂里向侪是彩色个小洋伞。蛮好看个。阿拉经过布加勒斯特老城第一装屄个餐厅，叫Caru Cu Bere。当然咾，阿拉没去吃，吃勿起嘛，穷。只不过进去拍照。搿家呢搿点蛮好个，里向还有交关人，也是进去拍照片个，也没赶阿拉跑。
▌Caru Cu Bere 搿家餐厅呢对过有只著名个修道院。修道院里向呢仍旧没金子个。门口还看到两个东正教修女，确实帮天主教个修女是两样个。搿只教堂呢，还有只教堂，教堂呢是辣海步行街内部个嘛。搿只步行街就辣海只修道院后头嘛。然后阿拉沿牢步行街走。
▌修道院
讲起来只教堂呢有只笑话，门口交关人排队，阿拉还来犹豫了，要勿要排队。看到队伍当中呢有只阿拉伯人面孔个小男人（当然咾，肯定是罗马尼亚本地人）。阿拉小朋友讲：侬去问问看伊啊，伊拉做啥排队啊？难末我就去问伊，果然噢，搿只小赤佬瞎热情，伊讲：阿拉排队是为了亲搿只圣像。哦哟，谢谢㑚一家门哦。否则个闲话阿拉戆吼吼排队勿是戆脱啊？
▌教堂 之后呢阿拉走到人民宫。想起来哦，我长介大，好像还没到人民大会堂去参观过噢。不过布加勒斯特搿只人民宫倒好参观个，也勿错。离开老城末也勿远，过一座桥就到了人民宫。搿只建筑呢拨记录为世界高头最大个单体建筑。标志也老好认个，林荫大道到底，就是了。进口呢是需要绕到后头去个。反正门口头搿小警察，我刚刚讲了句Excuse me，已经帮阿拉指进口了。估计晓得搿个辰光，两个老外女个，肯定是到人民宫去参观个。
▌人民宫
▌人民宫参观门票 进人民宫呢要买票子个，40列伊一个人。每个人呢侪拿了张狗牌证明侬是参观个朋友。莫名其妙呢想起搿里向呢有一只像人民大会堂个建筑。当时辰光据说讲齐奥塞斯库到访问国外想到个，我想想要末大概是访问了人民大会堂之后想着个？后头来呢，伊有专门个讲解员嘛。讲解员就讲了，为了造人民宫，齐奥塞斯库呢拿当地搿东正教堂里向个金子全部刮脱，放到人民宫高头。难末呢东正教堂金子拨国家了，难末伊拉好留下来了。但是呢可惜，只人民宫还没用着齐奥塞斯库就拨咔擦了。
▌人民宫内部
人民宫外头呢就条林荫大道，好像世界高头所有个主干道样子侪搿能。人民宫里向有交关灯，勿是全部开个，因为呢讲纳税人侪勿同意化介许多钞票来维护，而且至今都没完工。唉，齐奥塞斯库只赤佬啊，人算勿如天算啊。
▌人民宫外的林荫大道 出了人民宫之后呢，阿拉就去布加勒斯特最老个只公园，唯一一张好看个呢，就是一座桥。因为呢河浜里向个鸭子侪是天朝菜场鸭子，鸽子侪是天朝个菜场鸽子。
▌布加勒斯特公园
▌甜品店Cameradin Fata 出了公园之后呢，阿拉坐公交车去了一家推荐个甜品店，叫Cameradin Fata。搿家推荐个呢是蛋糕。搿家餐厅呢来一家犹太教会堂后头，所以呢搿几个服务生也老像阿拉之前来以色列看到个一种毛毛犹嘛。厕所呢也比较清爽，加上餐厅个蛋糕呢还是隐藏菜单，侬问服务生侪晓得个，会直接拨侬看个，一共四种，价钿侪一样，侪是15块洋钿列伊。阿拉两家头点个是巧克力蛋糕，搿只价钿，搿只味道，来上海噢，绝对是性价比高。
▌巧克力蛋糕 我吃好，厕所出来，终于屏勿牢了，我问搿阿胡子服务生。朋友，㑚是犹太人伐？只赤佬，一只面色也变脱了噢，问：侬为啥觉着阿拉是犹太人呢？我讲，因为我发觉㑚跟阿拉几年前头到以色列看到个犹太人老像个。哎，对方老无语个，伊讲：但是阿拉侪本地人呀！我讲：关键侬阿胡子呀。交关犹太人侪欢喜阿胡子呀！对方也没闲话讲了。伊讲：我留胡子是因为现在行个。好伐。我觉着我老勿好意思个，搿辰光搿内心是肯定来想：侬只犹太人唻。㑚一家门侪犹太人！但我觉着搿天回去搿只阿胡子估计要拿胡子刮脱了。
▌人民宫日落 吃好蛋糕呢，阿拉走到前头电信公司去问，就搿套餐侪勿灵光嘛，又做公交车回到步行街。之前呢，去了只超市，觉着也没啥熟食，算了，还是去步行街伐。车子末，伊个公交车呢停辣桥个对过嘛。所以讲阿拉搿天子呢沿了搿条Gheorghe Magheru搿只搿条路呢坐公交车去了又回来两趟。过桥辰光呢又拍到人民宫个日落，还是蛮好看个。
▌卖相老好个冰淇淋 阿拉夜到呢就蹲了老城附近个步行街解决夜饭个。主要呢看到有家卖相老好个冰淇淋嘛，还像一个法国女郎一样个，还弄只笡个帽子唻，也蛮好白相个。对过呢是青口贝披萨，30列伊一只，阿拉两家头吃饱了。结果呢隔壁有个罗马尼亚女人，看上去勿胖呀，吃了一碗一模一样大小个青口贝意大利面。阿拉侪觉着伊吃勿光，结果人家勿仅吃光了，还吵了要点甜品。没办法，到底基因两样。人家周围搿种一家人家，侪一人一只披萨吃个。
▌青口贝披萨 阿拉呢回宾馆车子高头呢碰着一个91年个罗马尼亚男人。侬相信我哦，只面孔看上去像81年个。然后阿拉随便用英文讲讲，讲讲生肖啥物事。然后碰着一个号称从美国来个罗马尼亚老头。号称讲44年个，看上去还可以伐，毕竟年龄也确实勿小了。大家一路山河茄茄，茄到北站。阿拉问伊拉为啥没从贝尔格莱德直接到布加勒斯特个车子，难末阿拉终于晓得了：因为没人乘。伊拉还教阿拉罗马尼亚文，超级好白相。伊拉呢也是到北站下去个嘛。觉着我只宾馆还是订了比较对个。 摄影：小女生施维雅 口述：小女生施维雅 听写：神死恸瞑 编辑：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 |
|
|
