|
▌堡垒教堂  上趟呢阿拉讲到是阿拉蹲辣布加勒斯特白相了一天。然后第二天呢阿拉就要到布拉索夫去了。阿拉本生个计划呢是车票先到西耶纳，然后呢再从西耶纳到布拉索夫。实际票子阿拉之前已经全买好了。阿拉火车呢是早浪向七点半个，所以讲呢搿天子阿拉老早就起来了。到北站门口呢就去买了点面包吃吃。实事求是讲，搿罗马尼亚个火车真心龌龊。就让我想小辰光老早红皮车啦，就是比绿皮车稍微好一眼眼个种。不过呢，搿玻璃是龌龊是龌龊得来。搿呢检票个老爷叔呢就看看阿拉搿个打印出来个车票嘛，看一看，也没讲啥。 虽然讲是IR，就是讲快车嘛，但是呢也勿是直达个。当中呢也停了几站。搿罗马尼亚火车有一点真个刮三。勿报站头个，侬自家判断侬啥辰光下去。阿拉呢只好按照搿只离线导航个位置呢判断是勿是下去。 阿拉两家头睏脱一歇，心里想还早，所以讲呢导致了搿事体。灵异哦。明明前头一站显示出来离开西耶纳还有老远个地方，结果呢后头一站就发觉已经过脱了。我问罗马尼亚个男个，坐辣对过，对过，伊讲，果然已经坐过站了。哎哟，刮三唻。我问罗马尼亚个男人，哪能办？伊讲，要末那坐到布拉索夫去再讲伐。反正搿部车子个终点站是布拉索夫。葛末到了布拉索夫之后呢，问搿毛亲老阿姨，还有张还没用过个西耶纳到布拉索夫个车票能勿能够改期或者退票。搿老阿姨一看阿拉网购个搿车票哦，竟然莫名其妙生气伊讲，哇啦哇啦穷叫唻，线浪向买个，勿好改期，勿好退票。好伐，我错脱了。既然事实已经搿能介末，阿拉只好也搿能介唻。葛末先到宾馆里去伐。 搿只宾馆呢是阿拉全程离开火车站最近个只宾馆。因为呢就来火车站楼浪向。按照伊拉之前跟阿拉讲个，阿拉先到火车站个自助餐厅。一看到阿拉两家头拖拉行李箱，两只老外女人，搿罗马尼亚老阿姨，马上拿一个罗马尼亚小女人叫来。搿只小女人就带阿拉付钞票上楼。搿只宾馆呢其他侪老好个，感觉就是原来个火车站招待所。因为搿剧变之后嘛，就承包拨个人了。唯一个勿灵是啥呢？就是勿好寄行李个，后首来呢所以阿拉只好到火车站，另外收费寄存行李。 本生呢阿拉看到有一部公交车，到布拉索夫郊区个赫尔曼堡垒教堂。搿只教堂也是世界文化遗产嘛。结果阿拉哪能都寻勿着搿部公交车辣啥地方。问了一大圈，还是到布拉索夫一号汽车站，就火车站隔壁搿只去问个。阿拉忽略脱跳过交关想拉阿拉生意个差头老爷叔。问了一只车站门口门房间老头，终于讲拨阿拉听。有得部车子到赫尔曼个，十五分钟之后发车。 搿辰光阿拉，我真个屏勿牢了，车站个牛奶又小又贵。所以阿拉决定去火车站旁边只mall超市里向买。我还为了搿，辣海伊搿老低个汇率调了廿块洋钿列伊，就是为了买便宜个牛奶。讲老实闲话，我问搿收银员，搿是牛奶伐？只赤佬讲是个，结果打开发觉是酸奶，噢哟。头昏哦，阿拉小朋友讲覅吃，覅吃算了。 阿拉呢等发等发，哪能车子还没看到，就问老爷叔唻。老爷叔指了前头一部勿晓得啥地方冒出来个一部老破老破个公交车，就像八十年代辰光上海个公交车搿种车子，巨龙车搿种。讲，就搿部。我看了挡风玻璃高头用手写了一张纸头嘛，高头写：Harman。想想应该对个。 但是问题又来了，里向坐了几个人，门锁辣海，驾驶员勿见脱了。阿拉跟一个罗马尼亚老爷叔跟一个罗马尼亚老阿姨。阿拉本生以为是夫妻两个。隔手结果发觉勿是。阿拉三家头侪来门口头等。不过呢，确定搿部车子是去赫尔曼个就可以了嘛。过脱歇，一只老胖老胖个一只驾驶员来了。驾驶员开门呢是直接拿搿车子旁边只小门打开，里向还有只机关伊讲。机关打开，然后再门开开来。噢哟，忒刮三了，搿部车子忒破了。 阿拉坐了车子高头呢，突然之间刚刚一个罗马尼亚个老爷叔拿外套脱脱了，然后呢，屏勿牢了，伊问阿拉：勿好意思哦，我问问。那两家头去赫尔曼做啥呢？阿拉两家头讲，阿拉想去看堡垒教堂。搿大叔一惊哦，哦伊讲，搿勿就是阿拉屋里后头一只嘛？搿有啥好看个啦？我讲，哦，搿是世界文化遗产。搿老爷叔只好讲：哦，好好好。 搿老爷叔热心蛮热心个，还帮阿拉指路唻。还帮阿拉讲，回来个车子一个钟头一部，每个整点发车。当时辰光是11点50分，伊估计也想勿出，搿里向实在有啥好看，还帮阿拉讲那好十二点钟个车子就好回去了。本生呢阿拉还想去另外只堡垒教堂，辣盖Prejmer。结果呢搿老爷叔讲了一句超级经典个闲话：伊讲Prejmer就是阿拉隔壁头个只小镇，不过没直接车子好到个，阿拉一般性侪是先回布拉索夫，然后再坐另外部车子到Prejmer。哎，好，就是阿拉本生以为互相勿睬是天朝个特色。现在发觉勿是个。
▌堡垒教堂近景 车站下来呢，果然堡垒教堂就辣阿拉眼睛前头嘛。阿拉看搿老爷叔蛮热心个，硬劲送只礼物拨伊，不过呢搿老爷叔是阿拉全程唯一一只拒绝阿拉礼物个人。伊讲伊用勿着，哎，老爷叔真个是好人啊。
▌晒太阳的奶牛 教堂门口呢，还有三只牛牛辣晒太阳。就是我比较欢喜搿种欧洲自由散漫个牛嘛。所以讲我觉着伊拉个奶牛还是蛮好吃个。搿牛奶，勿是奶牛。
▌堡垒教堂的介绍 堡垒教堂呢是之前德国人辣海个辰光留下来个只新教个教堂。跟外头个罗马尼亚人呢侪隔绝脱，所以讲呢教堂外头呢造了只堡垒，做防御用。门票呢10个列伊。老爷叔呢心里要是晓得要付门票，更加想勿通唻。然后呢搿只教堂还拨只介绍。莫名其妙让我想起一只亚眠的儒勒·凡尔纳博物馆。就搿只博物馆嘛，凡尔纳博物馆。
▌斑驳的壁画
▌教堂内景
▌钟楼 教堂里向呢还有斑斑驳驳个搿种壁画嘛，还用个老早子个德文嘛。搿教堂钟呢现在辣海用。钟楼高头呢到处侪是支撑架，觉着有点年代了。教堂后头呢，种了棵苹果树。阿拉前头两只狗粮还想摘苹果唻，搿苹果又没熟，勿晓得伊拉算啥意思，没啥好吃头个。
▌苹果树 本来呢攻略高头讲有几只披萨店。然后呢，阿拉肚皮实在饿了，兜了一圈，发觉小镇里向只有一家饭店。而且搿家店里向个物事没啥我要吃个。就想想回到布拉索夫再去吃伐。结果当时辰光一点廿分左右，下头部车子是两点钟。兜了一圈，小镇物事侪老贵个。小镇呢还有交关好像没啥事体做个吉普赛人，还是有点吓咾咾个。但是也没其他办法啊，只有等。发觉呢，小镇个人是搿能个，刚刚只胖子个车子呢过来了，搿车子个声音听到了之后呢，搿小镇个人再陆陆续续出来。当时呢搿部车子高头还有交关小朋友，伊拉放学蛮早个嘛。可能我想搿镇高头个学堂蛮好个，因为有交关小朋友屋里住辣布拉索夫个。
▌堡垒教堂外景 从布拉索夫个汽车站到布朗城堡呢还是要坐公交车个。不过呢也没几站路，就到体育场下来。貌似阿拉好像记得搿点市内个公交车嘛，全部侪逃票。也勿是阿拉存心要逃票，因为实在寻勿着啥地方好买票。等车子个辰光呢，冷陌生头碰着一对夫妻带了小人，先是女个带了小人朝一个穿了老妖个女人哇啦哇啦穷叫。但是呢搿妖女人呢好像也勿是针对搿女个，而是针对其中一个男个追牢仔打，还用扫帚去打伊。男个好像想抽搿女个，后首来拨一个身材比较结棍个，模子比较结棍个一个男个挡牢了。没想到呢搿妖女人呢拿了把老大个扫帚想打搿男个。反正，全程侪罗马尼亚文，阿拉勿晓得是啥剧情。
▌车票 车子到体育馆下来，下来对过就是2号站，2号汽车站。搿搭有得到布朗城堡个车子。阿拉来埃面蹲了没多少辰光，结果呢交关车子一淘到了。我老开心个上车，帮驾驶员讲：我到布朗城堡。司机指了旁边一辆讲，指了旁边一部车子嘛，伊讲旁边一部再是到布朗个。哦，好，阿拉只好下车再上车。车票跟之前到赫尔曼一样，是蹲辣驾驶员搿搭买个。票价8块洋钿。刚刚我讲个嘛，正好放学辰光，看到交关学生子。 车子开了老长老长辰光，穿过交关山，再到布朗城堡。本来阿拉要顺带便上厕所个，结果发现要钞票。好，直接到城堡里向去上。其实呢，当时辰光已经超过四点钟了。我还问唻，哎，朋友，那啥辰光关门啊？售票处老无语个讲：阿拉已经关门了。好，sorry。啥人叫那还卖票啦？那关门末好覅卖票了。
▌《怪鸭历险记》的南妮
▌《怪鸭历险记》的Duckula伯爵
▌《怪鸭历险记》的伊戈尔 布朗城堡呢就是阿拉老早小辰光看个只《怪鸭历险记》里向一只Duckula城堡个原型。城堡里向有交交关关小项目。其中还包括台巴子个。据说讲呢，搿里向住个是真个Duckula伯爵。其实伊帮吸血鬼也是勿搭界个。城堡里向还有交关德国小朋友，想造吸血鬼个气氛。但其实对阿拉来讲，阿拉是为了小鸭鸭来个，没啥吓人，只有搞笑。
▌布朗城堡外观
▌《怪鸭历险记》主角合影 阿拉跑到城堡外头来呢，看看好像只城堡帮动画片里向只Duckula城堡还是蛮像个。然后呢搿只城堡里向个警示标志也帮吸血鬼搭界个。
▌Dracula伯爵 讲起来阿拉出来之后，看到有两只狗粮上去。不过售票处已经下班了，估计是为了逃票。跟赫尔曼比起来呢，布朗老明显是闹猛个。
▌烟囱卷
▌巧克力饼干 阿拉决定去吃想了老长辰光个烟囱卷。讲起来搿卖烟囱卷个搿只小赤佬呢是82年个，虽然长得来老，72年都比伊年纪轻，我觉着。阿拉后首来去了布拉索夫老城嘛，觉着烟囱卷还是布朗便宜点。搿只小赤佬呢没结婚没女朋友，搿只店应该是伊拉姆妈个。阿拉送伊只礼物，伊也送阿拉只巧克力饼干。搿巧克力瞎厚，而且瞎好吃。我问伊那为啥写希伯来文，伊马上澄清讲因为以色列人来得多，言下之意是伊拉是犹太人，我勿是犹太人。搿只烟囱卷瞎大，比阿拉人还大。上海阿拉看到过，价钿差勿多个，不过大小差交关。搿搭选择还多，阿拉选个是巧克力味道，比我只手还大。吃个辰光呢，隔壁小朋友还哭，阿拉送了根 天朝棒棒糖拨伊。哎，其实就是趣拿APP拿个。反正就是勿要钞票个。小朋友从来没吃过介好吃个棒棒糖，竟然勿肯松手，穷嗍唻。爷娘谢谢阿拉。
▌巨大的烟囱卷 本来呢阿拉想等车子回布拉索夫个，结果搞笑唻，开来一部差头，问阿拉是勿是去布拉索夫。阿拉讲阿拉想乘公交车，伊竟然帮阿拉讲，公交车帮伊一只价钿。刚开始辰光，阿拉是怀疑个。不过后头来拨便宜冲昏头脑上去了。上了车子呢，我怕伊加价钿，马上送伊一只礼物。搿只小赤佬91年个，到布拉索夫去约会去。伊接到礼物激动得来勿得了。搿记阿拉放心了。本生阿拉还打算一有勿对就跳车。 伊还讲唻，伊讲伊拉埃面个路莫名其妙修了两三年。而且每天就早高峰晏高峰修，其他辰光勿修个。我想搿点好像帮阿联酋沙迦有点像。我终于晓得为啥阿拉来个辰光搿条路会得穷堵八堵了。伊讲伊女朋友也是布朗个，但是蹲辣布拉索夫读大学。还98年个，我想想，噢哟，搿岁数哦，阿拉已经老了。伊去布拉索夫老城去就是帮伊约会去个。我想正好，阿拉也去。伊显了老开心个嘛。拿阿拉一直送到布拉索夫著名个黑教堂下头。
▌布拉索夫黑教堂 其实呢搿布拉索夫后头嘛，一座山高头，用灯管写个就是Brasov。但是呢人家明明老骄傲个，勿晓得为啥，拍出来就是一团，啥物事也看勿出。
▌布拉索夫老城钟楼 布拉索夫老城市中心有只钟楼嘛，钟楼个市政厅还有得免费饮用水。传说讲呢搿搭有得中东欧最狭个路，叫绳街。不过覅上当。搿只，搿条路，我两只脚𤖼开都绰绰有余。只好讲东欧人模子忒结棍了，一眼也勿狭个。还有是白塔，白塔阿拉后首来第二天去个嘛。阿拉后头来沿牢主街一直走到车站，讲起来当中经过片墓地哦，夜到有点吓咾咾个。不过老外毕竟是老外，一家老小蹲辣墓地个门口长凳高头休息，小朋友还白相叶子唻。哎，果然文化勿一样。
▌绳街 回去之后呢还早，阿拉还去火车站附近只超市嘛，就早浪向阿拉去买牛奶个只，逛了一圈。根据超市促销个DM嘛，阿拉寻了超级便宜个物事。买了交关，包括第二天早饭也买好唻。 摄影：小女生施维雅 口述：小女生施维雅 听写：神死恸瞑 编辑：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 |
|
|
