|
小辰光亇嘉定城
▲西门城墙  出娘肚皮，睁开眼睛，头一样有印象亇物事，是嘉定人民广播电台后头亇伊棵大灵眼树，好像是眠著宿舍床上望出去亇视角。我亇人生记忆从此开始。 小辰光亇主要别相场子，就是广播电台大院内外。一般全是一个子别相，撘人俦不大大搭界亇，专门撘両只动物俦打交道亇。蚱蜢是捉著不晓得几几许许，还有蜻蜓、扛蜗娘嘞啥。头一趟看见豆娘是觉着神奇得不得了！独觉着像支小哝哝亇箭塱草里乡一歇儿悬停一歇儿前进，惊要眼睛定牢著么看得见翅膀。还有各式各样亇麦蝴蝶，常庄飞到东围墙上从县政府大院里拖出来亇点花上，特别是伊种青亇，好像叫樟青凤蝶，还有伊种黑嘞个大亇，好像叫玉带凤蝶，来得亇欢喜，凑佢停下来么只手慢慢较伸过去，到著合适距离利用爆发力“啪塌”声嚷一记么就捉牢啧。后首来徒手捉鸟、捉鱼亇功夫轧实全广播站门口头练出来亇。现在想来也蛮罪过，远望望么好啧，咋嘞板要去捉牢著看？不过说明廿世纪八十年代末九十年代初亇辰光，嘉定城里轧实是颇有野趣亇一个世界。昰个也是我晚转来从事自然工作亇一个启蒙基地。
广播电台西围墙脚里是条南北河，塘西边像是居民区。有趟我一如既往亇塱塘东边探索自然，突然之间听见塘西边“啪”一记枪响，乃么“啊”一声惨叫，望过去么独看见一只黄伯劳从塘浒上棵树上落下来，乃么“腾腾腾腾”连忙跑过去【目沙】！结果跑过去著话连根鸟毛也朆觅着，倒是有个男人塱边头问我阿是来寻只鸟？我话是亇呀！乃佢也只是笑笑，阿会塱想：“个喥拖牢洞，待佷跑过来是老早畀人家镊著去亇啧！” 嗰辰光阿蛮多有人居著气枪打鸟亇咾！记得城中路上影剧院门口头点树上垂夜快是麻雀儿兴得嗞哩喳啦闹得！看见有人掮著枪趤发趤发。老底清河路城中路路口西面点路南带边西餐馆边头有得卖烤麻雀儿吃亇，不晓得阿就是边头树上打下来亇。嗰歇儿头儿像煞介仔算相当不错亇小吃啧！ 乃么边头昰爿西餐馆么阿是也算嘉定地面上亇高档饭店啧？大人要奖励囡细么就许佢：“表现好么领佷到西餐馆去！”不过当年西餐馆里吃亇啥物事是哪恁不大有印象，不晓得头一趟吃紫菜汤阿是塱西餐馆里？还是塱边头吃麻雀儿摊头上？横有样物事是记忆深刻，就是牛蛙。跑到西餐馆里么就留心昰両只老不打。我么老底别相，树上、地下全有三件套——树上么树讯、蚱蝉、钥匙蛋，地下么田鸡、癞团、蛤壳子。看见蛙类动物么来得个开心，外加还昰恁大嘞！后晚来养著只牛蛙，六楼阳台上跳下去，捉上来著又跳下去，乃下去【目沙】【目沙】是一样零件也朆寻着啧，哪恁跌不杀亇话？
西餐馆朝东开门口亇嘞，正好对牢个影剧院。影剧院嗰辰光觉着像圣地一样，看啥电影、有啥活动么巷巷尽尽亇人全涌到昰滩。门口头亇雕塑倒从小到乃一直朆变。老底广场上还有开碰碰车亇嘞。小辰光曹妈妈常庄领我到佢垯屋里亇，就是影剧院南面昰点房子里，趟趟来么总贯要乘碰碰车。著曹妈妈垯屋里印象最深亇是做冰块嘞棒冰。老早冰箱里阿是有伊种格子亇？水加著塰冰箱里放一昶么就变成功冰啧。若是自家调制么就可以做成功甜味冰块或者棒冰。不晓得现在大家屋里阿用啧？横对我来讲，昰个也像是八九十年代遥远亇记忆啧。 影剧院戳角对过，就是顶天立地亇钟楼，当年亇嘉定制高点。顶上亇摩士达大钟，到著整点著么就要“****，****，&，&”。不晓得啥辰光开始不敲啧，现在想想真怀念啊！钟楼底下，就是新嘉商场，印象里嗰歇儿头儿阿是嘉定最大亇商场啧？ 新嘉商场朝后，现在罗宾森广场亇昰只位置么是当年亇体育场。不过哪恁我有印象亇辰光只体育场像已经不大用啧。倒是有一趟记得天上有巷尽降落伞，阿是一趟跳伞表演？不晓得着陆点阿就是体育场？独记得嗰趟外公外婆出来著伲塱，外婆么著垯鸡冠花上刮眼种子嘞要归去种，天上么降落伞塱飞。就昰恁一眼模糊亇印象。 我伲嗰歇儿头儿广播电台宿舍里出来著么就住著棵大灵眼树后头嗰埭房子里，好像要从城中路上县政府大门里进去亇，好像是传说中亇7号楼。小区环境蛮好亇，绿草茵茵，鸡冠花嘞美人蕉嘞昰排种著交关。东面远不多么话起阿是县政府食堂？我伲爷总贯行我自家冲上去买馒头。印象里垂夜快么有両个老伯伯、老妈妈排著食堂门口做操嗫练功亇。有趟我也伏著门口头看，朝上望望么蓝天白云赞得来！乃么开始青白日里做梦，幻想天上一只白天鹅飞下来也让我骑著天上去看看。不晓得哪恁算头话昰个思路哪恁全撘癞团一样亇？！ 我嗰辰光幼儿园么著老体育场对过，城中路东带边，红卫幼儿园。一般么总贯伲爷踏我去亇，坐著部破脚踏车档上，一小瓶酸奶么总贯老排场，到快著么効准路脚跟只垃圾筐厾进去。有趟厾进去话根吸管“拔”声嚷一记像根箭恁射出来！后晚来搬到李园一村著么从东面过来亇。印象里路上有一段是弹街路嘞老房子，不晓得阿是北大街。记得冷天色一埭边看老房子顶上亇雪，还有屋檐下头荡出来亇凌落，像童话世界一样。记得我伲幼儿园阿是著北面温宿路上有只分部亇？阿是小班塱伊面读亇？记不清爽啧。横记得有趟我伲一个班级坐著温宿路边头亇场地上折纸。 有点不晓得为啥，幼儿园里囡俦里竟然已经全用北京语音交流啧！现在想来简直匪夷所思——一大群本地囡，竟然全用外地闲话别相得开心得！八十年代末已经出现昰种情况啧。九十年代初搬到李园一村，楼里両个大阿哥也全普遍讲外地闲话啧嘞，只是场时脱句把本地闲话出来。到著小学里是愈加亇啧，竟然禁止使用本地汉语！本地校长还塱喇叭里全校广播嘞：“啊，不仅学校里不要讲上海话，到家里也不要讲上海话，也要讲普通话。有的家长可能要说了，怎么家里也不要讲上海话了？哎，家里也要讲普通话。”昰个当年全校一千号人全听好亇，我不敢保证记着亇全是原话，但大致亇闲话就是昰恁亇。 现在想来，我塱嘉定城里亇童年，真亇是一个本地汉语极其贫乏亇童年，回忆撘同龄人俦亇交流，几乎吊不出乡音亇记忆！直到高中，碰着一大坒一直乡下头读书亇同学，乃么刚刚开始有稳定、持续亇同龄人亇本地汉语语境！ 佷话我伲亇乡音，我伲典雅亇本地古典汉语是哪恁绝脱亇？就是从校园语境崩溃开始亇，就是从一大群本地人也不讲本地汉语开始亇。不得不话，嘉定城，著推普片面化亇道路上，扮演著一个急先锋亇作用。以至于到著今朝，只有我伲少数人还有能用千百年来传承至今亇本地古典汉语来完整记录、讲述我伲昰片土地上亇风土人情而不需要依赖外地闲话表达啧，实在是悲哀！ 搬到李园一村之后，活动中心自然而然转移到著城东北。当年亇小区里还有不少烂泥地，现在看来不算完善，但当年倒是我伲両个囡细重要亇别相场子，特别像踢足球、打羽毛球嘞些儿活动，板要昰排空地亇。小区里雪松、马尾松、广玉兰、冬青树、棕榈树、迎春花嘞昰排蛮多亇，种花亇人家也不少，草地么是伊种矮短短、叶头圆哝哝亇小草，我伲蛮多欢喜坐著上亇。现在想来环境是蛮好亇。 前几年上海城区一家人家拍着蜂鸟鹰蛾是当新闻一样电视里放出来亇，但像伲嗰歇儿九十年代塱嘉定城里看见昰种神奇亇物种並不稀奇亇，我还捉着歇一只嘞！本来道著是蜂鸟，结果手心里钻出一只麦蛾面孔，大失所望。 小区东横头环城河上有只沆头，上头人家还种菜嘞！环城河外头像是只蛮大亇宅坨。著21号六楼上抄东北望出去么外头全是乡下头房子，我还塱看有埭哪恁撘外婆垯像得来！后头24号房顶上么有只鸽子棚，常庄看见有个人著房顶上放鸽子亇。嗰辰光养鸽子像蛮行亇，到块看得见亇，有趟著曹妈妈垯塔城路上7楼亇新房子阳台上也看见一群鸽子著塔城路上盘旋，也是一道独特亇风景线。 刚到李园一村嗰歇儿，21号门口场地东北角里环城河上有只堆场，点黄沙、石子堆得蛮高亇，伲爷总贯领我上去别相亇。有趟天不亮领我去看“凌晨”。啥个是凌晨？嗰歇儿头儿是稀莫弄懂，豆里麦里也朆搞清爽嘞！ 只堆场对河，好像是只石灰码头，总贯望着白搨搨一滩。现在阿昰排堆场嘞码头嘞全不看见啧，全变成功著环城河绿化带生态步道啧。昰个作兴也是城市产业转型亇典型变化，阿就像老底工厂林立亇黄浦江、苏州河浒全改造成著生态步道一样，还河于民。我老早就一直欢喜沿塘浒走，常庄墫著环城河上亇。李园一村西北角阿就是北城河桥咾！本来桥脚里东带面有块地部朝河里掷出来亇，形成一只嘴，我蛮多欢喜伏著嗰塱看风景亇。船开过么浪头正好打著昰只嘴撘边头石驳岸亇湾荡塰墪，也颇有眼意境。嗰歇儿三不两时还有拖轮拖著巷尽船开过嘞，印象里大概拖十只有亇。现在哪恁全不看见啧？记得九十年代末，热天色有辰光只嘴塰墪歇著交关小哝哝亇卖西瓜船，垂夜快望过去倒也颇有眼渔舟唱晚亇意境。不过不是渔舟，是瓜舟，外加也不唱亇，要么叫卖。印象里点卖西瓜人像勃到北城河桥上卖亇，横交通要道，人流量大呀！热天色伏著桥上吹风凉亇人也蛮多，胆大亇両个是直接人朝外坐著桥栏杆上，啥人要恶作剧替佢垯后头一搀么“共㗢”声恁！ 北城河桥本来狭哝哝亇呀，后晚来放阔亇，应该是1997年亇辰光，印象蛮深，因为嗰趟正好是三千年一遇亇海尔波普彗星光临亇辰光，我正好五年级第二学期。夜头交关同学合著一俦出来著桥塰墪看彗星。桥么还塱施工，一块用来拦起来涿水泥亇阿是叫拦壳子亇施工用具像跳板恁从桥脚里搁到桥面上，乃我也像古代攻城爬云梯一样从昰块物事上爬上去，嗰歇儿头儿话哪恁胆大得来！万一一个不稳么“拔塌”声嚷跌下来！一个民工想喝牢我嘞爬也爬著上去亇啧！ 东桥脚里昰块地部，记得九十年代初也是一块烂泥地，光场滑地，呒啥物事亇。后首来撘桥俦平行亇昰条南北河上种著眼绿化，到著三春头上是各种颜色好看得，嗨！有辰光撘几个同学俦到昰滩打仗厾烂泥，背靠大桥，隔河对战，只有部水闸桥出进，倒也是易守难攻亇好场许。 轧实最早打烂泥仗是从家东头只种菜亇沆头上开始亇。只沆头朝新村里亇昰面蛮巉亇，看上去倒像老底亇城墙，乃么两帮人一帮上头守城，一帮下头攻城。巉亇面上有两条像脚滩恁亇通到顶上，我伲常庄练著冲锋冲上去亇，嗰辰光倒身手还可以。不过上头种菜亇老人意见蛮大亇，终成恐替佢垯点菜踏脱！有趟伲两楼上亇兄弟拿著管仿真枪著沆头上别相，畀亇老头子管枪也厾脱，我看著把枪飞起来亇！ 大概98年、99年亇辰光，我六年级升初一嗰歇儿，只沆头开始改造，両个民工挖脱著眼嘞我看见下头哪恁有一大块砌好亇石头，心里想，不对喂，昰个是城墙喂！乃么连忙跑到孔庙门房上去报告。不过后首来轧实厡旧一如既往亇施工，只沆头削得像小山头恁种著草皮嘞顶上行著只亭子。现在环城河内圈步道打通著大家跑过去全看得见亇。不晓得点城墙脚阿塱下头啧。 嘉定是座饱经历史沧桑亇古城，若然现在的轱轳圆亇城墙也像全国仅有亇的轱轳圆亇环城河一样保存完好，嗰是赞得不得了呃！乃呒办法，历史上绝脱亇物事多嘞！只好看看开㕹！不过还好，几只角里还铤剩一眼城墙。到著初中好踏脚踏车著么乃开始饶角落子兜，其中一个重要内容就是探访城墙。一直听见话西门还有一段完整亇城墙，乃么摸过去【目沙】，倒是就看见只西水关亇，立著上头蛮有感觉亇！沿塘浒两面【目沙】过去么点保存好亇城墙倒是全看见亇，蛮有眼沧桑感亇。 看罢著西门么其他几只角落里也去【目沙】【目沙】看，结果塱南门话发现著还要宏伟亇南水关！只城关赞！傍西水关大脱让些儿得嘞！立著上头看牢城河、横沥只滔口，简直难以想象老底哪恁打得上来亇！好物事要分享！乃是合著両个小学老同学考好试著一俦踏著脚踏车来看，像一本正经亇春秋游嘞！结果初中一凳上亇阿胖替我划著盆冷水：“阿昰点古代亇啊？我看佢造起来亇嘞！”伤！心！乃横随佢老亇嗫新亇，有能看见昰恁只物事体验体验蛮好啧。嗰辰光阿环城河浒上不像现在昰恁打通兜得转亇，从点小区里七曲八绕摸进去还是颇有探索、发现亇喜悦亇。
▲州桥 一座古城，不单只有古城墙，当然还有老街古路。我为著长期住著李园一村亇嘞，边头亇东大街顶顶熟悉。一长条老街，白墙黑瓦老房子，夹牢一条弹街路，赞透赞透！我一直到东门理发店去轧头亇。现在想来，伏著轧头店里听外头脚踏车、黄包车踏过，著弹街路上“极呖搁落”亇声气真亇回味无穷！可惜还朆来得及仔细品味就拆脱啧。本来是从东门一拔直朝西到州桥到西大街是一条长街赞得不得了！外头亇支古镇是稀奇也不稀奇亇！乃呒办法，现在是拆得干干净净一点也呒曼啧！西门阿也是练祁塘南点老街也拆脱著造房子。文化人是看得肉麻透肉麻透！痛心疾首，趒脚踏地！乃呒办法，大多数人全是一切向钱看亇，只要当前看来觉着弄不着铜钱亇，就是呒用场亇，厾脱么好啧。昰个是有相当广泛、深厚亇群众基础亇： 点老房子破破亇，不派用场啧，拆脱！ 点老家生旧旧亇，不派用场啧，烧脱！ 点老闲话土土亇，不派用场啧，厾脱！ ………… 昰个内在逻辑全是一样亇。今朝嘉定古城风貌亇残缺，今朝嘉定古典汉语亇崩溃，应该並非只是少数管理者亇问题。 （未完待续） 疁·浏河长江 2018年8月29号 礼拜三 戊戌年 七月十九 嘉定建县800周年 朗读：疁·浏河长江 图片提供：江南望北 排版：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 |
|
|
