|
人口流动势不可挡
▲松江东门小武松 摄于松江天马山  常庄看见交关人骂外地人，发泄对外地人大量涌入吤不满。作为本地人，虽然可以理解，但也实在觉着昰种做法忒个缺乏理智啧。佷想，侺骂，不单不可能改变外地人大量存在吤现状，反而加深著人群矛盾，恶化著人群关系，实在是一种不明智吤做法。 随著社会吤开放，人口吤流动，地域矛盾作兴是一个不可回避吤现实问题。但是，若然称让昰种矛盾发展下去，势必会影响人群关系撘社会和谐。轧实，大家冷静下来仔细想想看，社会为啥会昰恁开放？人口流动为啥会昰恁频繁？拆穿著讲还不是我伲每个人亲手造成吤？问题在于，交关人只晓得讨厌外地人，却丝毫不曾意识着自家恰恰就是使得外地人有能垃本地生存吤支持者，实在是可悲可叹！ 有吤人作兴不服气：侺全可瞎话！我哪恁支持外地人啧？覅憝，覅憝，听我落落慆慆讲下去。 首先从外地人吤角度来看，佢到本地来，要立定脚头，需要何里排必不可少吤条件？ 一、有能撘本地人俦交流。 二、有能垃本地有个居所。 三、有能参与到本地吤经济活动中。 昰三个条件缺一不可。 若是本地人拒绝撘外地人俦交流，只要听见外地言话拒不搭理，外地人完全呒能参与到本地吤社会生活中来。 若是本地人拒绝出租房屋，拒绝提供旅店、宾馆撘宿舍，外地人就呒落脚处，呒蹲身处。 若是本地人拒绝外地人工作，拒绝撘外地人俦买卖，拒绝一切撘外地人俦吤经济活动，外地人塱本地就呒曼收入，也不可能获得必需吤生活用品，就根本呒能塱本地生活。 当然，昰三点，实际上也是你中有我，我中有你，相互联系，密不可分吤。 乃么我伲再来看看本地人吤表现。 一、外地人来搭嘴，本地人会接嘴。目前为止我还朆看见啥人听见外地言话坚决、绝对不理着吤。不单接嘴，外加还会用外地言话去回应，嗰对外地人来讲愈加省力啧——只要塱老家学会著全国通用吤外地言话——“北京言话”，就有处塱本地畅通无阻啧，本地人也已经外地化啧，对于外地人来讲已经无所谓融入不融入啧。撘外地人俦坚决只讲本地言话吤人阿有？有也有吤，我看见歇，但只有个别。不过不管哪恁，佷撘佢俦叫应啧，对佢就有用场啧，无非就是要适应适应咾！近代吤上海就是一个活生生吤例子——外地移民远远超过著本地土著，但当时辰光“北京言话”还朆塱全国完全行开，而各支移民也势均力敌，最终吤结果就是大家全使用著迁入地上海吤言话。总数，所有个本地人全会撘外地人俦交流，外加使用外地言话来“迎接”外地人吤本地人已经占著压倒性吤优势，垃网上乡是愈加吤啧——几乎所有吤本地人全只会讲外地言话，实际上垃网上乡基本就不存在本地人啧——但即使像讲不来外地言话吤老头老太，为著卖脱一眼破【劳少】【曹少】，照样也会得用本地言话撘外地吤拾垃圾人俦对话，嗰么，外地人照样可以获得佢所需要吤物事。 二、外地人来寻找落脚点，本地人会提供。外地人要借房子，本地人只要有合适吤多余住房，几乎肯定会借——换眼铜钱用用，何乐而不为嗫？开栈房吤嗫？不可能不拨外地人住吤咾？开栈房吤意义不就在于为旅客提供住宿咾？ 三、外地人想参与本地吤经济活动，本地人全乐得其所。外地人来应聘，本地人会用。外地人来招工，本地人会去。外地人来购买商品，本地人会卖。外地人来出售商品，本地人也会买。乃么像种田、修路、造房子嘞些儿本地人不想做吤体力生活是恨不得统统包垃外地人做，自家单只想坐享其成，嗰外地人自然会蜂拥而至。 昰三点一讲清爽，我想佷终也用不着再骂啧【口圼】——一切吤一切全撘我伲自家俦有密切吤联系。乃么为著不是所有吤人全有条件替外地人提供住宿吤，故嘞交关地域喷子拿怨气全发泄垃房东身上，却丝毫看不见自家吤“贡献”——语言交流、经济联系，昰两个必备条件是每一个本地人全逃不过吤。若然我伲拿上头昰三个大点分解为一系列吤小问题，佷来盘盘看自家占著几份： 1.外地人来搭讪，佷阿睬？睬，佷阿就是支持著佢垃塱本地立脚？佷撘佢俦叫应，撘佢俦共事，撘佢俦做生意，撘佢俦轧朋友甚至谈朋友、结婚，佷阿是帮助佢垃【土耷】本地获得完整吤社会关系？ 2.侺阿会坚决不撘外地吤同学、同事俦叫应？会，佢就有能正常吤垃昰个集体里生活，饶佷偷【辶\半】骂人家么啧！ 3.佷吤亲眷、朋友、同学、同事若然理着著外地人，佷阿会撘佢俦绝交？不绝交，佷不就等于纵容佢帮助外地人？ 4.也覅话活大到乃啧，就昰一年里乡好啧，侺【阿曾】讲歇外地言话？撘啥人俦话？撘外地人俦，阿就是支持佢？撘本地吤同学、同事、俦伴、囡庶俦，阿是为著开辟一个外地言话吤世界来欢迎外地人？ 5.学堂里全教外地言话吤，远吤“伦敦言话”，近吤“北京言话”，侺阿罢课？阿抵制？接受，为啥接受？为著撘外地人俦交流？为著帮助外地人来本地生活，还是佷也想跑出去做外地人？若然佷也想出去吤，又哪恁怪得出人家要想进来？除非条件对等交换——本地人坚决不出去，以此换取外地人也全覅进来。 6.佷屋里有空闲住房，外地人来借，侺阿借？借，阿就是替佢提供蹲身户荡？佷若然是开栈房吤，阿会得只许本地人入住？不会，嗰不就是帮助著外地人？ 7.佷若假是领导、老板，佷阿用外地人？用，佷不就等于为佢提供著经济来源？佷若假儿有宿舍是还要提供住宿嘞！ 8.外地人开饭店，侺阿去？去，不就等于养活著一大坒外地服务员撘佢【土耷】吤外地老板？外加伊排越是有外地特色吤饭店还越是吸引本地人嘞：“呴，何上伊爿饭点何上人开吤，蛮正宗吤，阿去吃？”交交关关本地人办事体全放垃有交关外地服务员吤大饭店里，也朆听见啥人话昰恁要养活外地人吤咾坚决不参加吤。嗰佷还怨啥外地人多嗫？ 9.外地人开水果店，侺阿去？外地人开发廊，侺阿去？超市里用外地员工，侺阿去？去，不就等于养活佢【土耷】？ 10.外地人造吤房子，不管单位吤、屋里吤还是何里吤，侺阿用？用，【弍两】吤外地民工撘佢【土耷】吤外地老板就有能从佷身上获得经济收益，佢【土耷】为啥不来？乃么交关本地人还妗嘞：“呴，何上伊点房子听见话蛮灵吤呀！阿去看看咾？”昰歇儿头儿哪恁不嫌外地人来造房子？ 11.侺若然是房产商，外地人来买房子，侺阿卖拨佢？卖，佷不就等于相帮佢垃本地牢固吤扎根？ 12.侺搬场阿叫外地人来搬？叫，【弍两】吤伏垃路脚跟等生活吤外地人不就有能垃本地生存下去啧？ 13.侺装修阿叫外地人来装？叫，人家有铜钱寻，为啥还归去？ 14.外地人送快递来侺阿收？“你好，你的快递到了。”“噢噢，好的，马上来噢！”“豁喇”势嚷跑得个快呃！昰歇儿头儿侺哪恁不话“外地人送来我覅，拒收”？ 15.外地人参与建造吤道路、桥梁、地铁，侺阿用？用，佢吤建造就有意义，佢就有能获得收益。大家全坚决不用，昰排物事造得全不派用场，就呒啥人敢用外地人来参与昰排建设。 16.学堂里用外地老师，侺做学生子吤阿会罢课？学堂里招外地学生，侺做老师吤阿会罢课？不会，嗰么外地人完全可以垃本地接受教育撘教育本地人。 17.医院里用外地医生，侺做病人吤阿会得拒绝治疗？侺做医生吤外地病人来侺阿替佢看？接受外地人治疗，接受外地人就医，外地吤医生撘病人全会源源不断吤来。 ………… 好啧，就昰【弍两】条么啧，何里个本地人呒不几条。佷还怨啥外地人多？外地人有能塱本地生存，全是我伲每个本地人提供支持吤结果，侺、我、佢，一个也逃不脱。 作兴佷要话啧：“嗰昰排情况不再正常不过吤咾？大家全有需要，正好互相满足。佷若然真要嗰恁是阿像忒极端啧嚷？”嗰么好啧，既然佷也觉着真要伊恁是极端吤，说明佷也晓得昰个是完全正常吤，是社会发展吤必然结果，是佷、我、佢，本地人、外地人、本国人、外国人，每个人吤合力所造成吤结果，是我伲每个人亲手推动吤开放吤世界。 我伲全想走向愈加广阔吤世界，望著撘各地吤人全有能顺畅吤交流，故嘞呒得何里个人会拒绝更具优势吤外地言话，呒不人会抵制学堂使用通用度更高吤外地言话教学，故咾【情愿】宁（鼻尾有人保留有人脱落）行囡庶不讲本地言话，也要讲好外地言话。而教育部门推广全国通用吤“北京言话”撘全球通用吤“伦敦言话”，也正是顺应著民众吤昰种普遍需求。大家学会著外地言话行啥？拆穿著讲还不是为著自家塱本地、外地全有能顺利沟通。讲外地言话，塱本地是为著适应外地人吤进入，同时也为自家到外地提供便利——而自家有到外地吤意愿撘实际行动，就失去著指责外地人进入本地吤资格。更何况，学好大范围通用吤伊种方言，本来提供吤便利就是双向吤——既便于本地人，同时也就便于著外地人。事实上，呒曼啥人是真正反对嗰种“通用吤外地言话”吤，即使是伊排看似反对吤愤青，佢【土耷】自家竟然是操著“北京言话”来骂“北京言话”吤，轧实还是塱用自家吤实际行动来强调著还是“北京言话”好。昰个实在是一幅极其滑稽吤景象。 人全望著用手头吤资产获得收益，出租房屋是一种常用吤手段，坐著上收铜钱，啥人不开心？交关人全眼热人家房子么几套，为啥？单房钱也好收收巷尽著嘞！轧真自家也望著房子多著收房钱吤呀，但昰个辰光哪恁不质问自家：“侺啥悫张也像人家恁居著房子养外地人？！”但实际上昰个再正常不过啧，本地发达，吸引外地人来扒分，需要居所，乃么本地人也正好出租房屋赚铜钱。大家全是建立垃自家利益上吤互相满足，呒没必要冠冕堂皇吤话“我伲外地人么是来为尔【土耷】建设吤”“我伲本地人么是欢迎佷【土耷】外地人吤”嘞啥。当然，客观上是互惠互利吤。 （未完待续） 疁·浏河长江 2016年3月3号 礼拜四 丙申年 正月廿五 嘉定建县798周年 朗读：疁·浏河长江 排版：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 你还可以通过以下方式联系我们： 投稿信箱| wugniu@126.com |
|
|
