|
为啥老辈不懂普通话？
苏沪规整汉语（两市全境汉语语音古今对应关系规整） 苏沪古典汉语（两市局地古汉语平仄、舒促、清浊、尖团格局完整保留） 汉藏语系·汉语言·吴方言·太湖片·苏沪嘉小片· 太仓方言大区·嘉定方言区·华亭方言点  有场时听见有人疑惑：“哪恁有排场许亇老人像煞介仔听不大懂普通话亇。”昰只问题，的确需要说明。 随著近几十年亇普及，普通话已经塱全国行开，年轻一辈已经普遍掌握。但随之而来就会产生一个误解：“昰恁听得懂亇闲话哪恁会有人听不懂亇？”像煞当著昰种称为“普通话”亇闲话自古就是全民掌握亇“听得懂闲话”。轧实佷仔细想想看就不难发现，我伲亇祖辈基本是不会讲普通话亇，要勉强发个音也是洋泾浜亇。甚至父辈要讲普通话也是勉为其难亇。也就是讲，普通话根本就不是佢垯亇母语。嗰么佢垯亇母语是啥嗫？就是从古汉语祖祖辈辈传下来亇精确到本地亇昰支现代汉语。也就是各地亇本地闲话。 嗰么，普通话是啥个嗫？佢亇定义就是“以北京语音为标准音，以北方方言为基础方言，以典范亇现代白话文著作为语法规范亇现代汉民族亇共同语”。讲是共同语，但塱全民掌握前头，佢毕竟事实上还朆成为全民共同掌握亇闲话，当中必定经历一个推广亇过程。我伲年轻一辈处于佢已经行开亇年代，自然觉着佢蛮好懂，但老人生活于佢还朆行开亇年代，自然听起来就吃力啧。 乃么我伲再看普通话亇本质，饶佷叫佢“普通话”还是“国语”么啧，硬碰硬佢语音上用亇是北京闲话亇声母、韵母、声调，词汇上以北方方言为主。 从语音上来讲，对于其他任何地点硬碰硬是还一套具体亇汉语语音而不是当地亇汉语语音。无非只是同属于北方方言区亇户荡，当地人听懂起来便当眼；不属于北方方言区亇人听起来总贯吃力眼。 从词汇上来讲，北方色彩较浓亇词对于南方人来讲也未必掌握或者一时头上还朆完全掌握。甚至前両年春节晚会上话着亇“打卤馕”，“打卤”是啥物事，我真朆听懂，“馕”还算晓得，但撘老人话“馕”，佢垯也不晓得，越加覅话“打卤馕”啧。语言发展，词汇总贯要不断扩充，不晓得“打卤”撘“馕”是否已经从纯粹亇北方方言算到全民通用亇普通话里啧。 不管哪恁，某一套闲话亇语音、词汇要行讲其他闲话亇人群听懂、掌握，必然是有一个过程亇，不是天生就好听懂亇。若假天生好听懂是，只有能说明两种闲话本来就比较像，譬假北京闲话撘天津闲话俦，苏州闲话撘上海闲话俦。 有辰光，名称会掩盖本质。称“普通话”，必然会导致交关人误认为“昰恁听得懂亇闲话哪恁会有人听不懂亇”。但还原到佢亇本质——北京音，若然一直以来全称为“推广北京音”，大家就不会问出头先话着亇伊只问题啧。 昰个就像，哪怕佷称佢为“世界普通话”么啧，英语就是英语，不是世界其他地区民众亇母语，只是佢塱全世界最通用，就像北京音，乃至北方交关地区亇语音塱全国最通用一样。佷可以想象，几十年后随著全球一体化亇加深，英语也已经达到著全球全民掌握亇程度，年轻一辈同样会笑我伲交关国家亇老人：“哪恁世界普通话昰恁听得懂亇闲话也听不懂亇？！”佷撘佢哪恁解释嗫？“阿囡啊，世界普通话是需要推广亇，但佢本质还是英语啊！英语，本来就不是我伲昰支人群亇母语呀！” 疁·浏河长江 2018年4月1日 礼拜日 戊戌年 二月十六 嘉定建县800周年 朗读：疁 浏河长江 封面摄影：博望|九妄 排版：神死恸瞑 |
|
|
