  下头是我10年垃西伯利亚贝加尔湖个旅游日记，本生无没打算拍照（觉着迭种美无没办法复制，只有亲身感受）不过为咾弗负众望（实质浪是自家手贱）还是拍了两张。高老齐用只派手机拍个，有两张是翻拍。  西伯利亚忒贝加尔湖个美是随便哪能看弗经够个，每趟一样个景色看厌忒辰光，就会得有意想弗着个美景现出来。  贝加尔湖南北直堵里大约垃北纬51度到56度（假使拿漠河个位置YI一YI,差大弗多垃湖两横头当中），绕湖一圈差大弗多相当于上海到泰山来回；附近有两只较大城市：位于东南个乌兰乌德忒仔西头个伊尔库茨克。湖两岸除忒两只温泉疗养胜地忒100多只旅游景点，城市稀少，多数齐布里亚特族村落。据当地人介绍：贝加尔湖及周转地区一般性9、10月份（西岸比东岸早眼）就开始落雪（迭个忒岑参诗里讲个“胡地八月飞雪”基本一致），11月份开始结冰，1月是结了顶厚个辰光，垃冰面平稳个地方，除忒海豹钻洞，行车完全无没问题。到5月份烊冰（今年到6月份再烊光）。4月份冰景顶赞。天冷平均温度垃零下三四十度，极端到五六十度；天热忒中国西北差大弗多：昼夜温差比较大。东岸比西岸热眼，特别夏季比较明显，因为顺牢东岸个山脉TANG忒了来自西北部忒湖个寒气。相应个，旅游旺季差大弗多是6、7、8三个号头。另外，湖南北直堵里跨越了5只纬度，相应个，南岸忒北岸也有明显区别，垃北岸有终年积雪山地。  贝加尔湖所在东西伯利亚地区忒仔南部蒙古高原是全世界顶强大个冷空气势力：西伯利亚-蒙古冷高压所在地，是亚洲季风季候区冬季“寒潮”个发源地。每年冬季寒潮由此地朝东、东南、南扩散，直达东北、华北、华南、乃至中西部地区，可以讲是整个东亚个“冬天个摇篮”，作为全世界顶“海量”个淡水源泉忒顶大个冷空气发源地，伊弗但直接影响着大陆气候，倒过来也是全球气候变化个重要体现环节，高咾近年功全球科学家纷纷云集于此地；而从她个历史又好看到：伊孕育滋养了亚洲中部、北部忒东部多数民族：肃慎、匈奴、突厥、蒙古忒仔东北亚各民族，高咾伊也是“亚洲个摇篮”；外加，伊又是萨满教个发源地忒中心，萨满（白相游戏个朋友应该对迭两个字来得熟悉了）教是一种比较接近人类祖先信仰——万物有灵“万物齐忒人一样是活个有灵性个”——个宗教信仰（高老萨满也经常性畀讲成功原始宗教），是蒙古、藏、东北亚各民族（包括古代个朝鲜忒日本土著）信奉个宗教，高老伊也是“宗教个摇篮”（注1） “北海”贝加尔湖垃后世一般性齐是为咾苏武垃伊头牧羊再名气出来个，实质浪早垃汉代前头，古人已经对伊颇为熟悉。众所周知4000年前头大禹垃治理各地洪水辰光顺带便对几乎整只东亚个地理风貌忒神话传说作了记录，迭眼记录被后人整理成功顶古老也顶有地位个书之一《山海经》，当中有关夸父逐日神话个记载就提着了“大泽”贝加尔湖：“夸父与日逐走,入日,渴饮河渭不足,北饮大泽未至,道渴而死”，大概是讲垃大禹前头SA千年个夸父族人到东到西迁徙途中，恰逢黄河渭河干旱，想北迁到淡水资源充沛个贝加尔湖，但多数人无没穿过蒙古大漠就“道渴而死”，作兴也有少数幸存者末脚到了伊头。明摆煞垃黄河北方个“大泽”（顶大的“泽”，《山海经》中对江河湖海作了弗输今日个细致划分：淡水湖称“泽”像太湖称“震泽”，咸水湖忒海洋称“海”像青海湖咾啥齐称“海”）板是贝加尔湖。据载：周武王灭商纣后，肃慎人弗远万里来中原进贡（估计是有眼商朝遗老遗少拉不肯臣服周人，逃到肃慎人墟头），好看出3000年前头中原忒“大泽”周转地区已不乏往来。据说成吉思汗也葬垃（或讲故乡）贝加尔湖一块，伊垃北京蹲了弗多歇工夫就因为不适应北京相对来讲比较热个天气而弗得弗回到“大泽”（贝加尔湖垃元代又被叫成功“大泽”）。  本生是想绕湖一圈，到伊头再发觉是不可能个，因为湖边头齐是笔立势直个山脉，特别是东岸从北京陆路乘火车到湖东岸个乌兰乌德有2条路：从满洲里，要么从乌兰巴托过境（但过境签证来得讨债），随便曷里一条沿途风景齐赞个。但因为是国际列车，价钿忒机票差弗多。迭牌国际列车其实多数是苏联忒蒙古个老火车，开了慢车厢条件弗大灵光。高老也好从北京乘S7西伯利亚航空个（每礼拜三、六半夜2点钟起飞）飞机2个半钟头到伊尔库茨克。  从伊尔库茨克乘小巴到安加拉河口的利斯维扬卡，再到贴隔壁个布金库奇：利斯维扬卡到布金库奇有风景蛮灵个短途徒步路线，不过沿途森林里据说有吸血毒虫，严重会得致命，高老乘船安全眼。布金库奇自然风光不错。然后再乘船返回伊尔库，乘车子（也好乘船）到奥利洪岛。从奥利洪或者一库像煞好乘船到湖顶北头个SEVERBAIKL墟头两只景点，听人家讲自然景观好看看，因为觉着辰光作兴弗够我无没去。从SEVERBAIKL有得船到东岸个USTBARGUZIN（乘车子应该也来事，不过要绕忒东北头个大山脉）。奥利洪岛比较商业化，除忒自然景观，我觉着无啥出挑个物事。从伊尔库直到奥利洪岛西南岸一埭路浪基本浪住宿齐只有寻招待所从奥利洪岛乘船（只有每礼拜一有）到东岸个USTBARGUZIN。此地有只游客接待处，里向存了眼贝加尔湖个化石文物。住宿方面好让游客接待处联系一个叫MARIA个阿婆，伊屋里天热接待游客，比招待所JIANG，人也好。从此地北上乘公共汽车到BARGUZIN山谷个雅里克塔，车子下来路边头就是只庙，庙对过有爿布里亚特农场，我只记得伊拉小囡名字叫阿吉莎，伊拉屋里特为造了间木头二层楼天热接待游客，费用是我看下来整个旅程中顶顶JIANG个，一家门人齐老好个。 顺牢BARGUZIN山谷北上到WUHAI山谷完全闭合，路就跑不通了，必须原路回转。一埭路浪齐是布里亚特村镇，顶北头处有温泉。ANRA有一级个然风光忒庙宇咾啥人文景观，不过我问路眼眼调问着个蒙古老警察，伊让我跑路：因为山谷北部治安不大好，一家头说话警察觉着侬吓老老。当然不碰着警察就无啥事体。但确实还是要当心眼：我亲眼看到警察一上班就子弹ZHEK进，带了冲锋枪出去巡逻。  从山谷再回转USTBARGUZIN，好南下到附近个马克西米何，此地主要是只度假处。再从马克西米何到乌兰乌德，乌兰乌德东郊个室外博物馆随便哪能值得一去。从乌兰乌德好直接乘火车回满洲里，或从乌兰巴托跑。假使从乌兰回伊尔库乘飞机说话，要乘火车，因为是顺牢湖边开个，一埭路浪好看风景：包括传闻当中垃湖南岸个成吉斯汗墓忒苏武牧羊处，不过老实讲当地人也弄弗清爽到底有咾没，车子浪眼睛一眨工夫也看不出，我只注意着有一只像煞古迹处，但齐畀了老爷火车忒机器圈牢仔，假使正正式式是成吉思汗墓说话，个么只好讲罗宋朋友对成吉思汗来得弗焐心。末脚因为签证过期垃伊库多蹲了一个礼拜，共总一个多号头快。  上述陆路路线假使无没交通工具只靠徒步说话有眼SADHU，从一处到另一处，多数一日天也跑弗忒上LONELY PLANET孤独星球网，几乎好寻着所有湖沿岸大景点个吃住忒交通个详细情况忒大概费用，甚至包括一些口碑好个招待所个预订电话，迭只网站我看下来是全世界顶顶一级个背包客网站来到贝加儿湖，只见着连二夹煞个沙滩、砾石滩忒笔立势直个礁岩，浪头声狂浪狂浪，确确实实：贝加儿湖畀人个感觉是“海”而弗是“湖”。一靠近水边热头就一扫而光，冷气扑面而来，张口就会呵出气来。湖水冰YIN刺骨，岸边头看到有种胆大朋友落水游了两记，弗多歇就冻得来浑身血血红只好歇角，估计迭种水温即使是冬泳JA人头也无没本事游几化工夫。“水至清则无鱼”用来形容迭个湖水是再恰当无没了，岸边头水浅煞清见底，看不着一条鱼。迭个或许是世界浪除忒泉水忒地下水外唯一好直接饮用个天然水了，吃下去顿时立刻浑身通透，迭能个清冽实实弗是啥冰镇矿泉水好搭脉个。  此地块顶顶突里突出个植物板海冬青莫属了，即使垃寸草不生个黄沙地浪，也好看到伊独零零一棵立垃头，弗关寒暑。高老千万年来所有生活垃此地个民族齐视伊为神物，远古个岩画拿伊描绘，今朝大家照牌头拿它描绘。怪弗得历史浪苏武、成吉思汗老啥齐曾被称为“象海冬青一样”，因为海冬青垃大家心目当中吃着独一无二个分量。理所当然它一向以来齐是萨满教个圣物，大家垃冬青树上缚彩带以期忒神灵沟通或企求保佑。
乘船行使垃湖浪，忒岸边完全两样：湖面不再是煞清见底个天蓝颜色，水深弗可测，泛出一微微黑眼色，外加风浪，像煞黑洞要拿一切吞噬。 奥利洪岛：  7月份个天却寒意逼人，去到萨满教老土地奥利洪岛...乘车子行驶勒垃西伯利亚原野，倦透倦透却不情愿闭拢眼睛，生怕错忒哪怕一秒景色...只有垃此地侬再正正式式领教啥叫“什什远”，随便曷里只方向齐像煞一生一世也跑不到顶头，就算垃迭只小岛（实质什什比“第三大岛”崇明岛大）浪也是迭能...怪弗得来看世博会个芬兰学生子拉特为乘氽发氽发个西伯利亚铁路来上海，24钟头弗吃弗困就看牢仔窗门外头...大概除忒无边景色还有神。 秘萨满个吸引𠲎。 奥利洪岛顶吸引人个自然景观多数就是MALORMORE“小海”海峡中摸弗着头个云忒雾气（部分由温泉所至）了，几乎弄不清爽是云是雾，有种紧紧伏垃水面浪，有种缭绕山头顶。 交关遗憾垃岛浪无没好见着一个正正式式个萨满或者好好叫个原始遗留，可能因为久负盛名而已变得来商业化了，也可能忒1930年代苏俄个红色清洗搭界……只好欣赏标志景观SHAMAN ROCK“萨满岩”忒其他自然景观，多数是石头忒缚勒垃彩带个树木——石头忒树木乃至万物齐“有灵”是萨满教忒所有“原始”宗教个特色。 不过据说讲垃岛周边居民当中，仍旧有80%信萨满化个藏传佛教——从贝加尔湖东至赤塔地区，萨满忒藏传佛教以一种奇特个混合形式为布里亚特老啥地方人所信仰。忒西藏一样：传统浪一位真正个萨满法师是“被天选”个，不好推脱。 山泉对布里亚特人是交关神圣个，伊拉用手候水，先溻垃额角头、面口忒胸口头，乃末再饮用泉水。假使弗算哪能精贵个泉水，也好用只大铅桶装转去当生活用水，乃朝齐有得车子也便当。除忒伊库茨克忒乌兰乌德两只大城市以及一眼旅游景点高档度假村老啥个，多数村镇齐无没自来水。靠湖边头个直接用湖水，呆垃山里个用泉水河浜水。 垃随便啥地方，齐好见着石头堆成功个“菩萨像”——明摆煞迭种做法齐是来自萨满传统。只要有得庙、佛塔或者圣石圣书，大家就会得绕牢仔顺时针转圈，据说讲绕越多越灵光。
朗讀：岑然周 排版：神死慟瞑 |
|
|
