|
从读音及变调习惯上来看，广义三门话的区域远远大于今之三门县域。宁海南乡及象山南部区域，临海东部诸镇及椒北地区，甚至天台东乡区域，这么一大片范围内的语言相似度极高，这也是本公众号名为“三门湾乡音”的原因。
  北风对日头 北风对日头寔朋友家，箇一日，为争何人本事大装悖来。 北风讲：“我本事大。我轻轻个一记吹，人便冻搿搿抖。” 日头讲：“还我本事大。我少可用点劲，人便汗溚溚渧。” 两个人争来争去争不落。 箇时节，扣一个行人走过来。日头对北风讲：“要便箇子，我伲比比相，望何人忖办法畀箇佬人个衣裳脱落来起，便算何人杀甲。” 北风头笃笃，讲：“小case，望我。” 北风先轻轻个吹口起试试相。行人觉着冷爻，畀领头竖来。北风望望无较用，吸足一口气，呼声响吹出去。何里识得箇佬人衣裳不脱不讲起，还裹裹紧点凑。 北风让渠装毛来，便拼死命吹，屁都劲弹出来。结果箇行人头、手、脚全部缩进去，整个人缩子一团生。 日头望笑来，讲：“兄弟，算数算数，得我装来畀你望望相。”讲完，日头用力一记照，昏暖个光随即畀冷意赶逃爻。行人觉着暖爻，头、手、脚都褪转出来，领头也翻转落去爻。日头畀劲道亦用上去凑，放出来个光热烫来。行人让箇红烹日头汗烙溚溚渧，连忙紧畀关衫脱爻。 日头越烙越烫，行人衣裳脱光还无较用，无办法，“哄”声响，望箇路横边个河埂得跳跳进去。 北风承认还日头杀甲，日头也不得人惜，讲：“兄弟，要想人家脱衣裳，寔我杀甲。要想人家着衣裳，亦寔你杀甲爻。我伲各有所长。” 箇只故事个道理，一是讲做事干要顺渠心窍来，无之硬压；二是讲任何人或事物，都有各自个优点跟长处，要扬长避短。 |
|
|
