【原】乡音大话 | 新说《草船借箭》

吴语资料馆 2022-03-22

展开全文

三门湾乡音

从读音及变调习惯上来看，广义三门话的区域远远大于今之三门县域。宁海、象山的南部区域，临海东部诸镇及椒北地区，甚至天台东乡区域，这么一大片范围内的语言相似度极高，这也是本公众号名为“三门湾乡音”的原因。

新说《草船借箭》

古老时节，台州有三个老大，一个寔临海个曹操，地盘顶大，手下也顶多；一个寔黄岩个刘备，地盘顶细，手下也顶少；还一个寔椒江个孙权，比上不足比下有余。当时曹操扣在黄土岭畀刘备一顿打过，还好箇刘备逃来快，未让渠灭爻。箇曹操手脚未打味道，忖忖刘备只箇两梗人，下套断得慢慢示捉拾也无较，先畀孙权打爻起。嚇畀兵庉前所得，打算趁七号码头打上，畀孙权灭爻。刘备也识得，孙权得讲倒爻，渠刘备也寔死蟹一只，早迟也要让曹操捉拾爻，嚇便畀渠个副手派得椒江去，想对孙权联合。

刘备箇个副手讴诸葛亮，你休要望渠当时研究生毕业得刘备公司还只上两年班，手段得知唣上上，统天下都识得光。孙权个副手讴周瑜，箇佬人会也蛮会，便忒阴险猛爻，望着诸葛亮介会，便时时刻刻想畀渠谋爻，且便一直在解忖办法。箇日开联合军事会议，周瑜假假意问问诸葛亮：“先生，椒江对临海便要打了，到时节打水战，用何物兵器顶好咛？”诸葛亮讲：“当然寔箭喽！”周瑜脚大腿一记掴：“对，先生对我忖来一色斯样。且部队箭得知唣缺缺，我想请先生帮忙造十万株箭。既然讲合作了，箇便箇著讲好算数唵。”诸葛亮讲：“周总开口，当然要照办。不晓得箇十万株箭唣昶用？”周瑜讲：“十日会造好不？”诸葛亮讲：“何物啊？十日？”箇周瑜一记听，囥肚得忖忖：“我便算畀椒江个兵工厂无日无夜开得造，十日也造不出唵，望范子诸葛亮也识得来不洎。”且便假假意笑笑：“哈哈哈，先生得讲来不洎，箇我畀你宽两日也无较。”诸葛亮讲：“兵贵神速，十万株箭得讲出十日造，老早也鸡飞蛋打爻唻，曹操会畀你留十日？”周瑜不晓得诸葛亮在得卖何物药，问：“先生个意思，勿用十日便会造好？”诸葛亮讲：“神经爻，要用得着十日吤？三日便有爻！”周瑜且便囥肚得死笑，唵，都讲诸葛亮介聪明，早时我想畀渠除爻都无机会，且渠自家忖来送死。老天要你死，休要怪我无情，嚇对诸葛亮讲：“先生，军机大事，无之开玩笑个！要便你军令状立只得，得讲三日造不出，我要畀你头斫爻个。”诸葛亮讲：“我何里有胆对你周总开玩笑。休要讲杀头，千刀万剐都无较。”讲完，渠便当场军令状立好，交畀周瑜。周瑜且便死高兴，在大酒店里向酒席摆好，要请诸葛亮啜饭。诸葛亮讲时间来不洎爻，讴周瑜趁天亮算起，得第三日，便派五百个兵得七号码头搬箭。说话讲完，几杯酒敬爻便转宾馆爻。

“净态”产品代理：

项女士135 1576 8382（微信同号）

周瑜手下有个参谋讴鲁肃，人蛮老实，对诸葛亮蛮敬重个。渠对周瑜讲：“周总，十万株箭我伲十日也造不出唵，你箇著勿是害渠个，传出去要让统天下讲死。”周瑜讲：“寔渠自家讲，亦勿是我逼渠。有军令状在得，到时节渠来不洎，我畀渠杀爻渠也无话讲。你也走去探探相，望望渠到底怎子装装，探好转来汇报。”

鲁肃走去见诸葛亮。诸葛亮讲：“鲁参谋，扣要寻你，箇十万株箭还要你帮忙记欸！”鲁肃讲：“你神经有毛病啊，自家要寻死，休要畀我搭上去。”诸葛亮讲：“勿是讴你帮我造箭啦。你船借念条畀我，一船三十个兵。船咛用青布幔好，稻秆人船头排得船尾，排排密点。别样甮管，我自有妙用，第三日包你十万株箭到手。当然，箇计划难让周总识得，渠得讲识得便完蛋爻嘞，我条命也要断得爻。”

鲁肃也忖不出诸葛亮只葫芦里向到底卖何物药，渠也不多问，便答应落来，转去对周瑜汇报，也不提借船个事干，便讲诸葛亮何物材料也不用。周瑜便忖不通：“何物怕识得自家要死，便何物都不做啊？”

解头咛，鲁肃私底下畀船对兵调畀诸葛亮用，还照诸葛亮个要求，青布幔好，稻秆人排头尾齐敦好，便等诸葛亮调用。第一日，诸葛亮不动动。第二日，诸葛亮还不动动。到得第三日三更半夜，诸葛亮嚇偷来畔畀鲁肃请得船得。鲁肃讲：“畀我请来装何物？你天亮便要死了，休要对我搭界着！”诸葛亮笑笑：“嘿嘿，鲁参谋，我请你和队驮箭去。”鲁肃问：“得何里驮？”诸葛亮讲：“等记便识得爻。”诸葛亮畀念只船都用铁链连牢定，朝前所开过去。

箇时节，椒江个江面上头一片糊焘焘，白雾漫天，面对面都望不着。天还未亮，船便靠近曹操个兵船横边爻，诸葛亮讴手下畀船横转来，一字排开，还讴手下一头敲鼓一头叫。鲁肃人都㦜跳来，酒杯都落地得，讲：“阿奈先生，你想送死难畀我拖来。”讲完，人都要哭紧了。诸葛亮笑笑：“哈哈哈，㦜何物唵，曹操箇人疑心病介重，箇雾露亦介大，渠唣有胆派兵出来啊。我伲酒啜牢定便是唵，天一亮便转头。”

箇头，曹操听着声响，便命令落去：“外头雾露介大，不晓得敌人虚啊实，都畀我守牢定难乱动，先用箭射。”嚇畀六千弓箭手派去，徛码头得，朝江解头便死射。箇箭啦，便对落大暴雨样，啾啾啾~~~~，一边一记便射满爻。嚇诸葛亮亦命令落去，畀船调转头横得，无唣昶，船两头箭都插插满满爻。箇时节，天也慢慢示亮爻，诸葛亮趁雾露还未散，便讴士兵齐声高叫：“谢谢曹总个箭！”讲完便转头爻。曹操嚇识得上当爻，想追也来不洎爻。