作者:巴金 沪语改写、讲述:黄海鹰 吃好夜饭我到外头去散步,走发走发,又走到了搿面。 从墙壁浪个缺口就能看到园子里向,还是一大片欣欣向荣个绿叶。 勒一只角落头里,一大片深红颜色个花朵静静叫个开勒海,旁边是一幢拨毁脱了个楼房,就剩下来只空架子。屋顶浪个瓦片侪震落脱了,房子前头有得一排绿颜色个栏杆,还勒空架子浪摇发摇发。 我看看花,花开得邪气好,大大个花瓣,长长个绿叶。搿些花原来肯定是种勒窗门前头个。我想像着一个礼拜之前,勒搿幢精致个房子里向、有人推开窗门往外头眺望景色个辰光,肯定会得欣赏到搿一片花。可能还有人整日天隑勒窗门边浪,望牢仔园子当中开仔花个树,勒红花绿叶高头落满年轻人期望个眼神。但是,现在窗门呒没了,房子也快要塌脱了。 花还开勒海,假使花能够讲闲话,伊拉会得搭我讲伊拉看到个窗门里向年轻个、中年个面孔。是个,年轻个面孔。但是,现在再也看勿到了。 我想,花想要搭我讲个勿单单是搿些,伊拉肯定会得搭我讲讲八月十四号个惨剧。搿幢精致个楼房就是勒伊天仔拨毁脱个。勿到一刻钟个辰光,一座花园就变成了废墟。 …… 夜快头了,园子里慢慢叫拨黑色淹没了。我个眼门前一片黑黜黜个。但是花勒摇头个样子还是可以看得到个。四周围一个人也呒没,寂寞个感觉突然朝我身浪涌过来。 为啥搿能介安静啊?为啥呒没一个人来听我愤怒个讲讲伊个小姑娘个事体啊?难道我是勒勒作梦啊? 面孔浪有点冷,有点湿。我抬起头望望天空,落雨了。搿勿是梦。 我勿能一直勒勒雨里向立勒海。我应该回去了。刚刚拨震坏脱个屋里,到处侪勒勒漏雨。 “言话”基本解释:说话,谈话。南朝宋·刘义庆《世说新语·赏誉》“天锡见其风神清令,言话如流。”宋·苏轼《归去来集字》诗之三“言话审无倦,心怀良独安。”此与今日上海话中“言话”的用法是一致的。 “闲话”基本解释:指闲谈;背后议论他人是非的话;不满意的话,有关私人的谣言、传闻、幕后消息等。见陆游《雪意》诗:“闲话更端茶灶熟。” 图:网络 | 编辑:渺渺 |
|
来自: 渺渺m69vnzsah9 > 《待分类》