 沪语朗读：渺渺
上海个老资产（三）作者：沈乔生 推荐、文字修正：丁迪蒙 改编、朗读：渺渺 我少年时个道伴蹲勒一道回忆个辰光，侪会提到，欸个年月，父辈们最热衷个事体就是赶来赶去吃饭。伊拉常庄传递消息，搿家店个响油鳝糊呱呱叫，上海滩好算第一家；欸家店个清炒虾仁好，食材新鲜，大师傅手艺高；搿家店个牛排赞！伊拉赶过来赶过去，呒没黄包车，就轧公交车，外加11路——两只脚。 中式有“新雅、梅龙镇、杏花楼、燕云楼、老正兴、扬州饭店、黄宝和”咾啥；西式有“红房子、德大、天鹅阁、莱茜”咾啥；奶油蛋糕是哈尔滨、上海食品厂、老大房、凯司令。伊拉侪是常客，像勒数家珍。有辰光还窜到七宝、龙华去。欸个辰光，上海滩象样点个饭店，勿可能呒没资产脚印个。 吃啊吃，欸个是个舌尖享受个时代。 走进花园洋房弄堂，玉兰树下头会得传出叮叮咚咚个弹钢琴声音，有点人家还拿囡儿送出去学芭蕾，老师是俄罗斯人，住勒南昌大楼里。俄罗斯老师邪气严格个，拿把戒尺，小姑娘假使跳勿好，就朝伊光裸个小腿浪向抽。 啊，罗曼蒂克，欸些辰光环境还算宽松，资产勒营造一个属于伊拉个天地。 不过，好梦勿长，红色个狂飙兴起了。资产个美梦一记头破灭了。资本家成为横扫个对象。黑五类个辰光，伊拉幸运个逃脱了，黑七类就拿伊拉一网打尽。欸个辰光，我伲搿里个弄堂天天敲锣鼓家生，敲到阿里家人家停下来，红卫兵、造反派就翁进去了。因为住在此地个大多数是资产搭仔有问题个人家，有眼弄堂几乎是挨家挨户个抄。抄过之后安静下来没多少辰光，锣鼓家生又敲得来了，调了批红卫兵，前头是人家抄个，伊拉呒没挨着，觉着吃亏了，勿甘心，又上门来了。 我伲屋里是从海外回来个，又是资本家，遭受了残酷个迫害。我勒《为了忘却个记忆》里有详细个记载，此地省略。而父亲店里个职工，则是温良恭俭让，因为父亲平时对伊拉勿错，逢年过节还备一份礼物送拨伊拉，伊拉还侪记得，所以迟迟勿来抄家。 而母亲所在个体校，一眼造反派凶恶残暴，用铁链抽瞎母亲一只眼睛，还逼伊自杀。伊拉前后来抄家两次，还打电话给父亲单位个职工，让伊拉一道采取行动。职工们勿得勿来，但只是做做样子，虚张声势喊两句，暗地里还是保护父亲搭我伲几个小囡嗰。 我有一个朋友也是资产，屋里拨抄了八天八夜。整幢楼个地板侪撬开来了，花园里个草皮也拨翻了一遍，还是勿甘心，造反派个眼睛矆到了篬篱笆浪，不过已经吃力煞了，就让我同学兄弟几个一道铲。于是，红卫兵、造反派搭仔资产阶级个后代一道拿篬篱笆拆脱，竹头一根根剖开来，看看里向囥金银财宝了伐。 搿算是个有趣个案例。后来，工总司司令王洪文拿伊屋里当行宫，有辰光夜深人静，突然车子开进伊拉屋里，进了后楼，临时住一、两日天，搿里是严格保密个，外面个人啥人也勿晓得，我个同学一家门也勿晓得，只晓得有个大人物。后来看见了，再晓得是王洪文。不过，王洪文也呒没为难伊拉，伊住进来，反而倒太平了。 等“文革”结束，抄家物资还转来了，其实只不过是象征性个拨一眼。我屋里个清单浪向写着：一粒猫眼作价10元，一只碧绿个翡翠钻戒100元。有一趟，母亲偶而踏进一家翡翠店，差点昏倒，伊眼货色比伊个勿晓得要差多少，侪标价几万几十万。而伊个侪是顶级货，就赔了搿眼！ 只有一只镶了３点95克拉个大钻石、九粒小钻个钻戒，折价2819元8角。 但是我伲兄弟姐妹，呒没一个人多想，算了，计较点啥，命没送脱就是上上大吉了。 又开始吃，但是资产已经衰老了，已经呒没当年伊股吃个劲道了。 搿个是个呒没出息个阶级，伊拉生不逢时，勿可能有啥出息，伊拉个政治搭仔经济生命老早侪结束了，伊拉个生理生命也已经进入了暮年了。 又过了十多年，伊拉还没来得及搭新一代资产阶级交接，就匆匆离开人世，丧钟已经老早就为伊拉敲响了。 我伲描述嗰对象已经寿终正寝。
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图：网络 / 编辑：渺渺 |
|
|
来自： 渺渺m69vnzsah9 > 《待分类》
