|
作者：徐祖威 沪语改写：金慧玉 文字修正：丁迪蒙 讲述：王邦基 编辑：王乙其 我看见过丰子恺先生，一位真正个大家。叙写此文，以作纪念。 突然之间，眼门前感觉到栩栩如生、和善可亲个丰子恺回来了：伊个眼睛像秋水，像寒星，像宝珠，像白水银里养了两颗黑水银，温存、和蔼，让我觉着勒伊个眼睛里有熠熠个光彩凝聚，是可亲、庄严——我想勿出宇宙之间有啥个物事来形容。先生个眼神温润、绵软、蜜甜、和柔，酣畅，简直是可以抓牢人心。伊个思想搭伊个漫画是敞开、璀璨个。伊个画耐有回味。
丰子恺先生，我曾经面对面个看到过伊。 辰光是1966年三月初春个一天下半天，搿年我16岁，搭一个大我七岁个邻居张老师，阿拉侪住复兴中路、顺昌路，伊讲伊想到了一个朋友，住勒陕西路浪个长乐村、是丰子恺先生一条弄堂里个。问我想去伐？我就老有兴趣跟勒海跑到了丰先生个门口。 搿日下半天风和日丽。勒先生雅致个小楼门前，有只小小个庭园，门前头是竹篱笆围起来个，院子里花木扶苏，树，木簇拥，米黄色个小楼铺勒红瓦，二楼有只朝南个室内小阳台，阳台当中三角梯形凸出，形成了房子中心尖顶状，搞勿清爽是西班牙式个还是法国风格个。 从紧闭个门里向传出了优美动听个钢琴声，琴声像波浪一样传出来，拿听个灵魂带到个超人类个世界里去了……朋友讲，大概是丰子恺个囡儿勒弹。 93号门右角门铃拨阿拉揿响了，一位邪气有风度个少妇开门了。朋友自我介绍：“我是侬个邻居，特地来望望丰先生。”“进来进来。”少妇用邪气温柔和气个声音讲，客气个让阿拉进去了。
阿拉立勒客厅里等伊去通报，朋友告诉阿拉，搿是丰子恺个囡儿。 一歇歇，丰子恺来了，只看见伊鹤发童颜，长胡子，显得儒雅、淡泊，伊稍微带勒一丝紧张，讲个是嘉兴一带个桐乡闲话，温而淡雅，笑容可掬，亲切和善。伊问阿拉：“㑚……㑚有啥事体伐？！” 阿拉来煞勿及告诉伊：阿拉是侬个读者，只是想看看先生。伊请阿拉坐下来，再走到茶几搿塔，拿出纸头、笔，叫阿拉拿名字搭工作、学习单位写下来。朋友写了姓名、职务、搭任教个学堂。 丰先生仔仔细细看了一歇，终于安心了。伊笑咪咪坐下来，讲了句：“搿能讲，㑚侪是教育家了，好个呀好个呀！勿错，勿错……”“侬呢？”丰先生问我。“我16岁，还小！”我回答。 大家侪看过丰先生个画，于是就聊起了挂勒海个画。阿拉讲看先生个画特别欢喜。朋友还晓得先生是上海画院院长，老有名气个。还讲常庄到黄彼南路艺术展览馆去看先生个画展。先生讲了句：“我还记得，搿是画院办个歌颂毛泽东思想个国画展。”伊淡淡叫个讲：“开幕辰光伊拉叫我去，我没去，我长远勿去画院了，年纪大了。
丰先生问朋友拉教啥个？张老师讲教数学，先生露出笑容，连连点头：“教算术，教数学，好！学科人喜欢美术，勿错，勿错！……” 春天阳光射进了搿间勿沾丝毫富贵气个小客厅，照勒墙浪，厅里向显得静谧、淡泊、柔和。我老清爽个记得丰先生慈祥平和个笑容，儒雅、神韵个气息，客厅里显得更加个春意盎然。
作者：徐祖威
讲述：王邦基 —————————————————— 丁迪蒙 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。 丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年儿童出版社 《实用沪语》复旦大学出版社 《上海话绕口令》少年儿童出版社 《上海方言词语使用手册》上海教育出版社 《上海话读成语故事》少年儿童出版社 《囡囡学童谣》，少年儿童出版社 《囡囡学成语》，少年儿童出版社
|
|
|
