上海老底子每天呈送精彩文章一组 打开尘封的记忆,寻觅往昔的岁月 叙上海老底子事 忆上海老底子人 诉上海老底子情 童 年 作者:徐祖威 沪语改写:李海榮 审核推荐:丁迪蒙 编辑:王乙其 点击回读: (一)爱多亚路浪个哭声(二)阿娘来救我(三)最初个启蒙 1 沪语讲述:徐君 阿娘生勒清末民初,思想观念无疑是迭种传统个,善良慈祥,刚柔并济,富有同情心。伊虽然矮小,却邪气结实。伊常庄得意个搭我讲:“侬晓得伐,从前有个叫花子来讨饭,我总归拨伊一勺饭吃,菩萨勒天浪侪看勒眼睛里个。侬看我身体好伐,侪是我积个德呀。” 阿娘是我个第一位启蒙老师,伊用自家唠唠叨叨个闲话,对我进行最初个善恶教育,勒我幼小个心灵里播撒做人个种子。“囡囡侬命真苦,生下来就勿好看见姆妈,只有阿娘欢喜侬,侬长大一定要争气。做人心要好,勿好做坏事体,记记牢噢。”勒阿娘个唠叨声里我睏着了。醒过来个辰光,有泡尿撒勒床浪,阿娘从来勿骂我。我没看见过阿爷,伊老早就得痨病过世了,阿娘拿养育我当自家个精神寄托。阿娘晓得古训“三岁看到老”,因此老早就对我进行了启蒙教育。 我两岁,阿娘就搭我做规矩,从小要我就有文雅个仪表。伊讲:“吃饭辰光,嘴巴勿好发出声音,勿许吮嘴巴,筷子要捏牢迭个地方”伊用手比划:“看见伐,勒迭个地方捏紧。忒高勿好看,异样刮答个。忒低就更加勿好,贪吃鬼个样子。”我似懂非懂、点点头。阿娘看见我听闲话,讲得更起劲:“要看到大人拿筷子了,侬再好吃物事。离得远个菜,搛菜勿好拿筷子伸过去。好小菜要让长辈先吃,勿好抢。吃要有吃相,两条臂把勿好搁勒台子浪。盛好饭要用两只手拿饭碗端拨大人。侬要做个有教养个小囡。” 阿娘是宁波人,邪气崇尚礼仪、形象,交关细节侪要讲究。伊讲吃相是人个品行个提高标志,因此时时刻刻告诫或训导我,让我深深个铭记。就搿能,我勒阿娘个言传身教里,度过了贫寒却是快乐个日脚。每日天夜里,阿娘会得搭我勒小台子前头坐一歇,伊带斑点个褐色面孔勒微弱个灯光下头,枯瘦、憔悴个神态至今让我记忆犹新。相依为命个日脚里,我常庄听阿娘提旧事,也听到阿娘搭别人个谈话。勒伊拉个喜怒哀乐里,我晓得了勿少对人对事个看法。 有趟,我听阿娘搭人家讲我个父亲:阿良十六岁一家头到上海来闯荡,伊没文化,但吃得起苦,勒外国人手里学生意,样样侪肯做,学会了“八级铜洋”,又买了两间房子。我勿懂“八级铜洋”,但我晓得就是修理技术呱呱叫。1953年公私合营,我父亲个薪水七十六块洋钿,养活屋里八个人。 作者:徐祖威 讲述:徐君 丁迪蒙 迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。
丁迪蒙所撰写的,与沪语相关的著作主要有: 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》,少儿出版社。 转自:“启迪心田沪语”公众号 我知道你在看哟~ |
|