|
上海老底子每天呈送精彩文章一组 打开尘封的记忆，寻觅往昔的岁月 叙上海老底子事 忆上海老底子人 诉上海老底子情 来源：夜光杯 作者：西 坡 改写：郭莉 朗读：陈美莲 审阅、推荐：丁迪蒙 编辑：王乙其 勒上海人个小吃目录里向，粢饭糕，好像是只可有可无个品种。
有意思个是，要是侬只考量“可有”，葛末粢饭糕倒也未必轧得进去；不过要是侬只考量“可无”，葛末，粢饭糕又肯定勿会拨拒之门外。迭个就好比侬想组装部汽车，勒遴选“可有”个部件辰光，发动机、轮盘、方向盘、刹车……一样样过脑，一只也勿好少；但是到剔除“可无”部件个辰光，啥人也勿敢拿平常勿是事体个“雨刮器”省脱——驾驶员侪晓得：呒没发动机开勿了车，呒没雨刮器同样开勿了车，除脱老天爷一年四季勿落雨。 勒今年迭个特殊个春天里，想勿到上海人侪显露出自家“大师傅”个潜质了：“拿只破皮靴烧成功一道菜”，像搿能个各种卖洋，阿拉勿去讲伊，晒晒自家摊个面饼、蒸个馒头、烘个面包、烤个蛋糕，一个个“成就感”侪足以爆棚。结果问题就像侬晓得个伊能：平常辰光，上海人并勿是家家人家侪有面粉搭仔酵母个，紧急状态下头抢菜，一般也勿会得想起来要去备眼迭个物事。三四十天一过，屋里所有个饼干、蛋糕咾啥侪消耗光，除脱大米饭，啥人还敢讲自家屋里“碳水”充盈？
所以，勒朋友圈里向，无论是平常大大咧咧个企业老总，还是欢喜讨价还价个小阿姐，一个个侪勒展示自家个“手作”——“粢饭糕”辰光，我有数了：凡是屋里拿得出可以弄点馒头、汤团、葱油饼、面包个食材，啥人还会得去弄迭个粢饭糕啊？实在也真个是出于无奈嘛。 “弹尽粮绝”？葛倒也只是形容形容，再哪能，米饭总归还是有得吃个。可以肯定，聪明人从来勿会得浪费每一唐危机带来个机会。呶，粢饭糕，自家做呀！ 其实，看到迭个，我心里向是邪气崩溃个——大家对生活个热爱，对困难个蔑视，对食材个珍惜、对传统个坚守，以及对自家个关怀，我真个是赤仔脚也赶勿上个！ 从稻米衍生出来个小吃真是勿勿少少。比如米粉、米糕、米饼之类，但是从米饭衍生出来个小吃实在是勿多，米饭饼、粢饭团、粢饭糕，也就是迭个几样。严格来讲，米饭饼个主要材料是米粉，粢饭团个主要材料是糯米，真正搭作为日常主食个米饭最贴得牢个点心，只有粢饭糕。
侬根本用勿着去担心，自家做粢饭糕，“技术”会得是掐头颈个问题，不过粢饭糕基本个衡量水平，还是必须得到尊重个：方方正正个形状，外脆里嫩个吃口，咸淡适中个滋味，外黄里白个色彩……追求完美个朋友，甚至还要讲究粢饭糕个四只角，是否经得起直角卡尺来量一量。 有位老同事告诉我，伊用吃剩下来个米饭做粢饭糕。我觉着邪气正常：粢饭糕本来就是用米饭做个，专门烧一镬子米饭，搭仔用吃剩有余个米饭，做出来个粢饭糕，并呒没啥老大个区别。关键在于，作为主食个米饭，有个人家烧得烂眼，有个人家烧得硬眼，各人欢喜，勿好勉强。但是要做粢饭糕，忒烂忒硬个，侪勿“称职”。 照我看来，要清清爽爽呈现出米饭个颗粒感，还要保留米饭恰当个黏性，是粢饭糕既勿同于米饭饼，也勿同于粢饭团，更加勿同于米饭个重要特征。表面勿脆、呒没咬劲个粢饭糕，赛过用苏州评弹去唱绍兴大班，要勿是尊重粮食，真个恨勿得厾脱；里向软不腊脱、黏滋疙瘩个粢饭糕，又赛过面疙瘩冒充宁波年糕块，吃起来一定呒啥滋味。与其搿能“恨勿得厾脱”“呒啥滋味”，还勿如去吃一碗饭算了。
抗疫封禁当中有得一天，海银先生搭我展示伊团得来个一家豆制品公司个大礼包，里向有得半成品粢饭糕，“夫子言之，于我心有戚戚焉”，我也千方百计寻到了同一家公司个大礼包，里向竟然根本呒没粢饭糕！哼，侬小小一块粢饭糕，难道还要看清门第、审查出身，再拨人家吃啊？ 就搿能，一块勒平常辰光处于“可无”地位个粢饭糕，邪气结棍个拨撩了处于闭环生活里向个心底欲望。心动勿如行动，我真个勒获得出门许可个第一时间去寻伊了。尽管第一趟铩羽而归，但是我勿罢休，再二再三，有志者，事竟成！ 前抢把，“夜光杯”刊出一组以“生活恢复后要做的事”为主题个文章，假使我来写，大概邪气愿意公开自家个一只俗气但又真实个念头——去吃块粢饭糕去！
作者：西 坡
朗读：陈美莲 丁迪蒙 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
|
|
|
