|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情  作者：王智琦 沪语诵读：和沁
我老房子住勒武进路旁边个罗浮路浪，罗浮路搭武进路呈直角交叉。我勒武进路浪其实并呒没听到过枪声，但武进路原来叫老靶子路，既然叫靶子路，我想肯定有枪声。
武进路最早是一条小河浜，名叫穿洪浜。1853年太平天国军队攻克镇江，上海租界当局感到震惊搭恐惧。为求自保，勒租界定居个外国商人组织起一支万国商团民兵武装，宣布租界实行武装中立，伊拉勒虹口港一带购买土地，作为训练射击个靶场，穿洪浜拔填埋后筑路，命名为靶子路。后来要搭北四川路的靶子路区别开来，改称老靶子路。
1913年商务印书馆实测上海城厢租界地图，箭头即为武进路 武进路从河南北路开始，自西往东一直到九龙路，全长1100多米，属于虹口区咯一条中小马路。但从河南北路到罗浮路北侧搿段，则属于原闸北区。2016年底，“北站新城”旧区改造，嗰个地块一并拔动迁。靠近河南北路口个武进路浪，有一幢建于1911年个暗红颜色三层砖木结构建筑，具有英国乡村式风格。当年是海上闻人虞洽卿家产，据说动迁费高达上亿元。类似富有特色个建筑，勒武进路浪蛮多。
武进路东头与九龙路交汇，隔虹口港与溧阳路音乐谷相望
武进路西至河南北路 武进路浪值得记叙个事体太多，我最熟悉个，还是从河南北路到四川北路搿段。靠近河南北路口，有一个6路公交站点，一直通到杨浦区打虎山路。正巧样板戏《智取威虎山》火遍全国，我勿晓得拿能拨打虎山搭威虎山联系勒一道了，感觉交关遥远，至到今朝也呒没乘坐过一趟。 武进路浪有一条小弄堂可以直达东新民路，弄堂旁边紧挨勒一所聋哑学校，俗称“哑子弄堂”。有一家简陋的理发店，男小人剃头只要8分钱。剃头师傅态度勿大好，伊觉得我头发过于浓密，用手推老吃力，总要抱怨讲：侬迭个小家伙头皮犟来。疼得来我是动也勿敢动。
武进路、四川北路口，10号地铁出口地方，现在个网红打卡地“新潮八弄”，搿辰光沿街面有勿少小商小铺。曾经开过一家茶室，装潢了老古雅咯，我倒是呒没进去喝过茶。搿天下半日去四川北路荡马路，无意中向茶室里望了一眼，看见我囡儿小学班主任搭几个小姐妹勒打牌，赶紧点头打招呼，班主任也看到了我，笑嘻嘻个点点头。女儿小学毕业后，竟传来班主任病逝的消息，邪气伤感。茶室早已拆忒，人非物也非。
人活勒海就会的有病痛，武进路、吴淞路口，坐落着上海第一人民医院，现在医院规模不断扩大，连原来虹口中学也尽收囊中。上海人住房喜欢靠近医院尤其是大医院，怕万一有个三长还没两短辰光，来得及送到医院。我姐夫嗰辰光经常去外地出差，小外甥就住勒我迭嗒。一天伊突发高烧，面孔通红，我马上踏仔脚踏车直奔第一医院，打针吊水，立马退烧。姐夫到现在还常常念叨起迭庄事体，外甥早就忘到九霄云外去了。
武进路浪不光有第一医院，还有鼎鼎大名的虹口救火会，三层楼砖木结构，通体红色，大概寓意着以红克火。救火会建于1866年，瞭望塔高36米，当时号称中国救火会第一塔。路过搿嗒，我常仰望高塔，以为可以一览上海全貌，搿辰光东方明珠还呒没造起来。更盼着哪里有火警，可亲眼目睹消防队员穿衣戴帽，消防车呼啸而出，场面惊险刺激。现在登上塔顶，大概只好看到弄堂里阿姨妈妈们拣小菜了。
从罗浮路左转到武进路，到了四川北路，我一般会右转，搿嗒有上海书店、新华书店、国际电影院、胜利电影院、邮电俱乐部等，文化氛围浓郁。随着黄河路美食街声名鹊起，乍浦路美食街也闪亮登场。有位女学生邀约几位同学去酒楼聚餐，也请了我迭个曾经的老师。印象中女学生一头短发，戴黑框眼镜，沉默少语。勿料现在伊已是某公司中层经理，举手投足干练稳重，极富中年女性的成熟魅力。聚餐结束，我慢悠悠走勒武进路浪，穿过灯火阑珊的“新潮八弄”，街景似曾相识，却真的不认得了。 |
|
|
