【原】蚊子

上海言话讲述：李海荣

    

蚊子

作者：网络
滬语改写，讲述：李海榮

黄局长办公室里有一只蚊子，搿个消息不胫而走。

听说搿只蚊子邪气厉害，一般个蚊子日里弗咬人，搿只蚊子却专门日里咬人，而且一咬一只红包。搿弗，黄局长个额角头浪，已经鼓起了一个显眼个小红包。

办公室刘副主任第一个来到了黄局长个办公室，手里拿勒一瓶蚊香液。刘副主任满怀歉疚个讲：“侪怪阿拉个后勤保障工作呒没做好，让蚊子溜进了侬个办公室，让侬受苦了，搿个是我刚刚买来个蚊香液。”办公室暂时还呒没有主任，由刘副主任暂时主持工作。最近，局里拟提拔一名办公室主任，刘副主任是最佳人选。

偏偏勒了搿个要紧关子浪，局长个办公室飞进了一只蚊子，并且将黄局长狠狠个咬了一口，搿简直比咬到刘副主任个心还难过。

黄局长下意识个揉了揉额角头浪个红包，对刘副主任摆摆手，“算了，搿个物事有化学成分，对身体弗好，我屋里侪从来弗用个”。刘副主任哦了一声，拿勒蚊香液，知趣个退出了黄局长个办公室。

挨下来，妇联个孙主席紧接勒走进了黄局长个办公室。一看到黄局长额角头浪个红包，孙主席心疼个叫了起来：“喔吆介么大一个包啊！”讲着，从袋袋里拿出一盒风油精，“黄局长，我拨侬涂一点，消毒，止痒。”黄局长一手接过风油精，“我自家来。”黄局长勒了涂风油精个辰光，孙主席又像变戏法一样，拿出了一只电蚊拍，到处挥舞。一边挥舞，一边嘴巴里念念有词，“看侬朝阿里逃！”。孙主席挥舞着电蚊拍，拿黄局长办公室个角角落落侪横扫了一遍，又围勒黄局长前后左右挥舞了一通。

黄局长惊诧个看勒孙主席，“侬搿个是做啥呀？”孙主席激动个讲：“消灭搿只讨厌蚊子啊，搿个物事邪气有用个，而且呒没毒呒没害。”

黄局长再次摆摆手，“办公室迭恁大，老难捕到个，再讲了，侬搿样挥来舞去，搞得脱跳大神介个，我还哪恁工作啊？侬个心意我领了，侬还是忙侬自家个本职工作去吧。”讲着，伊起身离开了办公室。

虽然直到最终还是呒没捕到搿只蚊子，但黄局长明白了自家个心意，孙主席也心满意足个走了。

过了一歇歇，黄局长回到了自家个办公室。看到陈科长坐勒沙发浪，一动也弗动。黄局长问：“侬有事体伐？”陈科长摇摇头，“局长，我呒没啥事体。”，“葛末侬坐勒我办公室里做啥呀？”黄局长疑惑个问。迟疑了一下，陈科长轻轻交讲：“我搿个人邪气招蚊子。”

黄局长有眼丈二和尚摸弗着头路。陈科长低勒头，声音低得像蚊子哼一样：“蚊子吸饱了我个血，就弗会得再咬侬了”。

黄局长意味深长个哦了一声，伊隐约看见，陈科长个额角头浪停勒一个黑点，陈科长纹丝勿动。

搿只蚊子啊！黄局长摇摇头，又搭搭头。伊已经有了办公室主任个最佳人选了。……

    

方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。

在上海，爱上海，讲上海言话。

“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。

“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”

图：网络   |   编辑：渺渺