|
毕矮讨老婆 道情 （唱）说道情来唱道情，手捧圆鼓劝人心，好好息息(坏坏)大家听，一段古人从头到尾听灵清。这本古戏出的金华府，兰溪城，宁(人)是女埠毕家宁，单独住在兰溪城里面，咯个人佛(么)取名讴毕矮，毕矮年纪轻又轻，早除爷娘(父母山头顶，从小便是咯一个宁过日程，毕矮人聪明，从小识着敬老爱幼会做宁，兰溪城里七大八小都望得毕矮上眼睛。毕矮还喜欢打抱来弗平，弗恍凶恶咯人，也不会欺负太平老实咯宁，毕矮染上赌隐真送命，把祖上留下了来咯三间堂楼七间厅，家财万贯都让毕矮输洁灵，现在咯毕矮家里穷的叮当响，只好盖起三间茅铺还二间漏，其中一间不漏起床泥锅(灶)头 ，落雨天空流了来弗象酱油。前宁古话有的讲，富在高山有远亲，穷在十字街口呒宁认，一记混去年纪都快三十零，一个宁，常年穿着呒没新，坐的茶馆店里都是一个宁，人穷六亲都断尽，汉得孤孤孤单单一个宁。行早(就是）孤孤单单一个人，毕矮虽然跌鼓宁，脑筋都比别咯要好十分，有一日，荡及荡及街要到街路上去行，头发留起三四寸，衣裳布裤穿起青补白来白补青，一双鞋弗有前没后跟，穿起来弗梯梯拖拖街路行，蒙(看)着毕矮来，做官咯宁弗都要去避级来，见怪(担心)毕矮到他那里借文银，侬假(如)讲他三声好，各样东西多了靠，侬若讲咯(他)三声息，各样事情都勿了直。 有一天，毕矮走到街路上，来到一片肉店门口 来站记，肉店老板望着毕矮便爰轻口薄皮及，弄送毕矮寻开心，一口冷笑讴一声。 （白）毕矮，侬啥会头仰及仰及，鼻头捏乃捏及，站到我依肉店门口呔事干？走远点！这里勒是条街路，我依站及与侬有呔相干呢？侬站的这里连买肉咯宁都到別个(人)那里去买肉了，妨碍我侬做生意了。老板穷气已弗会过人咯，我侬是想到侬肉店里买点肉咾，买肉？侬买肉是有数咯咾，侬今日还猜不着勒，我侬要么不买 ，要么就买上担咯，哦，侬要买上担咯肉真当是日头孔从西边出来了，侬做呔事干开场用咯？讨老婆。讨老婆，侬？我便难讨老婆咯？呔咯叙话也不晓得咯，侬从哪里蒙我难讨老婆咯呢？哈哈，毕矮，覅讲我料侬！ （唱）毕矮啊，侬若讨得老婆起，黄狗出角变麒麟，铺路石板会生根，三年干菜会抽青，四年冷饭会发芽，虾皮白鲞也会活，侬若讨的老婆起，兰江结冰都好走人，真是日头西边出来东边落下去，侬若真的讨的老婆起，我侬砻糠搓绳十八丈，丈丈挂到侬姓毕祠堂门口上，毕矮呀，覅讲我料侬，侬是青天白日落床上。 老板啊，难怪侬料我老婆讨弗起，讲来讲去都怪我侬毕矮宁家穷的紧，跌鼓(家穷)弗争气，侬老板讲我料我都是有道理，我侬也难好来生气，不过老板话又要讲转来，如果我侬毕矮真咯讨的老婆起，问侬老板如何赔罪及？如果到时间(时候)老板弗赔罪，覅讲毕矮对侬不客气，今年老板讲话我侬毕矮弗忘记，到时间要侬老板哭都没眼泪。 （白）毕矮么生我问侬，如果侬讨不归老婆又啥子呢？今日便要和侬打赌。 （唱）老板啊，哪啥赌法侬讲来，件件依侬老板也要赌落去，好咯，毕矮啊侬若真的讨得老婆起，我侬送侬两担猪肉请客及：侬讲来，如果讨弗起，哪啥及，老板呀，如果讨弗起，我侬毕矮赔侬四担猪肉赔罪及。穷毕矮，口讲真容易，我问侬四担猪肉侬又从哪里来？老板呀，哪里来弗要侬记挂，我侬竖笔立仂，沿门乞讨，也要借归来，侬去讴个中家(间)宁，今天打赌一定要作证。 （白）覅要中介人，毕矮 ！我买肉的讲话算数的，吐出来的口水唾都抵黄金咯。老板，难讲旳，到时间弗承认也由侬咯，一定要有宁作证咯。正好两个人对的起劲时候，隔壁酒店老板出来讲嘞，毕矮，我侬做中，侬么老婆讨起，陪到店里来，陪到店门口望及，肉店老板掇出两担肉，我侬掇侬十担缸面黄 (廿斤为二坛，二坛为一担，讲话便算数，这个时候街路上汉得围满宁 勒来，大家讲，毕矮，我了大家都听着咯，这两个多是大老板，到时候如果弗掇出来，我了大家一起出面会把侬还算咯，把这两把店里都敲了去，两份家当都要讴咯赔洁零(光)。对，毕矮侬放心，这个时间豆腐店老板站出来讲话嘞，毕矮，夯许多宁为侬作证，放心，我也赌及，侬毕矮讨老婆不过要定时间咯，弗能够超过三天，如果超过三日以后，大家都弗作数！好的，三天便三天。 （唱）大家一谈一讲都端正 ，毕矮一速起步归家门，一路走来一路想，这件事情哪啥来行经(这样)，做人穷总穷弗的，从今以后么认真做，赌博恶习也改过，三十来岁撑份家当也弗迟。刚好路过一个赌场里面宁头兴又兴，毕矮忖忖头也摇两及，停住脚步也想望及起，赌博曲啊唱的真闹兴，卡来旺(压来吧)卡来、卡来，左青龙来右白虎，对头出门怀规升，里面齐天活鬼叫，有宁哭来有宁笑，这个时间毕矮牙齿一咬走过门，心里想，宁怕进赌场，猪怕进杀场，人进赌场便上当，罪过把祖宗留下的雄厚基业都输光，赶快离开归到农家上，坐到凳上来想想，三日里面讨老婆赌头搭过掌。总该想个办法收收场，讨老婆又不是搞儿戏，天上弗会脱落来，这件事弄得毕矮一及(时)没主意，想想宁穷别个望不起，料我老婆讨弗起，赌宁道三日里面讨老婆，分明便是要我倒楣难做宁。哎，还弗如一碗盐卤一根绳，离开世界弗做宁，真当死落去，又太犯不着，活着总能撞着几次吃酒来吃肉，想来想去一及笑，趟趟 (试)运气去望望起。 （白）毕矮还有个表妹，谪亲姑表，姑父早早亡了去，姑姑只好转家去，只留表妹落人家，还未婚配嫁宁家，毕矮突然想到表妹，便想讴表妹代替试试起。 （唱）第二日，天早五更爬起身，一双破鞋头穿的脚上有前没后跟，只好拖拖来出门，踢啦塌了一路来到表妹农家去，走过一程又一程，表妹农家巳经到来临，来到农家门口硬着头皮要讴声起。 （白）表妹，表妹一一！啥会呒宁应声咯，天早午更到哪里去嘞，奇怪嘞，门么厅趟(敞开)屋里呒宁应咯，唉，呒宁也只好归去嘞，弗慌着，今天还得要推咯摸点去嘞，上横头咯张八仙桌蒙去还蛮好咯，背到街路上去卖买也直点铜钱咯哴，表哥，表哥 ，嗳嗳嗳，里面啥有宁咯，我还讲没宁来家里咣。表哥，侬啥会咯难的咯嘞，哦，讴侬咯多半十日，也没回声咯。表哥，咾，我来房里洗澡换衣服，我侬假(如果)应来，侬门推来，多少难为情相，哦，侬讲来也有道理咯。其实的咯个表妹望着个表哥来心里危险叽喳宁咯哴，咯个没缺鬼来，都呒好事咯哴！还夸清(运气)毕矮讲把张八仙桌背去卖，本身想躲的房间里弗来响咯哴。表哥你咯难的咯，来的咯早有啥咯事干弗嘞？哎 ，讲有事干也呒事干，讲没事干嘛已有点事干咯唻。表哥侬午更吃过未咯嘞，还是昨天夜里吃过咯，今早还未吃呢？咯么侬坐及起，我到锅头屋里去烧地侬吃吃。好咯，表妹侬咯客气那么我就随便侬嘞，反正自咯表妹家。 （唱）表妹表妹真客气，嚎速赶快要到厨房里面烧点心，一碗索面二个卵(鸡蛋） ，一及功夫烧端正，半斤烧酒掇灵清，请侬表哥吃点心，表哥吃的饱腾腾，表妹亲口要问声。 （白）表哥侬吃饱末咯，吃过么算数嘞，也差弗大都嘞吧，表哥，咯么问侬，今日侬来倒底有啥事干弗嘞，表妹穷表哥无事弗登门，弗是问侬讨么，就是问侬借。表哥有啥咯事干侬照直讲来，我代表兄妹总好商量，呒事咯。 （唱）表妹啊，我侬表哥不争气，宁家让我败的这幅来田地，我咯爹娘小宁生的少，上无哥弟手足情，下无姐妹心连心，只有肚皮靠背脊，便只生我一个宁，我侬一来呒手艺，二来没呔口棒学起来，三来没有咯铜钱银子存咯里，坐坐嬉嬉也呒呔来心相，呆的家里坐吃山空呒法门，总想寻点行当做做起，想到侬郎表妹农家有只来猪公，我想借去来牵及，先练练面皮再出好主意，今天我侬来牵去试试起，明天一早便会牵转来，表哥啊，侬讲今日来牵去，明早就牵回来，恐怕没咯来容易，侬不该游手好闲呆的农家里，侬不该咯好家当败下去，侬不该吃喝玩乐继续去，侬不该一天都在茶店里，侬不该亲戚六眷都骗全里，千不该来万不该到我表妹头上来算计。侬自想想起，回回讲话弗算数，多少东西让你来骗去，我侬爹弗除的早，做表哥宁按道理来讲总要照顾表妹及，弗讲总到表妹头上掇便宜。表妹啊，今天侬总该帮帮我咯忙，我侬对天来发誓，明天一定要牵回转。 （白）真当咯？咯个肯定的，明早不牵回来呢？我侬咯头害了去，可是讲，侬欢喜讲赖话咯，侬有几个头好割咾，表妹，这个是呒话讲咯子讲讲的哴。好，侬牵去，喔，谢表妹，再覅忘记掉了，明早午更还的要牵转来！好咯。 （唱）多谢表妹肚量大，猪公借我牵到街路上，有宁问：毕矮侬个猪公 哪里来咯？侬啥会做这种鼻脚(差)来行当，毕矮讲，我郎宁家穷，欠了许多账，没办法，只好到那表妹当，借个猪公牵来当，牵来卖卖好还账，管咯自良心生的背脊上，猪公牵到农村里上，寄的别个当，毕矮归到侬家上，心里想想落直相，一觉困(睡)到大天八十亮，再讲表妺老早都听宁讲，毕矮要卖猪公去还账，只怕别人去剥衣裳，心头一急骂声贼表哥，第二日天早五更要赶到表哥当，一路走来一路行，表哥农家到来临，开口便要讴一声。 （白）表哥。也、也、也表妹，侬夯早的，我侬的都没爬起。快点爬起。哦，好咯，便来开门。侬个拐子。也、也天早午更早骂宁咯！要拐要骗到别个当去，咯个讲侬本领嘞，骗到自咯表妹头上弗有啥咯威风呢？表妹我也没办法哴，弗骗侬汉得弗肯咯哴，再讲，骗死宁已不要典(抵)命，侬自答应咯。猪公呢？卖掉了。那么咯一回一定要赔咯，弗赔弗肯咯。听我讲。覅讲嘞。 （唱）表妹呀，侬覅急，也覅气，我侬道理讲侬听，账欠多，还弗起，别咯望弗起，咯个出生地方站弗来落去，准备离开兰溪到汤溪，只恍(怕)日后碰到再要讨账剥衣裳，汤溪地方做宁又要受影响，只好吃亏侬表妹，骗个猪公卖卖还还账 。 （白）哼，侬咯个懒骨头，吃吃嬉嬉，一个宁钟(养)一口都钟弗去，想骗骗过日子，侬张面皮也弗红咯，呒出息咯，要赔咯，弗赔弗来咯。 （唱）表妹啊，我讲来，侬要听仔佃，昨日走到街路上，肉店门口来站及，老板贱声贱气，两家吵起来，打赌人道出问题，若讲我侬三日之内讨得老婆起，陪到肉店门口去望及，出我两百斤猪肉，十担缸面黄(酒)，豆腐店老板还讲出我廿斤千张，两板豆腐挑到我侬农家来，三日讨老婆，分明潮笑我毕矮 ，我想争口气，只好寻侬表妹商量及，当面来的侬郎宁家讲，侬肯定弗答应，想一个办法猪公牵出卖落去，侬定会赶到我侬宁家来，再来和侬商量也弗迟，表妹啊，侬总该帮忙收场及，作为我侬老婆承认及，骗归咯东西和侬两家来分及，猪公我侬会买转来，送到侬郎宁家来，表妹啊，求侬一定要帮衬及。 （白）啥会这样的，好的，扮记表哥老婆弗已呒事咯，这口气要争的，要么我归去，衣裳裤换及就转来，像模像样做夫妻，替侬表哥争口气，侬等及。 （唱）表哥啊，肥水不流别咯田，打断骨头连着筋，穷帮穷来亲帮亲，只要侬表哥回心转意，振作精神重做宁，我做表妹咯宁，理当应该来帮忖。多谢表妹有感情，也好让我表哥好做宁，要侬三个老板吃苦情，还讲我侬毕矮有本领，三日里面讨老婆，赌人道来赌赢，随便哪个今后不敢轻口来薄皮。毕矮今后也好来做宁。毕矮心里高兴快活相，一速忙步就要归到屋里上，上横头，房间里，窝头屋里，统统收入清楚相，样样东西移来移去么放停当，直望横望心里想，只要表妹肯帮忙，这次赌人道，定赢都覅讲，弄假成真老婆便要讨到层里上。后半生世做宁有威光，再唱表妹落的房间换衣裳，全身镜摆端正，头发梳起赛乌云，扎个头髻鹁鸽形，初月眉毛鲫鱼口，睛晴乌珠黑嘟嘟，鼻头梁岗隆隆，水粉胭脂拍拍匀，姑娘扮起好人品，一双脚都菱角形，大红鞋圆又尖，鞋上秀着茉莉花配上鲤鱼跳龙门，上穿红，下穿蓝，百褶裙上绣起十样花，金桂花、银桂花、牡丹花来芙蓉花，绣球花、凤仙花、各种漂亮来兰花，还有茶花、雪里腊梅花，朵朵都是表妹咯侬表妹绣出来，平常日子啥不得掇出来着(穿)今日喜事到来临，心肝宝贝穿上身，从头到脚簇簇新，梳装打扮也认真 ，一切调停都灵清，自望自弗也称心，走出门来风漂云，一路之上不留定，表哥侬家到来临，软软相相讴一声。 （白）表哥！唷，表妹侬来啦，嚎嚎，一及还认弗着来，我还讲是深山九戒狐狸精来嘞咾，真好望啊，表妹侬真特漂亮咯喂。表哥，难听咯，清天白天少讲几句，到侬屋里去！喔！ （唱）表妹扮的好宁品，一貌堂堂如观音，可惜表哥跌鼓宁，穿起衣裳都破零零，前面后面都是破布筋，好比鲜花插在牛屙(粪)上，害侬表妹咯名起都失光，连累侬表妺今后难做宁。 （白）表哥，穷嘞富嘞都没事咯，弗搭界咯，咯回侬有新衣裳都覅穿，穿的越破越威风，表哥，前面陪去，好咯，多谢表妹来帮忙，那么侬跟来。好，去！好，我代去！ （唱）毕矮前面走，表妹后面跟，别咯望着要问声，毕矮，后面咯个是啥宁？毕矮讲，是老 婆，有些宁听了肚里都发笑，毕矮出名跌鼓宁，有夯漂亮咯老婆，街路上，听着望着都弗相信，大家后面跟来都相弄灵清，到底是假还是真，男咯男，女咯女，老咯小咯都跟起整大群，毕矮这回风头都出尽，心里讲弗出咯快活声。两个宁，一路走来一路行走呀走到肉店门当中心，毕矮开口讴一声。 （唱）老板。哎唷，毕矮！老板，今日刚好三日上，侬望，我侬老婆讨来啦，哎唷，侬是毕矮老婆？老板，我佛说毕矮老婆，那么侬咯老婆？当正咯？老婆还有空画讲的？好好好，赌过宁道，讲多少便多少咯，老板两担！对，弗会欠侬咯，哎，轻口薄皮，活该，白白去两担肉。老板，两担肉要呒骨头咯来，如果有骨头 起码两担半。 （唱）肉店老板呒办法，多怪自轻口薄皮张口要便宜，咯个老板宁倒是还蛮直爽相咯，马上掇来把剔骨刀。别得，别得。都把骨头剔干净，一边剔，一边望毕矮，心里加上又心痛，一及徉误(失误)去，别了一刀，罪过两个手拇指头(手指)脱了来，哎哟喂哎哟喂哎哟喂，痛的直叫双手抖零零。 （白）老板，手拇指头都好当肉咯，算了，望你罪过，骨头便覅剔了，称足两担肉便算数的啦。 （唱）罪过老板手拇指头都割了来，手上染的血淋淋，心也痛肉也痛，也总要弗来，自个轻口来薄皮，今日正当来话该 ，两担肉称的危险准，交付毕矮都灵清，再到隔壁酒店里，酒店店老板呒没叙话经，十担缸面黄，老早准备端正坑共里。 （白）老板，哎，毕矮侬来了，老早准备好了，坑里(放着)等侬来啦！老板侬真当明白直爽宁，赌人道，怪来怪去怪自张口部要便宜，活该咯！ （唱）酒店老板心里痛来口里讲弗出，讴作火烧乌龟肚里痛，罪过一担一担一共廿坛酒数端正，交侬毕矮点灵清，再讲共个豆腐店老板口里弗讲心头想，我侬还好二板豆腐廿斤来千张，吃亏也弗危险相，这种多是教训哴，凭空白地(无缘无故） 要去讲别宁，以后真的不要轻口薄皮撮便宜，这次教训一定要记在心，豆腐千张称好送到毕矮面前正三家店铺老板罪过肚场都悔乌青。两担猪肉，十担缸面黄，两板豆腐，廿斤来千张，毕矮当场央发脚(挑夫)一起 调调搁搁到的农家上，这种事干凑哄兴，各个发脚都在忙，搁水劈柴生风炉，喜喜哈哈都到毕矮农家里，一起危险来开心，这个时候见毕矮开口把话分，侬了大家一起听牢，今天侬郎把我挑的吃吃力力，还的对侬郞讲清楚来，酒仂肉仂尽侬了吃饱，发脚钱我侬汉及付弗出咯，毕矮和表妹，心里高兴满面都红光，赶紧烧茶烧滚汤，烧肉炖千张，千张肉，滚起谷谷谷(代表围成一团)三年陈咯缸面黄把桌上，准备多谢大家来帮忙。划拳助兴喊的老响响，一定恭喜、二家好、三中状元、四指发财到。侬郎欢喜吃的只管吃，不用客气咯，我毕矮宁家穷，也呒没铜钱银子付侬哴，这个时候每个发脚吃的，肚皮饱腾腾来酒熏熏，呢啰哇啰(指讲话不清)来答应，呒事咯，我了只要有的吃就好咯，不用发脚赛过有铜钱银子还要味，时间混去快的紧，半夜子时更鼓敲端正，大家准备归家门。 （白）表妹，哎 ，表哥。大家弗都想动身走嘞，事干也调定落直嘞，时间也弗早了侬呗，侬也好归去嘞，多了来咯东西我代两家分，生光景？表哥。哎！ （唱）表哥啦，只要侬从今以后，改邪归正用心做，好端端活的世上好做宁，我表妹嫁的侬表哥呒要紧，心肝情愿为侬表哥传宗接代也高兴，弗晓得表哥心头生光景。嗨，这个时候咯毕矮， 心里听听危险味，多谢侬表妹有情义，我毕矮一定好好来做宁，好好撑份家当还侬表妹情。哎，讲的不错咯，表哥郎，只要自郎表妹表哥结成亲，公婆两个一条心，两个宁，同甘来共苦，落去(从今以后)都弗会来跌鼓，农家弗会穷来只会富。表妹啊，今夜拜堂便成亲，酒肉都现成，发脚当贺客，搁壁临舍凑哄兴，请酒划拳闹得紧。表哥啊，便依侬，择日不如撞日好，今天拜堂来同床，生个儿来一定是个状元郎，毕矮借表妹，假戏变转真，古话讲，人难料，水难量，轻口薄皮要上当。各位朋友听端正，毕矮聪明又能干，用自智慧来战胜，毕矮娶妻唱完成。 改编整理：郑有莲 2020年7月24 |
|
|
