老上海个菊展
秋深霜浓，申城各大公园侪要举办勿同规模个菊展，里向头琳琅满目，千姿百态。实际浪向，爱菊赏菊个风俗垃拉上海由来已久。
菊花是“中国十大名花”之一。老里八早，闲居吴淞江下游一带个文人墨客，到了重阳就流行垃庭院里向荟萃名菊，邀请朋友一道赏菊赋诗，譬如《上海地方志物产资料汇辑》记载：“元（代）谢伯理居松江……九月会友，园丁以佛顶菊献。”搿种小型个菊展，后来就慢慢演变成为盛大个“菊花会”。垃拉晚清，同治《上海县志》记载：沪郊“菊种类甚多，城乡畦种，花时成市”。每逢菊花怒放，四乡百姓纷纷前往上海老城厢个丹凤楼（遗址位于今丹凤路近福佑路处）、大境阁、豫园，争相观赏风情万种个“菊花会”，搿眼地方真是人如潮涌，盛况空前。其中，豫园个“菊花会”顶壮观，王韬个《瀛壖杂志》记载：“菊花会多在九月中旬，近或设于萃秀堂门外，瘦石疏苔，曲廊小榭，已觉萧然有秋意。绕湖石折而东北，境地开朗，遥见菊影婆娑，毕呈眼底。循回栏而入，则万卉齐花，高低疏密，罗列堂前，棐几湘帘，瓷盆竹格，无不尽态极妍，争奇斗胜。”迭搭块个各种菊花由于有场景衬托更加显得别具一格，大家侪为能一睹而后快。
搿个辰光，上海一些个营业性私园，同样会垃深秋举办“菊花会”。其中闸北唐家弄徐园即双清别墅（遗址位于今天潼路814弄35支弄）个“菊花会”影响顶大，伊面个展品有几十种，开头以本园为主，很快发展到以向各园圃征集为主；由于展示场地有限，园主就以七天为一“集”，拿勿同花期个菊花分四“集”展出跟评比，并附带推出“菊花诗会”、“菊花画会”、“菊花曲会”、“赏菊宴会”。徐园个“菊花会”系列活动，因为迎合了社会中、上层人士个喜好，所以长久勿衰。另外，上海租界当局也勿得勿“入乡随俗”，垃拉莳花会会员个展赛中，让菊花跟洋花一道亮相；外滩公园（今黄浦公园）附属花圃秋季举办个小型花展，也出现菊花。到仔清末民初，沪郊乡民勿再进城赏菊，而时兴垃拉集镇“赛菊”。一到“秋风起，菊花黄”个季节，每户人家侪会搬出自种个菊花，摆到附近闹猛个地方，由公众评选“菊花王”；夺魁个“艺菊主人”，总归交关开心，还邀请邻居来吃酒庆祝。民国《宝山县志》记载了搿种民风：“（乡村）菊种类甚多，九、十月间开会比赛，多至数百种，数千盆。”
搿歇，上海个菊花勿仅出口海外，而且名品越来越多。垃拉本地菊花传统造型当中，特别有趣个是：“大立菊”，一根壮实枝干浪竟会绽放成百上千朵花，均匀整齐，美如织锦；“悬崖菊”，从高处宕下来，邪气像一座开满鲜花个悬崖，拨了大家一泻千里个感觉……
|
|
