|
文｜费里尼 老L真有其人，也真的姓L，不是“我有一个朋友”那种套路。 老L也真是渣男，不过廿几年前伊死特的辰光，社会上还勿流行“渣男”的讲法。 总是先有事实，后有概念。 老L虚岁一百死特的。 交关人侪讲：老L只棺材，人生赢家（最后四个字，要用国语发音）。 老L少年老成，17岁就混上海滩。拿了头婚太太的私房铜钿开学堂。啥学堂，画图学堂。L刘嗅觉灵敏，艺术品味也ok，在全中国第一个引进西洋棵体（此处存心用了我小辰光勿懂事体时的发音：棵体，防止被举报删特）麻豆写生。搿记轰动，老L被保守阶级列为上海滩三大妖怪——其他两位一个是写《性史》的张竞生，一个是写准黄色歌曲《毛毛雨》的黎锦晖。 实话实讲，老L引进世界先进艺术手段的意思在前，碰瓷封建意识的意思也是有的。军阀孙传芳就上当了，下令捉伊。老L逃到法租界，法国总领事在巴黎啥么事没看到过，勿肯交出老L。八卦小报一炒作，老L名气一记头上去，变成上海滩顶流。 迭个辰光，老L办学堂没国家一分洋钿拨款，侪靠老婆私房铜钿支撑，后头名气出来，学生多了，状况好转。头一个老婆利用价值严重缩水，花嚓嚓的老L看伊也厌弃，就想办法甩回老家。老L对外的讲法有交关，一歇歇讲老婆乡下富人小姐，来上海一记头勿适应，心理也邪气自卑，盯伊太紧，实在吃勿消；一歇歇又讲迭桩婚事啊，伊其实根本没圆过房，连夜反抗封建礼教，逃出生天。 因为老L活得实在长，晓得真相的人侪死了差不多了，所以现在上网查，基本是后头一个讲法。所以历史真相搿么事，和健康休戚相关，也和面皮有关，能够舍得厚面皮和媒体讲故事，皮越厚，流传下来的形象越高大。 老L的第二个老婆是伊的写生麻豆，嫁给他的辰光只有17岁。要讲伊的渣，还体现在，老L一直讲这位才是他的第一个老婆——赛过现在的风投融资，第二个老婆是A轮，第一轮勿叫A轮，叫PreA。 迭个老婆给老L养了好几个小孩，还陪他去法国游学开眼界。在法国，老L认得了一生的好基友老F。老F上海本地人，从小没父亲，姆妈教育方式邪气粗暴，搞得老F一辈子脾气火爆——用今朝的话讲，直男，情商低。 巴黎，花花世界，老L一记头老虫跌了米缸里。一天，老L在酒吧搭讪了一个金发美女，美女引老L穿街走巷，去到一栋房子里（以下删去5000字）。老L出来心别别跳，奥扫寻到老F分享春天的故事。要讲老F上海本地人就是老举，听好勿响，朝老L勾勾小指姆头。老L一路跟老F穿街走巷，进到一栋房子里。老F法郎开路，拉老L进到一个房间，房间摩擦乌黑，墙上有洞洞眼。老L伸过头去一窥，哦册那，还是昨天那个金发美女，不过男主角调了别人。 看好，老L不响。老F痛心疾首，讲：侬只戆棺材，本来应该是收费项目啊。 至于老F为啥介老举。我没查到资料旁证，不敢瞎讲。 老L人渣，还小气，用上海话讲就是“沙坑”，人沙无敌。老F老L一部轮船回上海后，老L请老F去伊的画图学堂教书。老L懂艺术，但更懂社交混圈子。学堂办学钞票侪要自家筹，除了对老F还可以，对其他员工侪比较沙坑。礼拜天老L叫员工屋里厢吃饭，员工去了，老L让伊代笔画油画，自家隔壁搓麻将，搓好，过来望一眼，面不改色拿笔签上自家名字。 搿员工后头穷困潦倒死特。老L相当冷漠。老F火气大，也没办法，只好宣布断交。 渣渣的老L无所谓的，伊学堂办得还可以，顺便把A轮老婆调特了——这趟的B轮还是学生。老F搿辰光也结婚了，不过很快又和老LB轮老婆的阿妹搞上了暧昧，对老L调老婆的事体，实在发不出啥调头。 老L花嚓嚓的脚本从没停歇。在调老婆的间歇，继续以棵体写生搞七捻三，听讲麻豆里就有后头搞了邪气大的BA。对搿只女人，老L80几岁辰光和别人讲起来还忍不住凡尔赛：搿只女人送拨我我也勿要啊，不过，身材的确还可以…… 没几年，日本人来了。要讲老L，开始表现还是可以的。一家头跑到南洋为抗日义卖筹款。一年多没回来，B轮已经大肚皮了——小人是老L一个朋友老X的。 老L搿辈子，只被一个女人fire过，就是B轮。后头交关年过后，讲起这个老婆，老L还是痛惜不已。日本人后来发觉老L在南洋搞事体，一部轮船拿伊车回上海。老L先解决老婆的事体，伊比较大度，表示既然都珠胎暗结了，索性成全伊拉。老X一记头面孔红了，寻到老L，表示自家错了，如果老L不介意，可以完B归赵。老L眼乌珠一弹，讲：侪讲好了，搿种事体勿可以退货。 老X：有数了。 懂的人后来讲，老L看起来上路，其实是在南洋已经搭上了富商的女儿，也是伊的崇拜者，趁机调老婆咯。 C轮婚结好。日本人也没放过老L。搿段辰光，老L的经历邪气刮三。伊办画展，日本高官到场祝贺，有军人大佐之类，也有文化特务。老L欧洲哪个国家没得去过，和日本人谈笑风生。 讲讲也妖。天亮之后，老L没事体一刚。只有最开始几年，有眼小危险。20几年前读过老L图画学堂的一个学生，爬到高位，写信向上头举报老L汉奸。要讲老L运道也是真好。写举报信的没多少辰光心脏病走特了。老L虽然看起来还在待定区，但总算暂时安全。 多年以后，谈起写信的同行，老L和后辈豁胖：侬看我有介许多女人，啥事体没，伊搞了一个就走特了喏。 最开始的几年，上头对老L还是有想法的。那个欢喜讲自己来晚了的大佬曾经拍着台子和老刘的一个学生讲：政府大门开了还，让伊早点进来拿事体讲清爽！ 老L佝了上海，啥地方勿去，也勿响。辰光一长，居然就勿大有人讲这桩事体了。 所有人侪想勿落。 老F特老L绝交十几年，后来老F主动，恢复走动，老L邪气激动，后头一直讲老F是伊搿辈子最好的朋友。 拍案而起老F，终年58。虚与委蛇老L，十足99。 晚年老L接受采访，思想开通，老底子交关瞎七搭八的事体，该讲不该讲全部讲。上海滩老L和三国的老刘有句一式一样的台词：我的二弟从没让我失望。老L讲法讲法，满面红光，鹤发童颜。 当年上海宝贝号称用身体写作，其实搿种么事侪是老L这种人白相剩下来的，差不多100年前，老L伊拉就用身体画图了。 眼睛一霎，老L跑特也20多年了，晓得老L的人，是越来越少，伊基本像古人一样活在传说里厢了。老L算渣男伐？好像也算。不过和当代渣男最大的区别在于，肯出来讲伊坏话的女人一个没碰到。 搿句闲话是一点没错的：基层群众要的交关么事，只有骗子能给；女人要的交关么事，只有渣男能给。   |
|
|
