 夜访 建国东路财神庙旧址 原创：老周望野眼 改写：周红缨 讲述：王宇洲 推荐：丁迪蒙 点击下方收听音频，时长7分43秒。 建国东路淡水路现在成为了网红打卡点，房地产商请了世界建筑大师让·努维尔，造出一大片砂石质地个建筑，其中纵横交错了红颜色个丹霞景观，郁郁葱葱个绿植搭游客带来了新奇个视觉体验，餐厅、咖啡馆、书店穿插勒当中，叫人流连忘返。 搿一片原来有勿少工厂，墨水厂、煤球厂，有二、三十年代建造个传统住宅，弄堂口摆只摊头，弹弹棉花。也有解放之后新造个六层楼新工房。真个要讲有啥个历史价值，倒也谈勿上。由世界建筑大师来重新规划设计，让旧城区焕发神采，是邪气好个安排。
唯一可惜个是建国东路淡水路东北角原来有只老邮局，是1930年建造个，法租界时代叫康悌路邮政局，后首来叫淡水路邮政所，一直延续了七八十年，承载了交关人个记忆，勒城市更新个过程当中，伊消失了。本来搬到了淡水路复兴中路路口，前一腔也拨拆脱了。或许侬会得迭能想：现在啥人还寄信搭仔订阅报刊杂志呢？邮局个功能已经跟勿上时代了。但调只思路：邮局是一个时代个见证，房子留勒海，拨后来个人看看，又搭啥个界呢？ 建国东路以南，也就是让·努维尔作品个对面，是一段盲肠一样个淡水路，原来也有工厂搭仔住宅个，勒靠近徐家汇路重庆南路个位置，以前是法商电车公司搭法国公墓，后首来是公交公司重庆南路停车场，现在是巴士公司个停车场、办公楼和物业。淡水路以东造了商品房，用了“淡水湾”个名字。其实淡水搭淡水湾根本是两桩事体，淡水是我国宝岛台湾省个地名，加个“湾”字，就弯到广西钦州了。就勒“淡水湾”楼盘个底下头，原来有座财神殿庙，恐怕就老少有人晓得了。
财神殿庙个位置，勒建国东路455弄3号。到现在个地图浪查，迭个地址是呒没个，大致位置就勒现在建国东路淡水路淡水湾花园个楼盘底下。搿座庙建于清咸丰初年（1850年），当时建国东路搿一带还是村落，叫卫家巷，分东西两只村。地方人士捐赠庙基，农民捐资造了搿座供奉财神个庙堂。到1925年，又由地方民众筹款进行重建。重建以后个财神殿庙是水泥结构，占地0.68亩，建筑面积387平方米。虽然是座小庙，但因为供奉个神灵是中国人特别注重个财神爷，所以香火邪气旺。庙里有正方形个天井，也有大殿，一切侪是像模像样个。 财神是中国人民特别喜闻乐见个神祗，千百年来接受香火，从来也呒没想到过会有勿吃香个一天。建国东路财神庙原来个大厅里供奉了10多尊佛像，主要当然是财神菩萨。每年有四次香期，四月初个佛七会以及一年三次个观音圣诞，还有日常朔望，香客云集，侪要来拜一拜、求一求。
但到了1959年，财神非但勿再受重视，反而成为了批判个对象，庙宇当然就拨废置了，庙址变成了声乐扬声器厂。再后来工厂倒闭，财神倒又热门起来了，可惜，庙已经拆了好多年，已经老少有人记得搿桩事体了，当然也勿可能再去恢复了。周边或许还有老年人晓得，但伊拉也拨动迁到郊区去了，搬到此地个住家或者商店，也会得供奉财神，但建国东路淡水路曾经有过财神庙个事体，就拨湮没勒历史当中了。
（本文朗读者） 来源：“吳越小豬”公众号 |
|
|
